Surat : પાંચ વર્ષની બાળકી પર દુષ્કર્મ હત્યા કેસમાં આજે ચુકાદા પર સૌની નજર

સુરત શહેરના દરિયા કિનારે આવેલા વિસ્તારમાં પાંચ વર્ષની બાળકીની સાથે થયેલા દુષ્કર્મ અને હત્યા(Rape And Murder ) કેસનો ચુકાદો આજે આવે તેવી શક્યતા છે . આ કેસમાં કોઇ ચૂક ન રહે તે માટે બાળકીની ઉંમરને લઇને તેના વતનથી તેનો ઉંમરનો પુરાવો મંગાવી કોર્ટમાં રજૂ કરવામાં આવ્યો હતો .

મળતી વિગતો મુજબ ગત એપ્રીલ 2020 માં હજીરા ગામમાં પાંચ વર્ષની બાળાનું અપહરણ કરીને તેની સાથે સૃષ્ટિવિરુદ્ધનું કૃત્ય કરીને તેણીની કરપીણ હત્યા કરી હતી . આ દુષ્કર્મની ઘટના બહાર ન આવે તે માટે આરોપી સુજીત મુન્નીલાલ સાકેતે માસુમ બાળકીને માથામાં ઇંટ મારીને કરપીણ હત્યા કરી નાંખી હતી . જો કે ઇચ્છાપોર પોલીસે સુજીતની ધરપકડ કરીને જેલમાં મોકલી આપ્યો હતો .

બીજી તરફ આ કેસમાં સરકાર પક્ષે 20 પાનાની લેખીત દલીલો રજૂ કરી હતી . મુખ્ય જિલ્લા સરકારી વકીલ નયન સુખડવાલાએ દલીલો કરતા કહ્યું હતું કે , આરોપીએ પાંચ વર્ષની બાળાની હત્યા કરી હતી અને લાશને રેતીના ઢગલામાં ઢસડી હતી . જેમાં ધૂળમાં પણ લોહીના લીસોટા પણ મળી આવ્યા છે . આ ઉપરાંત જે ઇટથી હત્યા કરવામાં આવી તેમાં બાળકીની લોહીના નમૂના પણ મળી આવ્યા છે .

ચકચારી આ કેસમાં સરકાર તરફે 20 પાનાની લેખીત દલીલ રજૂ કરવામાં આવી હતી . તાજેતરમાં આ કેસમાં બાળકીની ઉંમર કેટલી છે તેને લઇને અનેક પ્રશ્નો ઊભા થયા હતા . બાળકીની ઉંમરને લઇને પણ શંકા ન રહે તે માટે સરકાર પક્ષે બાળકીના વતન મધ્યપ્રદેશથી તેનો ઉંમરનો પુરાવો એટલે કે જન્મતારીખનો દાખલો લાવીને કોર્ટમાં રજૂ કર્યો હતો .

કોર્ટે બંને પક્ષોની દલીલો બાદ આ કેસની મુદ્દત આપી હતી . જો કે આજે આ કેસનો આખરી ચુકાદો આવે તેવી શક્યતા છે . અત્રે ઉલ્લેખનીય છે કે સુરતનો કોર્ટ પણ હવે ખુબ ફાસ્ટટ્રેક થઇ રહી છે . માત્ર 12 જ દિવસમાં બળાત્કાર અને હત્યાના કેસમાં ફાંસીની સજા ફરમાવવામાં આવી હતી . આ કેસનો ચુકાદો પણ ફાંસી કે આજીવન કેદનો આવી શકે તેમ છે .

નોંધનીય છે કે શહેરમાં બાળકીઓ પર બળાત્કારની ઘટનાઓને રોકવા આ પ્રકારની સજા આરોપીઓને મળે તે સમયની માગ છે. તેવામાં આજે આવનારા આ ચુકાદા પર પણ સૌની નજર છે.

આ પણ વાંચો : Surat : પંજાબના શાંદલિયા બંધુઓએ સુરતના 13 કાપડ વેપારીઓને લાખો રૂપિયાનો ચૂનો ચોપડ્યો

આ પણ વાંચો : SURAT : ‘મને ટ્યુશનમાં ન આવડે’ આ વાયરલ વીડિયોએ લોક માનસને ઝંઝોળ્યું, આ ક્યુટ બાળકની જાણો રોચક કહાની