Rajkot : એક તરફ પેટ્રોલ અને ડિઝલના ભાવ આસમાને પહોંચ્યા છે. બીજી તરફ ખાઘ તેલોમાં થતા ભાવવધારાએ ગૃહિણીઓનું બજેટ ખોરવી નાખ્યું છે.એક જ દિવસમાં સિંગતેલના ભાવમાં 25 રૂપિયાનો વધારો થયો છે. જ્યારે 25 રૂપિયાના વધારા સાથે કપાસિયા તેલનો ભાવ ઓલટાઇમ હાઇ થયો છે.રાજકોટની બજારમાં છેલ્લા 24 કલાકમાં સિંગતેલના ભાવમાં 25 રૂપિયાનો વધારો થયો છે. અને સિંગતેલના ડબ્બાનો ભાવ 2400 થી 2450 રૂપિયા પહોંચી ગયો છે.
જ્યારે કપાસિયા તેલના ભાવ ઓલટાઇમ હાઇ પહોંચી ગયા છે.કપાસિયા તેલમાં પણ 25 રૂપિયાનો વધારો થતા ડબ્બાનો ભાવ 2300 રૂપિયા પહોંચી ગયા છે.મોટાભાગે મધ્યમ પરિવાર કપાસિયા તેલનો ઘર વપરાશમાં ઉપયોગ કરતા હોય છે. અને તેના ભાવમાં રેકોર્ડ બ્રેક વધારો થતા સામાન્ય માણસનું બજેટ ખોરવાઇ ગયું છે.ગૃહિણીઓનું માનવું છે કે મોંઘવારીને કારણે બજેટ પર અસર પડી રહી છે. ખાસ કરીને છુટક તેલની ખરીદી કરતા પરિવારોને આ ભાવવધારો અસહ્ય લાગી રહ્યો છે.
કાચા માલની અછત ભાવવધારાનું મુખ્ય કારણ-વેપારી
આ તરફ વેપારીઓ ભાવવધારા પાછળ કાચા માલની અછત ગણી રહ્યા છે.રાજકોટના પરાબજાર વિસ્તારમાં વેપારી પેઢી ઘરાવતા વેપારી કિરીટ શાહે જણાવ્યું હતુ કે આ વખતે ઉનાળું મગફળી માર્કેટમાંથી પુરી થઇ છે અને હવે ચોમાસું મગફળી આવવાને સમય છે. ત્યારે કાચા માલની અછતના કારણે આ ભાવવધારો થઇ રહ્યો છે.સાથે સાથે આ વખતે ગુલાબી ઇયળના કારણે કપાસનું ઉત્પાદન ઓછું થયું છે જેના કારણે આ ભાવ વધારો થયો છે.
આંતરરાષ્ટ્રીય સટ્ટાખોરી ભાવવધારા માટે જવાબદાર
આંતરરાષ્ટ્રીય માર્કેટમાં તેલિયારાજાઓ દ્વારા સટ્ટાખોરી થતી હોવાથી લોકલ બજારમાં ભાવમાં ક્યારેક ઉછાળો તો ક્યારેક નરમાશ આવી રહી છે. ચીનમાં સિંગદાણાની માંગ અને સપ્લાય પર મગફળીના સોદ્દા પડી રહ્યા છે. આ ઉપરાંત પામોલીન તેલ અને સનફ્લાવર તેલના આંતરરાષ્ટ્રીય સટ્ટાબાજીથી અન્ય લોકલ બજારોમાં પણ ભાવની વધધટ થઇ રહી છે.સરકાર જો આ અંગે નિયંત્રણ મૂકે તો ભાવ વધારો નિયંત્રણ આવી શકે છે.