નેન્સીની તાઈવાન મુલાકાતને કારણે ચીન ગુસ્સામાં, અનેક મુદ્દાઓ પર અમેરિકા સાથેનો સહયોગ સમાપ્ત કરશે

યુએસ હાઉસ ઓફ રિપ્રેઝન્ટેટિવના સ્પીકર નેન્સી પેલોસીની (Nancy Pelosi) તાઈવાનની મુલાકાતે અમેરિકા (America) અને ચીન (China) વચ્ચેના સંઘર્ષને વધુ ઘેરો બનાવ્યો છે. એક નાનકડા દેશના પ્રવાસે બંને દેશો વચ્ચેનો તણાવ એટલો ભર્યો છે કે ડ્રેગન હવે સુપર પાવરને પોતાનો સૌથી મોટો દુશ્મન માની રહ્યો છે અને ઘણા મહત્વપૂર્ણ મુદ્દાઓ પર અમેરિકા સાથે સહયોગ સમાપ્ત કરવાની વાત કરી છે. ચીને ચેતવણી આપી છે કે તે અમેરિકા સાથેની તમામ સંરક્ષણ બેઠકો પણ રદ કરી રહ્યું છે.

આ સાથે ચીન અને અમેરિકા વચ્ચે પર્યાવરણને લઈને પણ ઘણી મહત્વની વાતચીત થવાની હતી, જે હવે સ્થગિત કરી દેવામાં આવી છે. એવું માનવામાં આવે છે કે જે રીતે અમેરિકાએ ચીનની ધમકીને બાયપાસ કરીને નેન્સી પેલોસીને તાઈવાન મોકલી ત્યારથી ચીન અમેરિકાને પોતાનો સૌથી મોટો દુશ્મન માને છે. ચીનના વિદેશ મંત્રાલય તરફથી માહિતી આપતા જણાવવામાં આવ્યું છે કે અમેરિકા અને ચીનમાં યોજાનારી ક્લાઈમેટ ચેન્જ વાટાઘાટ મોકૂફ રાખવામાં આવી છે. આ સાથે બંને દેશોના મંત્રાલયો અને નેતાઓ વચ્ચે ફોન પર વાતચીત અને બે સુરક્ષા બેઠકો પણ રદ્દ કરવામાં આવી છે.

ચીનના વિદેશ મંત્રાલય તરફથી માહિતી આપતા જણાવવામાં આવ્યું છે કે, પેલોસીને તાઈવાન જવા માટે પહેલાથી જ ચેતવણી આપવામાં આવી હતી, તેમ છતાં અમેરિકાએ ચીનની ચેતવણીની અવગણના કરી અને પેલોસીને તાઈવાન જવાથી રોકી ન હતી. પેલોસીની મુલાકાત ચીનના તીવ્ર અસંમતિનું અપમાન છે.

પેલોસીનો એશિયા પ્રવાસ સમાચારોમાં હતો

તેના એશિયા પ્રવાસના સમાપન પર, યુએસ હાઉસ ઓફ રિપ્રેઝન્ટેટિવના સ્પીકર નેન્સી પેલોસીએ શુક્રવારે ટોક્યોમાં કહ્યું હતું કે ચીન અમેરિકી અધિકારીઓને તાઈવાનની યાત્રા કરતા અટકાવીને તાઈવાનને અલગ કરી શકશે નહીં. પેલોસીનો એશિયા પ્રવાસ ખૂબ જ સમાચારોમાં રહ્યો હતો અને આ દરમિયાન તેની તાઈવાનની મુલાકાત અને તેના પર ચીનની નારાજગી ખાસ કરીને ચર્ચામાં રહી હતી. પેલોસીએ કહ્યું કે ચીને તાઇવાનને અલગ કરવાનો પ્રયાસ કર્યો, જેમાં તાજેતરમાં તેને વર્લ્ડ હેલ્થ ઓર્ગેનાઈઝેશનમાં જોડાવાથી પ્રતિબંધિત કરવાનો સમાવેશ થાય છે. “તેઓ તાઇવાનને અન્ય સ્થળોએ જવા અથવા ભાગ લેવાથી રોકી શકે છે, પરંતુ તેઓ અમને તાઇવાનની મુસાફરીથી અલગ કરી શકશે નહીં,” તેમણે કહ્યું.