Breaking News : રાજકોટના ટ્યુશન ક્લાસિસમાં મોટી બેદરકારી..! ફાયર સેફ્ટીના સાધનો એક્સપાયર, જુઓ Video

ઉત્તર પ્રદેશના લખનઉમાં તાજેતરમાં ટ્યુશન ક્લાસિસમાં બનેલી આગની ભયાવહ ઘટના બાદ દેશભરમાં ફાયર સેફ્ટી અંગે સઘન ચેકિંગ અને એલર્ટ જાહેર કરવામાં આવ્યું છે. આના અનુસંધાને, રાજકોટ ફાયર વિભાગ પણ ત્વરિત એક્શનમાં આવ્યું છે અને શહેરના વિવિધ વિસ્તારોમાં આવેલા ટ્યુશન ક્લાસિસમાં ફાયર સેફ્ટીના નિયમોનું પાલન સુનિશ્ચિત કરવા માટે વ્યાપક તપાસ ઝુંબેશ હાથ ધરી છે.

આ કાર્યવાહીનો મુખ્ય ઉદ્દેશ્ય વિદ્યાર્થીઓના જીવનું જોખમ ટાળવાનો અને લખનઉ જેવી દુર્ઘટનાનું રાજકોટમાં પુનરાવર્તન ન થાય તે સુનિશ્ચિત કરવાનો છે.

આજરોજ રાજકોટ ફાયર બ્રિગેડ દ્વારા શહેરના 150 ફૂટ રિંગરોડ પર આવેલા જાસલ કોમ્પલેક્ષમાં સઘન ચેકિંગ હાથ ધરવામાં આવ્યું હતું. આ કોમ્પલેક્ષમાં અનેક ટ્યુશન ક્લાસિસ કાર્યરત છે. તપાસ દરમિયાન, ફાયર વિભાગની ટીમને ટ્યુશન ક્લાસિસમાં ફાયર સેફ્ટી અંગે ગંભીર બેદરકારી જોવા મળી હતી.

મોટાભાગના ક્લાસિસમાં ફાયર એક્સટિંગ્યુશર જેવા આવશ્યક સાધનોની રિફિલિંગ ડેટ પૂરી થઈ ગઈ હોવાનું, એટલે કે તે એક્સપાયર થઈ ચૂક્યા હોવાનું સામે આવ્યું હતું. આ ઉપરાંત, ઘણી જગ્યાએ નાના અને બંધિયાર સ્થળોમાં ધમધમતા ક્લાસિસમાં ફાયર સેફ્ટીના પૂરતા સાધનોનો અભાવ જોવા મળ્યો હતો, જે આગ જેવી ઘટનામાં ભારે જોખમી સાબિત થઈ શકે છે.

ટ્યુશન ક્લાસિસમાં ફાયરના સાધનોની કમી

ફાયર વિભાગના અધિકારીઓએ આ મામલે ક્લાસિસ સંચાલકોને તાત્કાલિક નોટિસ ફટકારી છે. આ અંગે વધુ માહિતી આપતા એક ફાયર ઓફિસરે જણાવ્યું કે, સી.એફ.ઓ. તથા ડેપ્યુટી સી.એફ.ઓ. ની સૂચના અનુસાર લખનઉની ઘટનાના અનુસંધાને દરેક વોર્ડમાં અલગ-અલગ ટીમ બનાવીને ટ્યુશન ક્લાસિસમાં ફાયરના સાધનોની કમી કે બંધ હાલતને સુધારવા માટે કાર્યવાહી કરવામાં આવી રહી છે. જાસલ કોમ્પલેક્ષમાં આવેલા ક્લાસિસમાં ફાયર એક્સટિંગ્યુશરની રિફિલિંગ ડેટ પૂરી થઈ ગઈ હોવાથી નોટિસ પાઠવવામાં આવી છે. તેમણે સ્પષ્ટપણે જણાવ્યું કે, જો નોટિસ આપ્યા બાદ પણ નિર્ધારિત સમયમર્યાદામાં ફાયર સેફ્ટીની ખામીઓ દૂર કરવામાં નહીં આવે, તો ફાયર વિભાગ કડક કાર્યવાહી કરશે અને આવા એકમોને સીલ કરવા સુધીના પગલાં લેવામાં આવશે.

રાજકોટ ફાયર વિભાગે આ કામગીરીને વધુ વ્યાપક બનાવવા માટે શહેરના 18 વોર્ડમાં અલગ-અલગ 18 ટીમો બનાવી છે. આ ટીમો દ્વારા રાજકોટના તમામ ટ્યુશન ક્લાસિસ, ખાસ કરીને નાના કોમ્પ્લેક્ષો અને બંધિયાર જગ્યાઓમાં ચાલતા ક્લાસિસનું નિરીક્ષણ કરવામાં આવી રહ્યું છે. સામાન્ય રીતે, આવા સ્થળોએ આગ જેવી દુર્ઘટના બને ત્યારે વિદ્યાર્થીઓને બહાર નીકળવાનો માર્ગ મળવો મુશ્કેલ બને છે, જે એક મોટો સુરક્ષા પ્રશ્ન ઊભો કરે છે. ફાયર વિભાગ દ્વારા જ્યાં પણ નિયમોનું ઉલ્લંઘન અથવા ફાયર સેફ્ટીની ખામીઓ જણાશે, ત્યાં નોટિસ આપીને યોગ્ય કાર્યવાહી કરવામાં આવશે. આ ઝુંબેશનો હેતુ રાજકોટના ભવિષ્ય સમાન વિદ્યાર્થીઓની સુરક્ષા સર્વોપરી રાખીને, તેમને સુરક્ષિત વાતાવરણ પૂરું પાડવાનો છે.

લખનઉ અગ્નિકાંડ બાદ અમદાવાદ ફાયર વિભાગની કોચિંગ ક્લાસિસ પર તવાઈ