Rajkot: ચીલઝડપ કરી નાસતા ફરતા 2 આરોપીઓને પોલીસે ઝડપ્યા,13 ગુનાઓનો ભેદ ઉકેલાયો

રાજકોટમાં ચીલઝડપ કરતા 2 શખ્સોને LCB ઝોન 2 ની ટીમે ઝડપી પાડયા છે.આ બંને શખ્સોએ છેલ્લા એક વર્ષમાં રાજકોટ શહેરમાં 13 જેટલા ચીલઝડપના ગુનાને અંજામ આપ્યો હતો.પોલીસે આ બંને શખ્સોની ધરપકડ કરી વધુ કાર્યવાહી હાથ ધરી છે. છેલ્લા એકાદ વર્ષથી આ બંને શખ્સોએ શીતલ પાર્ક ચોક,બજરંગ વાડી અને જામનગર રોડ આસપાસના વિસ્તારમાં તરખાટ મચાવ્યો હતો.એક વર્ષથી આ બંને શખ્સો પોલીસને ચકમો આપી રહ્યા હતા અને બેફામ ચેઈન સ્નેચિંગ કરી રહ્યા હતા.છેલ્લા એક વર્ષમાં આ વિસ્તારોમાં આ બંને શખ્સોએ 13 જેટલા ચેઈન સ્નેચિંગના ગુનાઓ આચર્યા હતા.આ શખ્સો પોલીસ માટે પણ પડકાર બન્યા હતા.

આસિફ ખેરાણી અને ગોવિંદ ધામેચા નામના મૂળ ધ્રોલ પંથકના શખ્સોની ધરપકડ કરી

પોલીસે આ વિસ્તારોમાં 70 જેટલા સીસીટીવી ચેક કર્યા હતા.આખરે આ સીસીટીવી ચેક કરતી વખતે એક કાળા કલરનું બાઈક નંબર પ્લેટ વગરનું શંકાસ્પદ દેખાતા પોલીસે વોચ ગોઠવી જામનગર રોડ પ્રેસ કોલોની પાસેથી આસિફ ખેરાણી અને ગોવિંદ ધામેચા નામના મૂળ ધ્રોલ પંથકના શખ્સોની ધરપકડ કરી હતી.

અંધારાવાળી અને સીસીટીવી ન હોય તેવી જગ્યા પસંદ કરતા

આ બંને શખ્સોની ચીલઝડપ કરવાની મોડેસ ઓપરેન્ડીની વાત કરીએ તો આસિફ ખેરાણી નામનો આરોપી ચીલઝડપ કરતા પહેલા આજુબાજુના વિસ્તારની રેકી કરતો અને ખાસ કરીને અવાવરૂ,અંધારા વાળી જગ્યા,ઓછા લોકોની અવર જવર હોય એવા અને સીસીટીવી કેમેરા ન હોય તેવા વિસ્તારમાં ચીલઝડપ કરવાનું નક્કી કરતા.ખાસ કરીને મોટર સાયકલ પર નીકળતા કપલ જેમાં પાછળ મહિલા બેઠી હોય તેને જોટ મારી ચેઈન ઝૂંટવી લેતા અને ત્યારબાદ પીછો ન થઈ શકે તેવી જગ્યાની શોધ કરી જામનગર રોડ પર ચડીને પોતાના ગામ તરફ ફરાર થઈ જતાં હતાં.

123 ગ્રામ સોનું આરોપીઓ પાસેથી ઝડપાયું

પોલીસે આ બંને શખ્સોને ઝડપી 10 ગ્રામ સોનાનો એક ચેઈન,113 ગ્રામ વજનના 8 નંગ સોનાના ઢાળીયા(સોનું ઓગાળીને બનાવવામાં આવે) અને ગુનામાં ઉપયોગમાં લેવામાં આવેલી એક બાઈક સહિત કુલ 6 લાખ 10 હજારનો મુદ્દામાલ કબ્જે કર્યો છે અને આ આરોપીઓએ આ ઉપરાંત પણ કોઈ ગુનાઓ આચર્યા છે કે નહિ તે અંગે પૂછપરછ હાથ ધરી છે.

ગુજરાતના તમામ સમાચાર અને બ્રેકિંગ ન્યૂઝ ગુજરાતીમાં વાંચો tv9gujarati.com પર

ગુજરાતના તમામ જિલ્લાના સમાચાર વાંચવા માટે જોડાયેલા રહો…