12 સપ્ટેમ્બરના મહત્વના સમાચાર : રાજ્યમાં ભારે વરસાદની આગાહી વચ્ચે અનેક જિલ્લાઓમાં મેઘ મહેર, 70થી વધુ તાલુકાઓમાં સાર્વત્રિક વરસાદ, મધ્ય ગુજરાત અને સૌરાષ્ટ્રમાં હળવાથી મધ્યમ વરસાદથી ખેડૂતોમાં ખુશી

વડોદરાના ડભોઈ શહેર સહિત તાલુકામાં લાંબા વિરામ બાદ ફરી મેઘમહેર થઈ છે. પવનના સુસવાટા અને ગાજવીજ સાથે વરસાદ વરસતા સમગ્ર પંથકમાં વરસાદી માહોલ જામ્યો છે. અસહ્ય ઉકળાટ બાદ વરસાદ વરસતા વાતાવરણમાં ઠંડક પ્રસરી છે. ધોધમાર વરસાદના કારણે અનેક વિસ્તારોમાં વિઝિબિલિટી ઘટી હતી. લાંબા સમયથી આકાશ સામે મીટ માંડીને બેઠેલા ખેડૂતોને વરસાદથી મોટી રાહત મળી છે. વરસાદના આગમનથી ખેતીના પાકને ફાયદો થવાની આશા વચ્ચે ખેડૂતોમાં ખુશીનો માહોલ જોવા મળી રહ્યો છે.

વડોદરાના કપુરાઈ પોલીસ સ્ટેશન હદ વિસ્તારમાં સ્ટેટ મોનિટરિંગ સેલે મોડી રાત્રે દરોડો પાડી વિદેશી દારૂનો મોટો જથ્થો ઝડપી પાડ્યો છે. SMCની ટીમે દરોડા દરમિયાન વિદેશી દારૂની 66 પેટીમાંથી કુલ 2,208 બોટલો કબજે કરી છે. દારૂ સહિત કુલ ₹17 લાખનો મુદ્દામાલ જપ્ત કરવામાં આવ્યો છે. દારૂની હેરાફેરીના મામલે પોલીસે એક શખ્સની ધરપકડ કરી છે. આરોપીની પૂછપરછ સહિત સમગ્ર મામલે વધુ તપાસ હાથ ધરવામાં આવી છે. પોલીસ તપાસમાં દારૂનો જથ્થો ક્યાંથી લાવવામાં આવ્યો હતો અને ક્યાં પહોંચાડવાનો હતો તે અંગે વધુ વિગતો સામે આવી શકે છે.

ગીર સોમનાથના ગીર ગઢડામાં લાંબા વિરામ બાદ ફરી વરસાદી માહોલ જામ્યો છે. ગીર જંગલ સહિતના ગ્રામ્ય વિસ્તારોમાં વરસાદી ઝાપટાં પડ્યાં છે. કાળા ડિબાંગ વાદળો અને પવનના સુસવાટા સાથે વરસાદ ખાબકતા વાતાવરણમાં ઠંડક પ્રસરી છે. લાંબા સમય બાદ વરસાદ થતાં ખેડૂતોમાં પણ રાહત જોવા મળી રહી છે. ખાસ કરીને કપાસના પાક માટે આ વરસાદ જીવનદાન સમાન સાબિત થાય તેવી ખેડૂતોને આશા છે. વરસાદથી પાકને ફાયદો થવાની શક્યતાને પગલે ખેડૂતોમાં ખુશીનો માહોલ જોવા મળી રહ્યો છે.

અમદાવાદમાં લાંબા સમયના વિરામ બાદ ફરી વરસાદી માહોલ જામ્યો છે. શહેરના પૂર્વ વિસ્તારમાં અનેક જગ્યાએ ધીમીધારે વરસાદ વરસી રહ્યો છે. ઈસનપુર, મણિનગર અને વટવા વિસ્તારમાં વરસાદી ઝાપટાં પડ્યાં છે. દાણીલીમડા અને નારોલ સહિતના વિસ્તારોમાં પણ વરસાદી જમાવટ જોવા મળી રહી છે. લાંબા વિરામ બાદ વરસાદ વરસતા વાતાવરણમાં ઠંડક પ્રસરી છે અને લોકોને ગરમી તથા ઉકળાટમાંથી રાહત મળી છે. શહેરના અન્ય વિસ્તારોમાં પણ આગામી સમયમાં વરસાદી માહોલ બને તેવી શક્યતા છે.

દેવભૂમિ દ્વારકાના ખંભાળિયામાં જળસંકટના ગંભીર એંધાણ વચ્ચે તંત્રનો ચોંકાવનારો પત્ર સામે આવ્યો છે. ખંભાળિયા શહેરને હવે નર્મદાનું પાણી નહીં મળે અને જામ ખંભાળિયા નગરપાલિકાને વૈકલ્પિક સોર્સનો ઉપયોગ કરવા સૂચના અપાઈ છે. 66 ગામોને પાણી પહોંચાડવા નર્મદાના પાણીની વ્યવસ્થામાં ફેરફાર કરાયો છે. નર્મદાનું પાણી બંધ થતાં ખંભાળિયામાં પાણી વ્યવસ્થાનો મોટો પડકાર ઉભો થયો છે. ત્રણ દિવસે મળતું પાણી હવે ચારથી પાંચ દિવસે મળે તેવી શક્યતા છે. ખંભાળિયાનો મુખ્ય સોર્સ ઘી ડેમ પણ ખાલીખમ થવાના આરે છે. ઘી ડેમમાં સૌની યોજનાનું પાણી છોડાવવા સિંચાઈ વિભાગને જાણ કરવા સૂચના અપાઈ છે. ડેડ સ્ટોરેજમાંથી પાણી મેળવવા નવા સોર્સ ઊભા કરવા તેમજ હયાત કૂવામાંથી ગાળ કાઢી પાણી મેળવવા તાકીદ કરાઈ છે. નવા બોર અને કૂવા બનાવવાની કામગીરી સત્વરે હાથ ધરવા પણ આદેશ અપાયો છે.

