Pakistan: UNમાં પાકિસ્તાનનો પર્દાફાશ ! POKના લોકોએ જણાવી શોષણની કહાની, કહ્યું- માનવ અધિકાર ખતમ થઈ ગયો છે
પાકિસ્તાન સરકારે ઘણા પુસ્તકો અને નકશાઓ પર પ્રતિબંધ મૂક્યો છે અને લોકોને તેમના ઇતિહાસ વિશે વાંચવાની મંજૂરી નથી. પાકિસ્તાની સેના આ વિસ્તારમાં આતંકવાદીઓનો ઉપયોગ સ્થાનિક લોકોને, ખાસ કરીને વિદ્યાર્થીઓને હેરાન કરવા માટે કરી રહી છે, જે સ્થાનિક લોકો તેમના મૂળભૂત અધિકારોની માંગ કરી રહ્યા છે.
પાકિસ્તાન અધિકૃત કાશ્મીરમાં માનવાધિકારને લઈને લોકોમાં નારાજગી દિવસેને દિવસે વધી રહી છે. ગિલગિટ બાલ્ટિસ્તાનની પણ આવી જ હાલત છે. તે જ સમયે, ત્યાના રાજકીય કાર્યકરોએ આંતરરાષ્ટ્રીય મંચ પર માનવ અધિકારોની કથળતી સ્થિતિનો મુદ્દો ઉઠાવ્યો છે. વાસ્તવમાં, મંગળવારે જિનીવામાં સંયુક્ત રાષ્ટ્ર(UN)માં માનવાધિકાર પરિષદના 52માં સત્ર દરમિયાન માનવ અધિકારોની સ્થિતિ પર ચર્ચા કરવા માટે એક કાર્યક્રમનું આયોજન કરવામાં આવ્યું હતું.
આ પણ વાચો: પાકિસ્તાનનો કટોરો રહ્યો ખાલી, IMFએ વિક્રમસિંઘે સરકારને અબજો ડોલરની આપી લોન
આ કાર્યક્રમનું આયોજન યુનાઈટેડ કાશ્મીર પીપલ્સ નેશનલ પાર્ટી (UKPNP) દ્વારા જીનીવાના જ્હોન નોક્સ સેન્ટર ખાતે કરવામાં આવ્યું હતું. બૌદ્ધિકો અને સંશોધકો સહિત અન્ય લોકોએ અહીં કટ્ટરવાદ, સંસાધનોનું શોષણ, લોકોના અદ્રશ્ય અને અન્ય ઘણા મહત્વપૂર્ણ મુદ્દાઓ પર ચર્ચા કરી હતી.
પીઓકેમાં માનવાધિકારની સ્થિતિ ખરાબ
UKPNP (યુરોપ ઝોન)ના પ્રમુખ અમજદ યુસુફે કહ્યું કે, PoKમાં માનવાધિકારની સ્થિતિ ખૂબ જ ખરાબ છે અને પાકિસ્તાન સમગ્ર પ્રદેશ પર પોતાની પકડ બનાવી રહ્યું છે. અહીં ઈસ્લામાબાદે પોતાના અધિકારીઓની નિમણૂક કરી છે, જેમને લેન્ટ ઓફિસર કહેવામાં આવે છે અને તેમનામાં કોઈ સહાનુભૂતિ નથી.
પુસ્તકો અને નકશા પર પ્રતિબંધ
આ સિવાય કાર્યકર્તાઓએ પાકિસ્તાન પર લોકોના ઈતિહાસ અને સંસ્કૃતિનો નાશ કરવાનો આરોપ લગાવ્યો હતો. તેમણે કહ્યું કે, સરકારે ઘણા પુસ્તકો અને નકશા પર પ્રતિબંધ મૂક્યો છે અને લોકોને તેમના ઇતિહાસ વિશે વાંચવાની મંજૂરી અપાતી નથી. તેમણે કહ્યું કે, પાકિસ્તાની સેના આ વિસ્તારમાં આતંકવાદીઓનો ઉપયોગ સ્થાનિક લોકોને, ખાસ કરીને વિદ્યાર્થીઓને હેરાન કરવા માટે કરી રહી છે, જેઓ તેમના મૂળભૂત અધિકારોની માંગ કરી રહ્યા છે.
સ્થાનિક વિદ્યાર્થી સંગઠનો પર હુમલો
અમજદ યુસુફના જણાવ્યા અનુસાર, આતંકવાદીઓએ તાજેતરમાં સ્થાનિક વિદ્યાર્થી સંગઠનો પર હુમલો કર્યો હતો. આ વિદ્યાર્થી સંગઠનો સસ્તા ઉત્પાદનો માટે ભારત સાથે સરહદી માર્ગ ખોલવાની માંગ કરી રહ્યા હતા. યુસુફે જણાવ્યું કે, આ આતંકવાદીઓને સેનાનું સમર્થન છે અને તેઓ સ્થાનિક લોકો પર હુમલા કરવા માટે ઉપયોગમાં લેવાય છે.
આતંકવાદી સંગઠનો પર પ્રતિબંધ
UKPNPના કેન્દ્રીય પ્રવક્તા નાસિર અઝીઝે કહ્યું કે, અમે સંયુક્ત રાષ્ટ્ર અને અન્ય આંતરરાષ્ટ્રીય સમુદાયનું ધ્યાન આકર્ષિત કરવા માટે અમારા શ્રેષ્ઠ પ્રયાસો કરી રહ્યા છીએ. અમે નિર્દેશ કરવા માંગીએ છીએ કે અમારા લોકોને મૂળભૂત અધિકારો નથી. તેમણે આરોપ લગાવ્યો કે, પાકિસ્તાન કહે છે કે તેણે આતંકવાદી સંગઠનો પર પ્રતિબંધ મૂક્યો છે, પરંતુ તેમ છતાં તેઓ આઝાદીથી ફરે છે. પાકિસ્તાનનું આ બેવડુ વલણ આંતરરાષ્ટ્રીય મંચ પર સામે આવવું જોઈએ.
કાશ્મીરીઓનો અવાજ સાંભળવા તૈયાર નથી પાકિસ્તાન
નાસિર અઝીઝે કહ્યું કે, પાકિસ્તાન તેના કાશ્મીરીઓનો અવાજ સાંભળવા તૈયાર નથી, જે તેમના વહીવટ હેઠળ જીવી રહ્યા છે. અમે આંતરરાષ્ટ્રીય સમુદાયને પાકિસ્તાન અધિકૃત કાશ્મીર અને ગિલગિટ બાલ્ટિસ્તાનમાં લોકોના જીવન, સ્વતંત્રતા અને સંપત્તિનું રક્ષણ કરવા આહ્વાન કરીએ છીએ.
Latest News Updates
