21 ઓક્ટોબરના મહત્વના સમાચાર : 22 ઓક્ટોબર બાદ બંગાળની ખાડીમાં સર્જાઈ શકે વાવાઝોડું, અંબાલાલ પટેલની આગાહી

કેન્દ્રીય નાણાંપંચની ટીમ ત્રણ દિવસ માટે ગુજરાતની મુલાકાતે આવી છે. રાજ્ય સરકાર નાણાં પંચની ટીમ સમક્ષ રાજ્યની જરુરિયાત અંગે પ્રેઝન્ટેશન રજૂ કરશે. ગુજરાતની આર્થિક સ્થિતિ અને જરૂરિયાતો અંગે રજૂઆત કરાશે.

કેન્દ્રીય ગૃહમંત્રી અમિત શાહ  આવતીકાલે એક દિવસીય ગુજરાતની મુલાકાતે આવશે. સવારે 10 વાગે આણંદ ખાતે NDDB ડાયમંડ જ્યુબિલી કાર્યક્રમમાં તેઓ હાજરી આપશે. બપોર બાદ ગાંધીનગરના વિવિધ કાર્યક્રમમાં રહેશે ઉપસ્થિત. ગાંધીનગર ભાજપ કાર્યાલય કમલમ નું 2:30 વાગે ઉદ્ઘાટન કરાવશે.

વરસાદ અને વાવાઝોડાને લઇને હવામાન નિષ્ણાત અંબાલાલ પટેલે મોટી આગાહી કરી છે. 22 ઓક્ટોબર બાદ બંગાળની ખાડીમાં વાવાઝોડું સર્જાશે. વાવાઝોડાની અસરને પગલે ગુજરાતમાં માવઠાની શક્યતા છે. નવેમ્બરમાં પણ બંગાળની ખાડીમાં વધુ એક વાવાઝોડું સર્જાશે. વેસ્ટર્ન ડિસ્ટર્બન્સને પગલે રાજ્યમાં નવેમ્બરમાં પણ માવઠું થશે. રાજ્યમાં ડિસેમ્બરમાં માવઠા સાથે ઠંડીનો ચમકારો અનુભવાશે. 22 ડિસેમ્બર બાદ રાજ્યમાં ગાત્રો થિજવતી ઠંડી પડશે.

24 કલાકમાં રાજ્યના 69 તાલુકામાં વરસાદ વરસ્યો છે. અનેક તાલુકામાં પ્રચંડ ગાજવીજ સાથે વરસાદ વરસ્યો. સૌથી વધુ રાજકોટના લોધિકામાં 4.8 ઈંચ વરસાદ, મોરબીમાં 3.9 ઈંચ વરસાદ વરસ્યો છે. માળિયા હટિનામાં 3.5 ઈંચ વરસાદ,માણાવદરમાં પણ 3.3 ઈંચ વરસાદ, અમરેલીના કુંકવાડિયામાં 3 ઈંચ વરસાદ, 17 તાલુકામાં 1 ઈંચથી વધુ વરસાદ, પાછોતરા વરસાદથી ખેડૂતોના તૈયાર પાકને મોટા પ્રમાણમાં નુકસાનની ભીતિ છે.

ડ્રગ્સનું ઉત્પાદન કરતી વધુ એક કંપની ઝડપાઈ છે. ભરૂચના અંકલેશ્વરમાંથી વધુ એક ડ્ર્ગ્સ બનાવતી ફેક્ટરીનો પર્દાફાશ થયો. સુરત અને ભરૂચ SOGએ સંયુક્ત ઓપરેશન હાથ ધરી અંકલેશ્વર GIDCમાં અવસર એન્ટરપ્રાઈઝમાં દરોડા પાડ્યા હતા.  જ્યાં 250 કરોડ રૂપિયાના ડ્રગ્સનો જથ્થો સિઝ કરાયો.

અમદાવાદમાં ગાજવીજ સાથે વરસાદ વરસી રહ્યો છે. વીજળીના કડાકા ભડાકા સાથે માણેકબાગ, ગોતા, બોપલ, શેલામાં ભારે વરસાદ વરસ્યો. જીવરાજ પાર્ક, જોધપુર, વેજલપુર સહિતના વિસ્તારમાં વરસાદ વરસ્યો છે. SG હાઈવે, વૈષ્ણવ દેવી, કુબેરનગર સહિતના વિસ્તારોમાં વરસાદ વરસ્યો.