રાજકોટમાં વરસાદ ખેંચાતા જળસંકટના એંધાણ જોવા મળી રહ્યા છે. શહેરના આજી અને ન્યારી ડેમમાં પાણીનો જથ્થો ઘટી રહ્યો છે. હાલ ડેમમાં રાજકોટ શહેર માટે માત્ર એક મહિનો ચાલે તેટલો જ પાણીનો જથ્થો ઉપલબ્ધ હોવાનું સામે આવ્યું છે. જેને પગલે રાજકોટ મહાનગરપાલિકાએ પાણીના જથ્થાની માગણી કરી છે. મેયરે પાણી પુરવઠા પ્રધાન અને કૃષિ મંત્રીને પત્ર લખીને રજૂઆત કરી છે. રાજકોટ માટે 47 કરોડ લીટર પાણીનો જથ્થો ફાળવવાની માગ કરવામાં આવી છે. વરસાદ ખેંચાતા આગામી દિવસોમાં શહેરમાં પાણીની સ્થિતિ વધુ વિકટ ન બને તે માટે તંત્ર દ્વારા આગોતરું આયોજન કરવામાં આવી રહ્યું છે.

સુરતમાં ડાયમંડ કિંગ ગોવિંદ ધોળકિયાના પુત્ર સાથે ₹76.44 લાખની ઠગાઈનો મામલો સામે આવ્યો છે. જમીન ખરીદી માટે જરૂરી ઈ-સ્ટેમ્પના નામે આ ઠગાઈ આચરવામાં આવી હોવાની ફરિયાદ નોંધાઈ છે. શ્રેયાંશ ધોળકિયા વતી તેમના મેનેજરે સમગ્ર મામલે ફરિયાદ નોંધાવી છે. ફરિયાદ મુજબ, ઈ-સ્ટેમ્પ વેન્ડર અને તેની પત્નીએ વિશ્વાસમાં લઈને નાણાં મેળવ્યા હતા. જોકે, નાણાં લીધા બાદ ઈ-સ્ટેમ્પ ન આપીને દંપતીએ વિશ્વાસઘાત કર્યો હોવાનો આક્ષેપ છે. ફરિયાદના આધારે ક્રાઈમ બ્રાન્ચે આરોપી દંપતીને ઝડપી પાડ્યું છે અને સમગ્ર મામલે વધુ તપાસ શરૂ કરી છે.

અમદાવાદના કૃષ્ણનગર વિસ્તારમાં જાહેર રોડ પર બર્થડે પાર્ટી યોજાઈ હોવાનો વીડિયો સોશિયલ મીડિયામાં વાયરલ થયો છે. મેવાડા પાર્ટી પ્લોટ સામે જાહેર માર્ગ પર હોમગાર્ડ જવાનના સગીર પુત્રની બર્થડે પાર્ટી યોજાઈ હોવાની માહિતી છે. વાયરલ વીડિયોમાં બ્લેક કાચ અને નંબર પ્લેટ વગરની ગાડીઓ સાથે ઉજવણી થતી જોવા મળી રહી છે. જાહેર રોડ પર કેકની લાઈન લગાવી બર્થડે સેલિબ્રેશન કરવામાં આવ્યું હતું. આ ઉપરાંત જાહેરમાં ફટાકડા ફોડી દહેશત ફેલાવ્યાનો પણ વીડિયો સામે આવ્યો છે. વાયરલ વીડિયો મામલે કૃષ્ણનગર પોલીસે તપાસ શરૂ કરી છે. પોલીસ દ્વારા વીડિયો અને સમગ્ર ઘટનાની હકીકત અંગે તપાસ હાથ ધરવામાં આવી રહી છે.

જુનાગઢ જિલ્લામાં વરસાદની અછત વચ્ચે સૌરાષ્ટ્ર-સોરઠના જળાશયો ભરવા સરકાર દ્વારા ખાસ આયોજન કરવામાં આવ્યું છે. સૌની યોજના હેઠળ જૂનાગઢ અને ગીર સોમનાથ જિલ્લાના 9 ડેમોમાં નર્મદાનું પાણી પહોંચાડવામાં આવશે. પીવાના પાણીને પ્રાથમિકતા આપીને ડેમો ભરવાની કામગીરી હાથ ધરાશે. 29 ઓગસ્ટથી ઓઝત-2 ડેમમાં નર્મદાનું પાણી ઠાલવવાનું શરૂ કરવામાં આવ્યું છે. વ્રજમી ડેમમાં પણ પીવાનું પાણી પહોંચાડવાનું આયોજન છે. આણંદપુર ડેમની પાણીની જરૂરિયાત પણ ઓઝત-2થી પૂરી કરવામાં આવશે. ઓઝત-2ના ગેટ ખોલીને નદીના વહેણ મારફતે આણંદપુર સુધી પાણી પહોંચાડવામાં આવશે.

