ઇંગ્લેન્ડ પ્રવાસ માટે ભારતની ‘યંગ બ્રિગેડ’ તૈયાર, જાણો ટીમમાં કોની એન્ટ્રી થઈ અને કોની એક્ઝિટ થઈ

ટીમ ઈન્ડિયા આવતા મહિને ઈંગ્લેન્ડ પ્રવાસે જવાની છે, જ્યાં ભારત અને ઇંગ્લેન્ડ વચ્ચે પાંચ ટેસ્ટ મેચની સિરીઝ રમાશે. બીસીસીઆઈએ ઇંગ્લેન્ડ પ્રવાસ માટે ટીમ ઈન્ડિયાની જાહેરાત કરી છે. રોહિત શર્મા, વિરાટ કોહલી અને રવિચંદ્રન અશ્વિન જેવા દિગ્ગજોએ ટેસ્ટ ક્રિકેટમાંથી નિવૃત્તિ લીધી છે, એવામાં ભારતીય ટેસ્ટ ટીમ માટે આ એક નવી શરૂઆત છે.

ઇંગ્લેન્ડ પ્રવાસ માટે ટીમ ઇન્ડિયાની જાહેરાત

અજિત અગરકરની આગેવાની હેઠળ સિલેક્શન કમિટીએ ઇંગ્લેન્ડ પ્રવાસ માટે એક યુવા ભારતીય ટીમની પસંદગી કરી છે. ભારતની યંગ બ્રિગેડ જોતાં લાગી રહ્યું છે કે, યશસ્વી જયસ્વાલ અને અભિમન્યુ ઈશ્વરન ઓપનિંગ બેટિંગની જવાબદારી સંભાળી શકે છે. સાઈ સુદર્શન અને કરુણ નાયરને મિડલ ઓર્ડરમાં સ્થાન આપવામાં આવ્યું છે, જે કોહલીની ગેરહાજરીમાં નંબર 4ની ભૂમિકા ભજવી શકે છે.

ઋષભ પંતને વાઇસ-કેપ્ટન બનાવવામાં આવ્યો છે. જણાવી દઈએ કે, ઋષભ પંત વિકેટકીપિંગની સાથે મિડલ ઓર્ડરમાં ખાસ ભૂમિકા ભજવશે. આ સિવાય ધ્રુવ જુરેલને બીજા વિકેટકીપર તરીકે પસંદ કરવામાં આવ્યો છે.

ઝડપી બોલર અર્શદીપ સિંહની પણ આ વખતે ટેસ્ટ ટીમમાં પસંદગી કરવામાં આવી છે. આ ઉપરાંત, શાર્દુલ ઠાકુરે પણ ટેસ્ટ ટીમમાં પોતાની જગ્યા બનાવી છે. નોંધનીય છે કે, ટીમ ઈન્ડિયાના 18 ખેલાડીઓમાં ઝડપી બોલર મોહમ્મદ શમીનો સમાવેશ કરવામાં આવ્યો નથી.

સરફરાઝ ખાન ફોર્મમાં હોવા છતાં પણ ટીમ ઈન્ડિયામાં પોતાની જગ્યા બનાવી શક્યો નથી. બોલિંગ ડિપાર્ટમેન્ટની કમાન જસપ્રીત બુમરાહ, મોહમ્મદ સિરાજ, પ્રસિદ્ધ કૃષ્ણા અને આકાશ દીપ જેવા સ્ટાર ફાસ્ટ બોલરો સંભાળશે.

ઇંગ્લેન્ડ ટેસ્ટ સિરીઝ માટેની ટીમ ઇન્ડિયા

શુભમન ગિલ (કેપ્ટન), ઋષભ પંત (વિકેટકીપર, વાઇસ-કેપ્ટન), યશસ્વી જયસ્વાલ, કે.એલ. રાહુલ, સાઈ સુદર્શન, અભિમન્યુ ઈશ્વરન, કરુણ નાયર, નીતિશ રેડ્ડી, રવીન્દ્ર જાડેજા, ધ્રુવ જુરેલ (વિકેટકીપર), વોશિંગ્ટન સુંદર, મોહમ્મદ સિરાજ, શાર્દુલ ઠાકુર, જસપ્રીત બુમરાહ, પ્રસિદ્ધ કૃષ્ણા, આકાશ દીપ, અર્શદીપ સિંહ, કુલદીપ યાદવ.

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો