Iran Israel War: મિડલ-ઈસ્ટમાં મહાયુદ્ધની સ્થિતિ વચ્ચે ભારત સતર્ક, PM મોદીએ નેતન્યાહૂ સાથે કરી વાત, CCS બેઠકમાં ભારતીયોની સુરક્ષા મુદ્દે ચર્ચા
મિડલ ઈસ્ટમાં વધતા યુદ્ધસંકટ વચ્ચે PM મોદીએ ઇઝરાઇલના PM સાથે ચર્ચા કરી અને તાત્કાલિક યુદ્ધવિરામ પર ભાર મૂક્યો. ખામેનેઈના મૃત્યુ બાદ પરિસ્થિતિ ગંભીર બની છે. CCS બેઠકમાં ભારતીયોની સુરક્ષા મુદ્દે ચર્ચા થઈ.
મધ્ય પૂર્વમાં હાલ પરિસ્થિતિ ઝડપથી બદલાઈ રહી છે અને તણાવ ચરમસીમાએ પહોંચ્યો છે. આ સંજોગોમાં રવિવારે મોડીરાત્રે ભારતના પ્રધાનમંત્રી નરેન્દ્ર મોદીએ ઈઝરાયેલના પ્રધાનમંત્રી બેન્જામિન નેતન્યાહૂ સાથે ટેલિફોન પર મહત્વપૂર્ણ ચર્ચા કરી. આ ચર્ચા ત્યારે થઈ જ્યારે ઈરાનના સર્વોચ્ચ નેતા અલી ખામેનેઈના મૃત્યુ બાદ સમગ્ર પશ્ચિમ એશિયામાં અસ્થિરતા વધી ગઈ છે અને ઈરાને જવાબી કાર્યવાહી શરૂ કરી છે.
PM મોદીએ નેતન્યાહૂ સાથે કરી વાત
પ્રધાનમંત્રી મોદીએ સોશિયલ મીડિયા પ્લેટફોર્મ X પર માહિતી આપતાં જણાવ્યું કે બંને નેતાઓ વચ્ચે વર્તમાન પ્રાદેશિક પરિસ્થિતિ અંગે વિગતવાર ચર્ચા થઈ. મોદીએ ભારપૂર્વક કહ્યું કે નાગરિકોની સુરક્ષા સર્વોચ્ચ પ્રાથમિકતા હોવી જોઈએ અને હિંસાત્મક પ્રવૃત્તિઓને તાત્કાલિક સમાપ્ત કરવાની જરૂર છે. ભારતે હંમેશાં સંવાદ અને કૂટનીતિને જ સંઘર્ષનો ઉકેલ માન્યો છે અને ફરી એકવાર યુદ્ધવિરામની અપીલ કરી છે.
Had a telephone call with PM Benjamin Netanyahu to discuss the current regional situation. Conveyed India’s concerns over recent developments and emphasised the safety of civilians as a priority. India reiterates the need for an early cessation of hostilities.@netanyahu
— Narendra Modi (@narendramodi) March 1, 2026
આ સાથે જ પ્રધાનમંત્રી મોદીએ મોહમ્મદ બિન ઝાયેદ અલ નાહ્યાન સાથે પણ વાતચીત કરી અને સંયુક્ત આરબ અમીરાત પર થયેલા હુમલાઓની કડક નિંદા વ્યક્ત કરી. તેમણે જણાવ્યું કે આ મુશ્કેલ સમયમાં ભારત સંપૂર્ણ એકતાથી યુએઈની સાથે ઉભું છે. ખાડી દેશોમાં વસતા ભારતીય નાગરિકોની સુરક્ષા સુનિશ્ચિત કરવા બદલ તેમણે યુએઈના નેતૃત્વનો આભાર માન્યો.