મોરબીમાં ખાનગી સ્કૂલ બસના ડ્રાઇવરની બેદરકારી સામે આવી છે. ન્યૂ એરા ગ્લોબલ સ્કૂલની બસના ડ્રાઇવરે નશાની હાલતમાં બસ હંકારી અકસ્માત સર્જ્યો હોવાનો આક્ષેપ છે. બાપા સીતારામ ચોક પાસે નરસંગ મંદિર નજીક અકસ્માતની ઘટના બની હતી. અકસ્માત બાદ સ્થાનિકોએ બસના ડ્રાઇવરને મેથીપાક ચખાડ્યો હતો. બનાવની જાણ થતાં 112ની ટીમ ઘટનાસ્થળે પહોંચી હતી. 112ની ટીમે બસ ડ્રાઇવરને પોલીસ મથકે લઈ જઈ વધુ કાર્યવાહી શરૂ કરી છે. ઘટનાને પગલે સ્કૂલ બસમાં વિદ્યાર્થીઓની સુરક્ષાને લઈને પણ સવાલો ઊભા થયા છે. પોલીસે સમગ્ર મામલે તપાસ હાથ ધરી છે.

ડાંગના થોરપાડા ગામે તળાવમાં ડૂબી 62 વર્ષીય વૃદ્ધનું મોત થયું છે. 10 સપ્ટેમ્બરે બપોરના સમયે વૃદ્ધ બળદને નવડાવવા માટે તળાવમાં ગયા હતા. આ દરમિયાન અચાનક પગ લપસતાં તેઓ તળાવના પાણીમાં ડૂબી ગયા હતા. ઘટનાની જાણ થતાં સ્થાનિકો અને બચાવ ટીમ દ્વારા વૃદ્ધની શોધખોળ શરૂ કરવામાં આવી હતી. SDRFની ટીમે પણ તળાવમાં સઘન શોધખોળ હાથ ધરી હતી. બે દિવસ સુધી સતત શોધખોળ કર્યા બાદ આખરે વૃદ્ધનો મૃતદેહ તળાવમાંથી મળી આવ્યો હતો. મૃતદેહને બહાર કાઢી પોસ્ટમોર્ટમ માટે મોકલી આપવામાં આવ્યો છે. ઘટનાને પગલે પરિવારમાં શોકનો માહોલ છવાયો છે.

જામનગરના બેડેશ્વર આઝાદ ચોક વિસ્તારમાં ફરી જૂથ અથડામણની ઘટના સામે આવી છે. ઘર બહાર બેઠેલા 23 વર્ષીય યુવાન સાથે બોલાચાલી બાદ ચાર શખ્સોએ હુમલો કર્યો હોવાની ફરિયાદ નોંધાઈ છે. ફરિયાદ મુજબ, બોલાચાલી બાદ ચારેય શખ્સોએ યુવાન સાથે ઝપાઝપી કરી ઢીકાપાટુનો માર માર્યો હતો. હુમલા દરમિયાન યુવાન નીચે પટકાતા તેને ઈજા પહોંચી હતી. સમગ્ર ઘટનાને પગલે વિસ્તારમાં ચકચાર મચી છે. બીજી તરફ, હુમલાની સમગ્ર ઘટનાનો વીડિયો સોશિયલ મીડિયા પર વાયરલ થયો છે. બનાવ અંગે પોલીસે ફરિયાદના આધારે વધુ તપાસ હાથ ધરી છે.

સુરતના વરાછા વિસ્તારમાં ધોરણ-5માં ભણતી બાળકીએ આપઘાત કરતાં ચકચાર મચી છે. માતા-પિતા કામ માટે બહાર ગયા હતા ત્યારે માસૂમે ઘરે જ ગળેફાંસો ખાઈ જીવન ટૂંકાવ્યું હતું. માતા-પિતાની ગેરહાજરીમાં મૃતક બાળકી સહિત ચારેય બાળકો ઘરે એકલા હતા. સાંજના સમયે માતા ઘરે પરત ફર્યા ત્યારે ઘરનો દરવાજો અંદરથી બંધ હતો. પાડોશીઓએ દરવાજો તોડીને અંદર પ્રવેશ કરતાં સમગ્ર ઘટનાની જાણ થઈ હતી. ત્યારબાદ પોલીસને જાણ કરવામાં આવી હતી. પોલીસે મૃતદેહને પોસ્ટમોર્ટમ માટે મોકલી વધુ તપાસ હાથ ધરી છે. જોકે, બાળકીએ કયા કારણોસર આ પગલું ભર્યું તેનું કારણ હજુ અકબંધ છે.

નવી દિલ્હીમાં ચાલી રહેલા BRICS શિખર સંમેલન વચ્ચે દુનિયાભરની નજર ભારત અને ચીનના સંબંધો પર ટકેલી છે. ચીનના રાષ્ટ્રપતિ શી જિનપિંગ પૂરા 7 વર્ષ બાદ ભારત આવી પહોંચ્યા છે… ત્યારે પીએમ મોદી અને શી જિનપિંગ વચ્ચેની દ્વિપક્ષીય બેઠક બંને દેશોના ભવિષ્યના સંબંધોની દિશા નક્કી કરી શકે. સૌથી મોટો સવાલ એ છે કે શું આ મુલાકાતથી બંને દેશોના બરફ પીગળશે? રાજદ્વારી સૂત્રોના જણાવ્યા અનુસાર, આ બેઠકમાં સૌથી સંવેદનશીલ મુદ્દો વાસ્તવિક નિયંત્રણ રેખા એટલે કે LAC પર સ્થિરતા અને શાંતિનો રહેશે. ભારતનું વલણ બિલકુલ સ્પષ્ટ છે સરહદ પર શાંતિ વગર સંબંધો સામાન્ય થઈ શકે નહીં. આર્થિક મોરચે ભારતની સૌથી મોટી ચિંતા ચીન સાથેનો વધતો વ્યાપાર ખાધ છે. ભારત અને ચીન વચ્ચેનો વ્યાપાર 151 અબજ ડૉલરને પાર કરી ગયો છે, જેમાં ભારતની ખાધ એકલા હાથે 112 અબજ ડૉલર છે. ભારત ચીન સમક્ષ પોતાના ઉત્પાદનો માટે મોટું માર્કેટ માંગવાની સાથે નિકાસ વધારવા અને વેપાર અસંતુલન ઘટાડવા દબાણ કરી શકે છે.આ બેઠકમાં માત્ર સરહદ કે વેપાર જ નહીં, પરંતુ સીધી ઉડાનો, વિઝા સુવિધા અને કૈલાશ માનસરોવર યાત્રા ફરી શરૂ કરવા જેવા સામાન્ય જનતા સાથે જોડાયેલા મુદ્દાઓ પર પણ પ્રગતિ થવાની પૂરી આશા છે.

