24 માર્ચના મહત્વના સમાચાર : 14.2ના બદલે 10 કિલોનો સિલિન્ડર કરવાની માત્ર અફવા, પેટ્રોલિયમ મંત્રાલયે કહ્યું કે અફવાઓથી ડરવું નહીં

આમ આદમી પાર્ટી (AAP) દ્વારા સ્થાનિક સ્વરાજની ચૂંટણી માટે ઉમેદવારોની પ્રથમ યાદી જાહેર કરી દેવામાં આવી છે. ચૂંટણીની જાહેરાત પહેલાં જ AAPએ 460 ઉમેદવારોના નામની યાદી તૈયાર કરી હતી, જેમાં તાલુકા અને જિલ્લા પંચાયત માટે ઉમેદવારોના નામ સામેલ છે. પાલિકા અને મહાનગર પાલિકાની ચૂંટણી માટે પણ ઉમેદવારોની યાદી તૈયાર કરવામાં આવી છે. આ નિર્ણયો સ્કિનિંગ કમિટી અને કેન્દ્રીય નેતૃત્વની સહમતિથી લેવામાં આવ્યા છે. AAPના નેતા અરવિંદ કેજરીવાલના ગુજરાત પ્રવાસ દરમિયાન બીજી યાદી જાહેર કરવાની સંભાવના છે. પાર્ટીના નેતા ઈસુદાન દ્વારા જણાવ્યું કે, આ વખતે નેતાઓના દીકરાઓને નહીં, પરંતુ સામાન્ય જનતાને ટિકિટ આપવામાં આવશે અને “હવે સામાન્ય લોકોની રાજનીતિની શરૂઆત થશે.”

રાજકોટમાં પેટ્રોલ અંગે સરકાર દ્વારા અફરાતફરી ન મચાવવા કરવામાં આવેલી અપીલનો ખાસ અસરકારક પ્રભાવ જોવા મળ્યો નથી. બીજા દિવસે પણ શહેરના રૈયા સર્કલ, 150 ફૂટ રિંગ રોડ અને નાના મૌવા સહિતના વિસ્તારોમાં આવેલા પેટ્રોલ પંપ પર લાંબી લાઈનો લાગી હતી. કેટલીક જગ્યાએ હજીપણ પેટ્રોલ ઉપલબ્ધ ન હોવાની ફરિયાદો સામે આવી રહી છે. સરકારની અપીલ છતાં લોકોમાં ભયનો માહોલ યથાવત રહેતા પેટ્રોલ ભરાવવા માટે ભારે ભીડ અને અફરાતફરી જેવી સ્થિતિ સર્જાઈ રહી છે.

તાજેતરમાં LPG સિલિન્ડરનું વજન 14.2 કિલોથી ઘટાડીને 10 કિલો કરવામાં આવશે તેવી અફવાઓ સોશિયલ મીડિયા પર ફેલાઈ રહી હતી. આ મુદ્દે પેટ્રોલિયમ મંત્રાલયે સ્પષ્ટતા કરી છે કે આવી કોઈ યોજના નથી અને આ માત્ર અફવા છે. મંત્રાલયે જણાવ્યું કે હાલ જે 14.2 કિલોનું સિલિન્ડર આપવામાં આવે છે તેમાં કોઈ ફેરફાર કરવામાં આવશે નહીં. સાથે જ લોકોએ આવી ભ્રામક માહિતીથી ગેરમાર્ગે દોરાવું નહીં અને અફવાઓથી દૂર રહેવાની અપીલ પણ કરવામાં આવી છે.

વડોદરા નજીક દામાપુરા ગામ પાસે આવેલા પેટ્રોલ પંપ પર આજે નાના વાહનચાલકોમાં ભારે રોષ જોવા મળ્યો હતો. આરોપ મુજબ પંપ સંચાલકો મોટા વાહનો તેમજ ડ્રમ અને કેરેબામાં મોટી માત્રામાં પેટ્રોલ-ડિઝલ આપી રહ્યા છે, જેના કારણે સામાન્ય ટુ-વ્હિલર ચાલકોને ઇંધણ મળવામાં મુશ્કેલી પડી રહી છે. ડ્રમ અને કેરેબામાં ઇંધણ ભરાવવા પડાપડી થતાં પંપ પર જલ્દી ઇંધણ ખૂટી જવાની આશંકા વ્યક્ત થઈ રહી છે. આ પરિસ્થિતિને કારણે નાના વાહનચાલકોમાં અસંતોષ ફાટી નીકળ્યો છે અને નિયમોનો ભંગ કરીને બોટલ, ડ્રમ અને કેરેબામાં ઇંધણ આપવાનો આરોપ લગાવવામાં આવી રહ્યો છે.