સુરક્ષા મુદ્દે CCSની બેઠક
ઈરાન અને ઇઝરાઇલ વચ્ચે વધતા સૈન્ય સંઘર્ષ અને પશ્ચિમ એશિયામાં બગડતી પરિસ્થિતિને ધ્યાનમાં રાખીને ભારત સરકારે ઉચ્ચ સ્તરીય પગલાં શરૂ કર્યા છે. રવિવારે મોડીરાત્રે પ્રધાનમંત્રી નરેન્દ્ર મોદીએ સુરક્ષા મામલાઓની કેબિનેટ સમિતિ (CCS)ની બેઠકની અધ્યક્ષતા કરી. માનવામાં આવે છે કે આ બેઠકમાં મિડલ ઈસ્ટની વર્તમાન પરિસ્થિતિ, વૈશ્વિક પ્રભાવ અને ખાસ કરીને તે વિસ્તારમાં રહેલા ભારતીય નાગરિકોની સુરક્ષા અંગે વિસ્તૃત ચર્ચા થઈ.
બેઠકમાં રાષ્ટ્રીય સુરક્ષા સલાહકાર અજિત ડોભાલ, પ્રધાનમંત્રીના મુખ્ય સચિવ પી. કે. મિશ્રા, શક્તિકાંત દાસ, ચીફ ઓફ ડિફેન્સ સ્ટાફ અનિલ ચૌહાણ, કેબિનેટ સચિવ ટી.વી. સોમનાથન અને વિદેશ સચિવ વિક્રમ મિશ્રી હાજર રહ્યા હતા.
મધ્ય પૂર્વમાં વસતા ભારતીયો
સૂત્રોના જણાવ્યા અનુસાર, પશ્ચિમ એશિયામાં વસતા લગભગ 90 લાખ ભારતીયોની સુરક્ષા મુખ્ય ચર્ચાનો વિષય રહ્યો. ઈરાનમાં અંદાજે 10,000 અને ઇઝરાઇલમાં 40,000થી વધુ ભારતીયો રહે છે. વધતા સૈન્ય તણાવને કારણે સમગ્ર વિસ્તારમાં હવાઈ ક્ષેત્ર લગભગ બંધ છે, જેના કારણે સૈંકડો ભારતીયો દુબઈ સહિતના મોટા એરપોર્ટ્સ પર ફસાઈ ગયા છે. ઘણા લોકોએ સોશિયલ મીડિયા મારફતે સરકાર પાસે મદદની અપીલ કરી છે.
બેઠકમાં હોર્મુઝ જળમાર્ગની સ્થિતિની પણ સમીક્ષા કરવામાં આવી. આ જળમાર્ગ ભારતીય તેલ વહન જહાજો માટે અત્યંત મહત્વપૂર્ણ છે. જો આ માર્ગ બંધ થાય તો ભારતના ઊર્જા પુરવઠા પર સીધી અસર થઈ શકે છે.
આ દરમિયાન અમેરિકાના રાષ્ટ્રપતિ ડોનાલ્ડ ટ્રમ્પએ જણાવ્યું કે ઈરાન પર કરવામાં આવેલા હુમલાઓ આગળ પણ ચાલુ રહી શકે છે. અમેરિકી અને ઇઝરાયલી સંયુક્ત બોમ્બમારીમાં ઈરાનના સૈન્ય અને સરકારી ઠેકાણાઓને નિશાન બનાવવામાં આવ્યા છે.
ભારતીય દૂતાવાસ નાગરિકોના સંપર્કમાં છે
ભારતના વિદેશ મંત્રાલયે સ્પષ્ટ કર્યું છે કે સમગ્ર વિસ્તારમાં સ્થિત ભારતીય દૂતાવાસો પોતાના નાગરિકો સાથે સતત સંપર્કમાં છે અને હેલ્પલાઈન શરૂ કરવામાં આવી છે. ભારતે ભૂતકાળમાં પણ સંકટગ્રસ્ત વિસ્તારોમાંથી સફળતાપૂર્વક પોતાના નાગરિકોને બહાર કાઢ્યા છે, અને જરૂર પડશે તો ફરી એ જ દિશામાં પગલાં લેવામાં આવશે.
વર્તમાન પરિસ્થિતિને ધ્યાનમાં રાખીને ભારત સાવચેત છે અને નાગરિકોની સુરક્ષા તેની પ્રથમ પ્રાથમિકતા છે.