ગાંધીનગર કોર્ટ અને સચિવાલયને બોમ્બથી ઉડાવી દેવાની ધમકી મળવાના મામલે સાયબર એક્સેલન્સની ટીમે એક આરોપીની ધરપકડ કરી છે. પોલીસે ઝારખંડના દેવઘરથી આરોપીને ઝડપી પાડ્યો છે. તપાસમાં સામે આવ્યું છે કે BRICS સંમેલનના આયોજન દરમિયાન અન્ય દેશોમાં પણ આરોપીએ બોમ્બની ધમકી આપી હતી. ભારતને સહકાર આપનારા દેશોને પણ બોમ્બની ધમકી આપવામાં આવી હોવાની માહિતી મળી છે. સમગ્ર મામલે સાયબર એક્સેલન્સની ટીમે સઘન તપાસ હાથ ધરી આરોપી સુધી પહોંચવામાં સફળતા મેળવી છે. હવે આરોપીની પૂછપરછમાં ધમકી પાછળનો હેતુ અને સમગ્ર નેટવર્ક અંગે વધુ મહત્વના ખુલાસા થવાની શક્યતા છે.

વરસાદની ઘટનો સામનો કરી રહેલા સૌરાષ્ટ્રમાં આગામી દિવસોમાં મેઘમહેર થવાની શક્યતા છે. હવામાન નિષ્ણાત અંબાલાલ પટેલે સૌરાષ્ટ્ર, કચ્છ અને ઉત્તર ગુજરાતમાં સારા વરસાદની આગાહી કરી છે. 14 સપ્ટેમ્બર સુધી રાજ્યના અનેક વિસ્તારોમાં ભારેથી અતિભારે વરસાદ પડી શકે છે. દક્ષિણ ગુજરાત અને દક્ષિણ સૌરાષ્ટ્રમાં પણ મેઘમહેરની શક્યતા વ્યક્ત કરવામાં આવી છે. અમદાવાદમાં હળવાથી મધ્યમ અને કેટલાક વિસ્તારોમાં ભારે વરસાદ પડી શકે છે, જ્યારે ગાંધીનગરમાં વરસાદી ઝાપટાંની આગાહી છે. દક્ષિણ ગુજરાતમાં 6 ઈંચ કે તેથી વધુ વરસાદની શક્યતા છે. સૌરાષ્ટ્રમાં ત્રણ ઈંચથી વધુ વરસાદ થતાં પાકને ફાયદો થઈ શકે છે. અરબી સમુદ્રમાં સિસ્ટમ સક્રિય થતાં વરસાદના એંધાણ છે. આગામી ઓક્ટોબરથી ડિસેમ્બર દરમિયાન બંગાળની ખાડીમાં ચક્રવાતની શક્યતા પણ વ્યક્ત કરાઈ છે.

બનાસકાંઠાના અંબાજી પંથકમાં બપોર બાદ વરસાદી માહોલ જામ્યો છે. બપોર બાદ ધીમીધારે વરસાદની શરૂઆત થતાં વાતાવરણમાં ઠંડક પ્રસરી છે. લાંબા સમય બાદ વરસાદ વરસતા પંથકના ખેડૂતોમાં ખુશીનો માહોલ જોવા મળી રહ્યો છે. વરસાદને કારણે ખેતીના પાકને જીવનદાન મળવાની આશા ખેડૂતોમાં જાગી છે. ખેડૂતો માટે આ વરસાદ રાહતરૂપ બન્યો છે.

પંચમહાલના હાલોલ અને પાવાગઢ પંથકમાં ધોધમાર વરસાદ વરસી રહ્યો છે. ભારે પવન અને વીજળીના કડાકા-ભડાકા સાથે વરસાદ પડતા સમગ્ર વિસ્તારમાં વરસાદી માહોલ જામ્યો છે. ધોધમાર વરસાદને પગલે પાવાગઢ રોડ પર પાણી ભરાયા છે. જ્યારે હાલોલ બસ સ્ટેન્ડ રોડ પર પણ ઘૂંટણસમા પાણી ભરાતા વાહનચાલકોને મુશ્કેલી પડી રહી છે. પાવાગઢ ખાતે પગથિયાં પરથી વરસાદી પાણી વહેતાં જોવા મળ્યાં છે. સતત વરસી રહેલા વરસાદને કારણે ખેડૂતોમાં રાહતનો માહોલ છે. વરસાદથી ખેતીને ફાયદો થવાની આશા ખેડૂતોમાં જાગી છે.

