30 એપ્રિલના મહત્વના સમાચાર : પશ્ચિમ બંગાળમાં બીજા તબક્કામાં 91.62 જેટલુ મતદાન, તો એક્ઝિટ પોલમાં આસામમાં NDAને મળી શકે છે 100 જેટલી બેઠકો

કર્ણાટકના બેંગલુરુ શહેરના અદુગોડી વિસ્તારમાં એક યુવતીનો સડેલો મૃતદેહ મળતા ભારે ચકચાર મચી ગઈ છે. ઝારખંડની 34 વર્ષીય પૂજા દત્તાનો મૃતદેહ ત્રીજા માળે આવેલા ભાડાના બંધ ફ્લેટમાંથી મળી આવ્યો હતો. મૃતદેહમાંથી ભારે દુર્ગંધ આવતાં સ્થાનિક લોકોએ પોલીસને જાણ કરી હતી. સ્થળ પર પહોંચી પોલીસે તપાસ શરૂ કરી છે. યુવતીનો મૃતદેહ નગ્ન હાલતમાં મળતા દુષ્કર્મ બાદ હત્યાની આશંકા વ્યક્ત કરવામાં આવી રહી છે, જોકે વાસ્તવિક કારણ જાણવા માટે પોલીસે વધુ તપાસ હાથ ધરી છે.

રાજકોટ જિલ્લાના ભાયાવદર તાલુકાના ઢાંક ગામે આવેલ Varahi Jewellersમાં સોની વેપારી સાથે ચાલાકીભરી છેતરપિંડીનો બનાવ સામે આવ્યો છે. ત્રણ મહિલાઓ ગ્રાહક બનીને દુકાનમાં આવી હતી અને વેપારીની નજર ચુકવીને સોનાની સાચી વસ્તુ લઈને તેના બદલે બોક્સમાં ખોટી વસ્તુ મૂકી ફરાર થઈ ગઈ હતી. ઘટનાની જાણ થતાં ભાયાવદર પોલીસે ઝડપી કાર્યવાહી કરીને બે મહિલાઓ અને બે પુરુષ સહિત કુલ ચાર આરોપીઓને ધરપકડ કરી છે. પોલીસ દ્વારા અંદાજે રૂપિયા 5,01,000ના મુદ્દામાલની પણ કબજેદારી કરવામાં આવી છે.

ઇરાન અને અમેરિકા વચ્ચે વધતા તણાવના કારણે વૈશ્વિક બજારમાં ક્રૂડ ઓઇલના ભાવમાં જોરદાર ઉછાળો જોવા મળ્યો છે. પ્રતિ બેરલ કિંમત 120 ડોલરને પાર પહોંચી ગઈ છે, જે છેલ્લા ચાર વર્ષના ઉચ્ચતમ સ્તર તરીકે નોંધાઈ રહી છે. અમેરિકાના પૂર્વ રાષ્ટ્રપતિ Donald Trumpની કડક ચેતવણી અને અમેરિકા દ્વારા સૈન્ય નાકાબંધી ચાલુ રાખવાની જાહેરાત બાદ બજારમાં અનિશ્ચિતતા વધી છે, જેના પરિણામે ક્રૂડના ભાવમાં વધુ તેજી જોવા મળી રહી છે.