Surat : અડાજણમાં નદીકિનારે મહાપાલિકાની કરોડોની જમીન પર ગેરકાયદે કબજો, રેવન્યુ રેકોર્ડમાં પાલિકાના નામે જગ્યા બોલે છે

અડાજણમાં(Adajan ) તાપી નદીના કિનારે પાલિકાની(SMC) માલિકીની જગ્યા પર ગેરકાયદે કબજો કરાયો હોવાની મેયરને (Mayor ) ફરિયાદ કરવામાં આવી છે . માજી ડેપ્યુટી મેયર નિરવ શાહે રજુઆત કરતા જણાવ્યુ હતું કે અડાજણ રેવન્યુ સર્વે નંબર 690 વાળી જગ્યાનો સમાવેશ ફાઇનલ ટીપી સ્કીમ નંબર દસમાં કરવામાં આવ્યો છે . આ જગ્યા રીક્રિએશન ઝોનમાં મુકવામાં આવી છે .

રેવન્યુ રેકર્ડ પ્રમાણે જમીનની માલિકી સુરત મહાનગરપાલિકાની છે . કરોડોની બજાર કિમત ધરાવતી ખુલ્લી જગ્યામાં ચારે બાજુથી પતરા મારી દેવાયા છે . નામ પુરતી ખેતી ચાલુ હોવાનું બતાવી આ જગ્યા પર પોતાનો કબજો હોવાનું હાઇ કોર્ટમાં પુરવાર કરવાનો પ્રયાસ થઇ રહ્યો છે . ભુતકાળમા કેબલ બ્રીજના નિર્માણ સમયે પાલિકાએ આ જગ્યા ઇજારદારને આપી હતી .

કેબલ બીજનું નિર્માણ થઇ ગયા બાદ ઇજારદારે પાલિકાને જગ્યા સુપરત કરી દીધી હતી . આ જગ્યા જાળવી રાખવામાં પાલિકા નિષ્ફળ જતા ગેરકાયદે કબજો થયો હતો . અડાજણ એકવેરીયમને અડીને બે રોડ કોર્નરની મોકાની જગ્યાનો તાકીદે કબજો લેવા ટાઉન પ્લાનીગ ખાતાએ રાંદેર ઝોનને પત્ર લખી તાકીદ કરી છે .

ટાઉન પ્લાનીગ વિભાગે પત્રમાં સ્પષ્ટ લખ્યુ છે કે પાલિકાની માલિકીની જગ્યા પર પતરા મારવામાં આવ્યા હોવાનું જણાય છે . આ જગ્યાનો કબજો તાકીદે લઇ લેવા જરુરી કાર્યવાહી કરવા સુચના આપવામાં આવી છે . ટાઉન પ્લાનીગ વિભાગે એક નહી બે બે વખત પત્ર પાઠવી જરુરી કાર્યવાહી કરવા તાકીદ કરી છે . પાલિકાની જગ્યા પર ગેરકાયદે કબજો દુર કરી તાકીદે મોકાની જગ્યાનો કબજો લેવા તેમણે માંગણી કરી હતી .

આમ, કરોડોની આ જમીન પચાવી પાડવાના કારસા સામે ડેપ્યુટી મેયર દ્વારા તાકીદ કરવામાં આવી છે. આ જગ્યા રિક્રિયેશન માટે અનામત રાખવામાં આવી હોય કોર્પોરેશન આ બાબતે ધ્યાન આપે અને દબાણોને દૂર કરીને જગ્યાની માલિકી પરત લે તેવી માંગણી કરવામાં આવી છે.

આ પણ વાંચો :

Surat : એસટીએમ કૌભાંડ મુદ્દે મનપા કચેરી પર હલ્લાબોલ, આપના 14 કોર્પોરેટરો વિરૂદ્ધ પોલીસ ફરિયાદ

Surat : શિક્ષણાધિકારીએ યાદી જાહેર કરતા શાળા વર્તુળમાં ખળભળાટ, 40 ખાનગી શાળાના લાયકાત વિહોણા 135 શિક્ષકોને દૂર કરવા આદેશ