સુરેન્દ્રનગરના પાટડીમાં ગૌહત્યાના આરોપોને પગલે તંત્રએ મોટી કાર્યવાહી કરી છે. હિન્દુ સમાજના લોકોની લાગણી દુભાતા વિરોધ રેલી યોજાઈ હતી. ત્યારબાદ તંત્રએ ગેરકાયદેસર કતલખાના અને નોનવેજની દુકાનો પર બુલડોઝર ફેરવી ધ્વસ્ત કરી હતી. પોલીસ બંદોબસ્ત અને મામલતદારની હાજરીમાં સમગ્ર કાર્યવાહી હાથ ધરવામાં આવી હતી. બીજી તરફ, પોલીસે ગૌહત્યાના કેસમાં એક મહિલા સહિત સાત લોકોને ઝડપી પાડ્યા છે. સમગ્ર મામલે પોલીસે વધુ તપાસ હાથ ધરી છે. કાર્યવાહી બાદ વિસ્તારમાં ચકચાર મચી છે. તંત્રની કામગીરીને પગલે ગેરકાયદે ધંધો કરતા લોકોમાં ફફડાટ ફેલાયો છે.

ગાંધીનગર મનપા ચૂંટણીને લઈને મોટા સમાચાર સામે આવ્યા છે. આગામી 14 અથવા 15 સપ્ટેમ્બરે ચૂંટણીની જાહેરાત થવાની શક્યતા છે. 14 સપ્ટેમ્બરે મતદારયાદીની આખરી પ્રસિદ્ધિ કરવામાં આવશે. ત્યારબાદ ચૂંટણી પ્રક્રિયાને લઈને મહત્વની જાહેરાત થઈ શકે છે. સૂત્રોના જણાવ્યા અનુસાર, 11 ઓક્ટોબરે ગાંધીનગર મહાનગરપાલિકાની ચૂંટણી માટે મતદાન યોજાવાની સંભાવના છે. સંભવિત રીતે 20થી 25 દિવસમાં સમગ્ર ચૂંટણી પ્રક્રિયા પૂર્ણ થઈ શકે છે. ચૂંટણીની જાહેરાતની શક્યતાને પગલે ગાંધીનગરમાં રાજકીય ગતિવિધિઓ તેજ થવાની સંભાવના છે. વિવિધ રાજકીય પક્ષો દ્વારા ચૂંટણીને લઈને તૈયારીઓ શરૂ કરવામાં આવી શકે છે.

ભારતની યજમાની હેઠળ નવી દિલ્હીના ભારત મંડપમમાં 18મા BRICS શિખર સંમેલનની શરૂઆત થઈ છે. બે દિવસીય સંમેલનમાં BRICSના સભ્ય દેશો અને ભાગીદાર દેશોના નેતાઓ ભાગ લઈ રહ્યા છે. આ ઉપરાંત આઉટરીચ માટે આમંત્રિત દેશોના પ્રતિનિધિઓ પણ સંમેલનમાં સામેલ થયા છે. ભારતની BRICS અધ્યક્ષતાની આ વર્ષની થીમ ‘બિલ્ડિંગ ફોર રેઝિલિયન્સ, ઈનોવેશન, કોઓપરેશન એન્ડ સસ્ટેનેબિલિટી’ છે, જે વડાપ્રધાન નરેન્દ્ર મોદીના ‘હ્યુમેનિટી ફર્સ્ટ’ના વિચાર પર આધારિત છે. સંમેલનમાં BRICS દેશો વચ્ચે સહયોગ મજબૂત કરવા અને વૈશ્વિક તથા પ્રાદેશિક મુદ્દાઓ પર ચર્ચા થશે. ભારતની અધ્યક્ષતા હેઠળ 25થી વધુ શહેરોમાં 350થી વધુ બેઠકો અને ઉચ્ચસ્તરીય કાર્યક્રમો યોજાઈ ચૂક્યા છે. હવે શિખર સંમેલનમાં વ્યવહારુ અને વિકાસલક્ષી પરિણામો સાથે સહયોગ આગળ વધારવા પર ભાર રહેશે.

વડાપ્રધાન નરેન્દ્ર મોદીએ BRICS સંમેલનમાં ગ્લોબલ સાઉથને રુલ ટેકર નહીં, પરંતુ રુલ શેપર બનાવવાની જરૂરિયાત પર ભાર મૂક્યો. તેમણે કહ્યું કે આર્ટિફિશિયલ ઈન્ટેલિજન્સ, સાયબર સ્પેસ, અંતરિક્ષ, બાયોટેક્નોલોજી અને અન્ય મહત્ત્વપૂર્ણ ટેક્નોલોજી ક્ષેત્રો ભવિષ્યના વૈશ્વિક નિયમો નક્કી કરી રહ્યાં છે. આવી સ્થિતિમાં ગ્લોબલ સાઉથની સમાન ભાગીદારી જરૂરી છે. PM મોદીએ BRICSના માધ્યમથી યુવા રાજદ્વારીઓ અને નીતિ ઘડવૈયાઓને વાટાઘાટોની કુશળતા, પ્રાયોગિક તાલીમ અને કાયદાકીય નિષ્ણાત જ્ઞાન આપવાનો પ્રસ્તાવ મૂક્યો. તેમણે કહ્યું કે જો આપણું ભવિષ્ય સહિયારું છે, તો તેના નિર્માણનો અધિકાર પણ સહિયારો હોવો જોઈએ. ભારત આ દિશામાં નેતૃત્વ કરવા તૈયાર છે.

