રશિયાએ અમેરિકી રાષ્ટ્રપતિ જો બાઈડેનની પત્ની અને દિકરી સહિત 25 અમેરિકી નાગરિકો પર લગાવ્યો પ્રતિબંધ

યુક્રેન પર રશિયાના હુમલાથી નારાજ અમેરિકાએ (America) મોસ્કો પર અનેક પ્રતિબંધોની જાહેરાત કરી હતી. અન્ય દેશોને પણ આવું કરવાની અપીલ કરી છે, જેથી રશિયા (Russia)દ્વારા યુક્રેન પર કરવામાં આવી રહેલી આક્રમક કાર્યવાહીને તાત્કાલિક રોકી શકાય. બાઈડેન સરકારે રશિયન રાષ્ટ્રપતિ વ્લાદિમીર પુતિનની (Vladimir Putin) પુત્રીઓ પર પણ પ્રતિબંધ મૂક્યો હતો, જેમાં તેમના ઘણા નજીકના લોકો પણ સામેલ હતા, જેના પછી આ બંને મોટા દેશો આમને-સામને આવ્યા હતા. જો કે હવે રશિયાએ પણ અમેરિકાને જડબાતોડ જવાબ આપ્યો છે. રશિયાના વિદેશ મંત્રાલયે મંગળવારે કહ્યું કે અમેરિકી રાષ્ટ્રપતિ જો બાઈડેનની (Joe Biden) પત્ની અને તેમની પુત્રી પર રશિયામાં પ્રવેશ પર પ્રતિબંધ મૂકવામાં આવ્યો છે. બાઈડેનની પત્ની અને પુત્રી સાથે 23 અન્ય અમેરિકનો પર પણ રશિયા દ્વારા પ્રતિબંધ મૂકવામાં આવ્યો છે.

લિસ્ટ જાહેર કરતી વખતે મંત્રાલયે એક નોટમાં કહ્યું કે અમેરિકા રશિયા અને તેની મોટી હસ્તીઓ પર સતત પ્રતિબંધો લાદી રહ્યું છે. તેને જોતા અમેરિકા પર પણ પ્રતિબંધોની જાહેરાત કરવામાં આવી છે. આ યાદીમાં ઘણા અમેરિકી સેનેટરોના નામ પણ સામેલ છે. તેમાં મેનના સુસાન કોલિન્સ, આયોવાના ચાર્લ્સ ગ્રાસલી, કેન્ટુકીના મિચ મેકકોનેલ, ન્યૂયોર્કના કર્સ્ટન ગિલીબ્રાન્ડ વગેરેનો સમાવેશ થાય છે. ન્યૂઝ એજન્સી એએફપી અનુસાર આ યાદીમાં ઘણી યુનિવર્સિટીઓના પ્રોફેસરો અને સંશોધકો અને યુએસ સરકારના ભૂતપૂર્વ અધિકારીઓના નામ પણ સામેલ છે.

અમેરિકાએ ઘણી રશિયન સેલિબ્રિટીઓ પર પ્રતિબંધો લગાવ્યા

નોંધનીય છે કે યુક્રેનના આક્રમણથી નારાજ અમેરિકાએ રશિયા પર અનેક પ્રકારના પ્રતિબંધોની જાહેરાત કરી હતી. અમેરિકાએ ઘણા જાણીતા રશિયન વ્યક્તિઓ જેમ કે ઉદ્યોગપતિઓ અને રાજકારણીઓ પર પ્રતિબંધ મૂક્યો હતો. રશિયન પ્રમુખ પુતિનની પુત્રીઓ (મારિયા પુતિન અને કેટરિના તિખોનોવા) સામે સમાન પગલા લેવામાં આવ્યા હતા. બાઈડેન વહીવટીતંત્રે રશિયન પીએમ મિખાઈલ મિશુસ્ટિન, ભૂતપૂર્વ રશિયન રાષ્ટ્રપતિ દિમિત્રી મેદવેદેવની પત્ની અને બાળકો અને વિદેશ પ્રધાન સેરગેઈ લવરોવ પર પ્રતિબંધની પણ જાહેરાત કરી હતી. બાઈડેને પુતિનના ઘણા નજીકના મિત્રો પર આર્થિક પ્રતિબંધો લાદ્યા હતા.