ધોરાજીના ધારાસભ્ય ખોવાઈ ગયા, નાગરિકોએ તેમને શોધવા ભર્યું આવું પગલું
રાજકોટ જિલ્લા નજીકના ધોરાજી (Dhoraji)શહેરમાં ધારાસભ્ય લલિત વસોયા (Lalit vasoya)વિરૂદ્ધમાં ધોરાજીમાં ધારાસભ્ય ખોવાયા હોવાના પોસ્ટર્સ લાગ્યા છે.
રાજકોટ (Rajkot)જિલ્લા નજીકના ધોરાજી (Dhoraji)શહેરમાં ધોરાજી- ઉપલેટાના ધારાસભ્ય લલિત વસોયા (Lalit vasoya)વિરૂદ્ધમાં ધોરાજીમાં ‘ ધારાસભ્ય ખોવાયા’ હોવાના પોસ્ટર્સ લાગ્યા છે. ધોરાજીમાં અત્ર,તત્ર ગંદકીનું સામ્રાજ્ય ફેલાયેલું છે અને સ્વચ્છતા માટે કોઈ યોગ્ય પગલાં લેવાતાં નથી. ત્યારે વોર્ડ નંબર 3માં ધારાસભ્ય ખોવાયા હોવાના પોસ્ટર લગાવવામાં આવ્યા હતા. વોર્ડ નંબર ત્રણમાં ભૂગર્ભ ગટર, રોડ રસ્તા અને સફાઇના કામકાજ ન થતા હોવાથી લોકોએ પોસ્ટર લગાવીને વિરોધ જાહેર કર્યો હતો.
પોસ્ટરમાં કામ નહીં તો મત નહીની ચીમકી
કોંગ્રેસના ધારાસભ્ય લલિત વસોયા સામે વોર્ડ નંબર-3ના અબ્દુલ કાદરી પાર્કમાં પોસ્ટર લગાવવામાં આવ્યા હતા અને પોસ્ટર વિરોધ કરીને સ્થાનિકોએ મતદાન બહિષ્કારની ચીમકી પણ આપી હતી. નોંધનીય છે કે ધોરાજીમાં રસ્તાના કામકાજ માટે પણ જનતા અવાર નવાર રજૂઆતો કરતી હોય છે. હવે જનતા દ્વારા સ્વચ્છતાનો મુદ્દો હાથ ધરવામાં આવ્યો છે અને તે અંગે રજૂઆતો કરવામાં આવી હતી પરંતુ તેનો ઉકેલ ન આવતા નાગરિકોએ પોસ્ટર લગાડ્યા હતા.
પ્રિ મોન્સૂન કામગીરી અંગે પક્ષ અને વિપક્ષ વચ્ચે આક્ષેપબાજી
તો બીજી તરફ પ્રિ – મોન્સૂન કામગીરીને લઈને ધોરાજી શહેર ભાજપના પ્રમુખે પણ કોંગ્રેસ શાસિત પાલિકા પર સવાલો ઉઠાવ્યા હતા. ભાજપના શહેર પ્રમુખનો આક્ષેપ છે કે પ્રિ-મોન્સૂન કામગીરીના નામે પાલિકાના સતાધીશોએ લાખો રૂપિયાના બિલ બનાવી અને ભ્રષ્ટાચાર કર્યો છે. તેમજ કામગીરી વગર લોકોની હેરાનગતિ વધારી છે. જોકે આ તરફ ભાજપના આક્ષેપોને નગરપાલિકાના કારોબારી સભ્ય પાયાવિહોણા ગણાવતા કહે છે કે વિપક્ષ પાસે આક્ષેપ સિવાય કોઈ કામ નથી. બાકી પ્રિ-મોન્સુન કામગીરી ચાલુ જ છે. નોંધનીય છે કે ધોરાજી નગરપાલિકા કોંગ્રેસ શાસિત છે. ત્યારે નગર પાલિકાના સત્તાપક્ષના સદસ્યએ પણ એવો દાવો કર્યો છે કે ચૂંટણી વખતે આપેલા વચનો પાલિકા પૂરી નથી કરી શકી.