વડાપ્રધાન નરેન્દ્ર મોદીએ વૈશ્વિક આર્થિક ગવર્નન્સમાં બદલાતી આર્થિક વાસ્તવિકતાઓને અનુરૂપ સુધારાની જરૂરિયાત પર ભાર મૂક્યો. તેમણે કહ્યું કે નાણાકીય સંસ્થાઓમાં મતાધિકાર, નેતૃત્વની ભૂમિકા અને નીતિની પ્રાથમિકતાઓ આજની આર્થિક હકીકત પ્રમાણે હોવી જોઈએ. વૈશ્વિક આર્થિક વૃદ્ધિને વેગ આપતા દેશોને નિર્ણય પ્રક્રિયામાં યોગ્ય સ્થાન મળવું જરૂરી છે. મોદીએ જણાવ્યું કે વૈશ્વિક સંસ્થાઓ લોકોનો વિશ્વાસ ત્યારે જ જીતી શકશે, જ્યારે તેઓ સમસ્યાઓનો ઝડપી અને અસરકારક ઉકેલ આપશે. તેમણે સામૂહિક પ્રતિસાદની ઝડપ, વ્યાપ અને અંતિમ સ્તરે અસર પર ધ્યાન આપવા અપીલ કરી. ઉપરાંત, સમુદ્રી કર્મચારીઓ માટે ઇમરજન્સી સપોર્ટ નેટવર્ક બનાવવાનો પ્રસ્તાવ પણ તેમણે રજૂ કર્યો.

વડાપ્રધાન મોદીએ કહ્યુ કે દરેક પ્રયાસના કેન્દ્રમાં માનવતા નો વિકાસ થવો જોઈએ, આ જ ઉદ્દેશ્ય સાથે તેમણે પ્રસ્તાવ રાખ્યો કે બ્રિક્સ દેશો મળીને ગ્લોબલ ગવર્નેન્સ રિફોર્મ માટે 10 પ્રસ્તાવ તૈયાર કરે અને આગામી સમિટ સુધી તેને બ્રિક્સ રિફોર્મ રોડમેપનું રૂપ આપવાનો પ્રયાસ કરવામાં આવે.

PM મોદીએ કહ્યુ આ રોડમેપ માં ત્રણ પહેલુઓ રિપ્રેઝન્ટેશન, રિસ્પોન્સિવનેસ અને રૂલ મેકિંગ પર ખાસ ધ્યાન દેવુ પડશે. પીએમ મોદીએ કહ્યુ કે સંયુક્ત રાષ્ટ્ર સુરક્ષા પરિષદમાં સુધાર હવે વધુ નહીં ટાળી શકાય. આ મુદ્દા પર ટેક્સ્ટ બેઝ્ડ નેગોશિએશન્સ ને નક્કી કરેલી સમય મર્યાદા અને સ્પષ્ટ પરિણામો સાથે જોડવુ પડશે.

PM મોદીએ કહ્યુ બ્રિક્સ ને મજબુત કરવા આપણે ગ્લોબલ રિફોર્મની દિશા નક્કી કરવી પડશે. ગ્લોબલ ગવર્નેન્સ નુ વર્તમાન માળખુ એક પિરામીડ જેવુ દેખાય છે. તેના ઉપરી હિસ્સામાં તાકાત અને નિર્ણય લેવાની શક્તિ કેન્દ્રીત છે. જ્યારે નીચેના હિસ્સામાં એ દેશો છે જે આ નિર્ણયોથી પ્રભાવિત થાય છે. પરંતુ તેને આકાર દેવાની ભૂમિકા સીમિત છે.

તેમણે કહ્યુ કે ગ્લોબલ સાઉથ આજે વૈશ્વિક સંકટોની ઉપલી હરોળમાં છે. પરંતુ નિર્ણયો લેવાની પ્રક્રિયામાં પાછળ છે. આપણે તેને પિરામિડ પ્રિવિલેજ પ્લેટફોર્મની પાર્ટનરશિપ ના પ્લેટફોર્મમાં બદલવુ પડશે. જ્યાં દરેક દેશની અવાજ અને દરેક સદસ્યની હિસ્સેદારી હોય.

વડાપ્રધાન મોદીએ કહ્યુ કે તેઓ બ્રિક્સ કોમ્યુનિટી કન્ટીન્યુટી એન્ડ ઈમ્પલીમેન્ટેશન મિકેનિઝમનો પ્રસ્તાવ રાખે છે. તે અંતર્ગત ટ્રોયકા દ્વારા તમામ પહેલ અને પરિણામોનું ફોલોઅપ કરી શકાશે. તેમણે કહ્યુ કે એક સુરક્ષિત ડિજિટલ રિપોઝિટરી બનાવી શકાય છે. જેમા દરેક નિર્ણય સાથે નોડલ પોઈન્ટ, સમય મર્યાદા અને તેને લાગુ કરવાની સ્થિતિ નોંધી શકાય છે.

ભારત મંડપમમાં વડાપ્રધાન નરેન્દ્ર મોદીના સંબોધન સાથે BRICS સમિટનો સત્તાવાર રીતે પ્રારંભ થઈ ગયો છે. વડાપ્રધાન નરેન્દ્ર મોદીએ તેમના સંબોધનમાં આગામી 20 વર્ષ માટે નવા અને મહત્વાકાંક્ષી એજન્ડા પર કામ કરવાનો પ્રસ્તાવ રાખ્યો. PM મોદીએ બ્રિક્સ નેતાઓને સંબોધિત કરતા કહ્યુ કે આપણે વૈશ્વિક મંચ પર પોતાના કામને નક્કર પરિણામોમાં બદલવુ પડશે. આગામી 20 વર્ષ માટે આપણે એક નવા અને મહત્વાકાંક્ષ એજન્ડા પર કામ કરવુ પડશશે. તેની શરૂઆત આપણે કામ કરવાથી કરવાની રહેસે. બ્રિક્સની અધ્યક્ષતા દર વર્ષે બદલાય છે. પરંતુ તેની સંસ્થાગત ગતિ ન અટકવી જોઈએ.

પંચમહાલના ઘોઘંબા તાલુકાના પૂર્વ વિસ્તારમાં વરસાદી માહોલ છવાયો છે. ગાજવીજ સાથે મેઘરાજાએ ધમાકેદાર આગમન કરતાં લાંબા સમયથી વરસાદની રાહ જોઈ રહેલા ખેડૂતોમાં ખુશીની લાગણી જોવા મળી રહી છે. ખેડૂતો ચાતક નજરે વરસાદની રાહ જોઈ રહ્યા હતા, ત્યારે વરસાદ વરસતા ખેતીના પાકને પણ જીવનદાન મળવાની આશા જાગી છે. અચાનક વરસાદી માહોલ જામતાં વાતાવરણમાં ઠંડક પ્રસરી છે અને ગરમીથી પણ લોકોને રાહત મળી છે.

ન્યૂઝ એજન્સી રોઈટર્સે દાવો કર્યો છે કે બ્રિક્સ સમૂહ એક સામાન્ય મેનિફેસ્ટો પર સહમત છે. BRICS દેશોનો સમૂહ એક સામાન્ય ઘોષણા પર સહમત થતો જણાય છે. જો કે, કોઈપણ દેશનું નામ લીધા વિના, તે કોઈપણ દેશ દ્વારા એકપક્ષીય યુદ્ધની નિંદા કરશે. માનવામાં આવે છે કે આ દેશોના નેતાઓ શનિવારે આ મેનિફેસ્ટોને મંજૂરી આપશે.

મહેસાણાની શૈલજા હોમ-2 સોસાયટીમાં મધરાતે ચડ્ડી બનીયાનધારી શખ્સો આંટાફેરા કરતા હોવાની ઘટના સામે આવી છે. મળતી માહિતી મુજબ, રાત્રે 3થી 4 વાગ્યાના સમયગાળા દરમિયાન ટોળકીના કેટલાક શખ્સો સોસાયટીમાં ફરતા જોવા મળ્યા હતા. શખ્સોએ ચોરીનો પ્રયાસ કર્યો ન હતો, પરંતુ કેટલાક વાયરો કાપ્યા હોવાનું સામે આવ્યું છે. સોસાયટીમાં કોઈ ચોરી ન થતાં હાલ સમગ્ર મામલે પોલીસ ફરિયાદ નોંધાઈ નથી. જોકે, મધરાતે શંકાસ્પદ શખ્સોની અવરજવરથી સોસાયટીના રહિશોમાં ચિંતા ફેલાઈ છે અને સુરક્ષાને લઈને સવાલો ઉઠ્યા છે.

રાષ્ટ્રપતિ દ્રૌપદી મુર્મુએ રાષ્ટ્રપતિ ભવનમાં ઈરાનના રાષ્ટ્રપતિ મસૂદ પેઝેશ્કિયન સાથે મુલાકાત કરી. પેજેશકિયન બ્રિક્સ સમિટમાં ભાગ લેવા ભારતની મુલાકાતે છે.

અંબાજીમાં ભાદરવી પૂનમના મેળાને લઈને મંદિર ટ્રસ્ટ દ્વારા યાત્રિકોના હિતમાં મોટો નિર્ણય લેવામાં આવ્યો છે. મેળા દરમિયાન અંબાજી આવતા તમામ યાત્રિકોને સરળતાથી દર્શનનો લાભ મળી રહે તે માટે મંદિરના દર્શનના સમયમાં વધારો કરવામાં આવ્યો છે. હવે સવારની આરતી 7:30 વાગ્યાના બદલે વહેલી સવારે 6:00 વાગ્યે કરવામાં આવશે અને મંદિર રાત્રે 12:00 વાગ્યા સુધી ખુલ્લું રહેશે. જોકે, મેળા દરમિયાન મંદિરની યજ્ઞશાળામાં યાત્રિકો હવન કરી શકશે નહીં. આ ઉપરાંત મંદિરમાં અન્નકૂટ પણ ધરાવી શકાશે નહીં. ભાદરવી પૂનમના મેળા દરમિયાન મોટી સંખ્યામાં યાત્રિકો અંબાજી પહોંચતા હોવાથી દર્શન વ્યવસ્થા સરળ રહે તે માટે આ નિર્ણય લેવામાં આવ્યો છે.

ગાંધીનગરમાં ટ્રાફિકની સમસ્યા હળવી કરવા મુખ્યમંત્રી ભૂપેન્દ્ર પટેલે મોટી જાહેરાત કરી છે. કોટેસ્વર ક્રોસિંગ પર અંડરપાસના કામને લીલીઝંડી આપવામાં આવી છે. અંડરપાસના નિર્માણ માટે રાજ્ય સરકાર દ્વારા રૂ.20.76 કરોડની ફાળવણી કરવામાં આવી છે. આ અંડરપાસ બનવાથી ગાંધીનગર અને આસપાસના બે જિલ્લાના લાખો વાહનચાલકોને સીધો લાભ થશે. ખાસ કરીને કોબા અને એરપોર્ટ તરફના માર્ગ પર સતત સર્જાતા ટ્રાફિકના ભારણમાં ઘટાડો થવાની શક્યતા છે. અંડરપાસના કારણે વાહનચાલકોને સરળ અને ઝડપી અવરજવર મળી રહેશે, સાથે જ ક્રોસિંગ પર ટ્રાફિક વ્યવસ્થા પણ વધુ સુગમ બનશે.

કચ્છના ગાંધીધામ હાઇવે પર સ્મશાન પુલિયા નજીક ટ્રેલર અને પિકઅપ બોલેરો વચ્ચે ગમખ્વાર અકસ્માત સર્જાયો છે. અકસ્માતમાં બોલેરોમાં સવાર એક વ્યક્તિનું ઘટનાસ્થળે જ મોત થયું હતું, જ્યારે અન્ય7 લોકો ઈજાગ્રસ્ત થયા છે. અકસ્માત સમયે બોલેરોમાં કુલ 8 કામદારો સવાર હોવાનું સામે આવ્યું છે. અકસ્માત બાદ આસપાસના લોકો અને તંત્રની મદદથી ઈજાગ્રસ્તોને તાત્કાલિક સારવાર માટે હોસ્પિટલ ખસેડવામાં આવ્યા હતા. ઘટનાને પગલે પોલીસે સ્થળ પર પહોંચી અકસ્માત અંગે વધુ તપાસ હાથ ધરી છે.

ગુજરાત કોંગ્રેસના નવા પ્રભારી બન્યા બાદ રણદીપ સૂરજેવાલા પ્રથમ વખત અમદાવાદની મુલાકાતે આવ્યા છે. અમદાવાદ પહોંચેલા સૂરજેવાલાએ ગુજરાતને બાપુ અને સરદાર પટેલની ભૂમિ ગણાવી હતી. તેમણે કહ્યું કે કોંગ્રેસ માટે ગુજરાત માત્ર એક પ્રાંત નહીં, પરંતુ પ્રેરણાસ્ત્રોત છે. સૂરજેવાલાએ ગુજરાત કોંગ્રેસના કાર્યકરો સાથે મુલાકાત કરી સંગઠનને વધુ મજબૂત બનાવવાનો સંદેશ આપ્યો હતો. તેમણે જણાવ્યું કે કાર્યકરો સાથે મળીને ગુજરાતનો માર્ગ સશક્ત કરવામાં આવશે. આગામી સમયમાં સંગઠનને વધુ મજબૂત બનાવવા અને કાર્યકરોને એકજૂથ કરી જનતા વચ્ચે કોંગ્રેસનો પક્ષ મજબૂત રીતે રજૂ કરવા પર ભાર મૂકવામાં આવશે.

ચીનના રાષ્ટ્રપતિ શી જિનપિંગ 7 વર્ષ બાદ ભારતની મુલાકાતે પહોંચ્યા છે. શી જિનપિંગનું દિલ્હીના પાલમ એરપોર્ટ પર આગમન થયું છે. આજે વડાપ્રધાન નરેન્દ્ર મોદી અને શી જિનપિંગ વચ્ચે મહત્વપૂર્ણ દ્વિપક્ષીય બેઠક યોજાવાની છે. ગલવાન સંઘર્ષના 6 વર્ષ બાદ શી જિનપિંગની આ પ્રથમ ભારત મુલાકાત હોવાથી બંને દેશોની બેઠક પર સૌની નજર છે. બેઠકમાં ભારત તરફથી સરહદી વિવાદ અને LAC પર શાંતિ જાળવવા સહિતના મહત્વના મુદ્દાઓ ઉઠાવવામાં આવી શકે છે. બંને નેતાઓ વચ્ચે ‘કોન્ફિડન્સ બિલ્ડિંગ મેઝર્સ’ વધુ મજબૂત બનાવવા અંગે પણ ચર્ચા થવાની શક્યતા છે. આ ઉપરાંત કૈલાશ માનસરોવર યાત્રા ફરી સરળ બનાવવા અથવા તેને લઈને કોઈ મોટી જાહેરાત થવાની પણ શક્યતા વ્યક્ત કરવામાં આવી રહી છે.

ચીનના રાષ્ટ્રપતિ શી જિનપિંગ દિલ્હી પહોંચી ગયા છે. જિનપિંગનું વિમાન એર ચાઈના પાલમ એરપોર્ટ પર લેન્ડ થયું છે.

18મા બ્રિક્સ સમિટ પહેલા ભારત મંડપમ ખાતે સુરક્ષા વ્યવસ્થા વધારી દેવામાં આવી છે. સમગ્ર સ્થળ પર પોલીસ અને અર્ધલશ્કરી દળોના જવાનો, ડોગ સ્ક્વોડ તૈનાત કરવામાં આવ્યા છે.

અમદાવાદના પીપળજ વિસ્તારમાં ગેરકાયદે તેલના વેચાણ સામે ફૂડ વિભાગે દરોડા પાડ્યા છે. મમતા એગ્રો પ્રોટીન નામની જગ્યાએ દરોડા દરમિયાન જૂના ડબ્બામાં તેલ ભરી તેનું વેચાણ કરવામાં આવતું હોવાનો ખુલાસો થયો છે. તપાસમાં તેલના ડબ્બા પર બેચ નંબર સહિતની જરૂરી વિગતોનો પણ અભાવ હોવાનું સામે આવ્યું છે. મ્યુનિસિપલ કોર્પોરેશનના ફૂડ વિભાગે કાર્યવાહી કરીને 175 તેલના ડબ્બા સીલ કર્યા છે. તપાસ દરમિયાન છત્રાલથી દર અઠવાડિયે એક ટેન્કર તેલ લાવી અહીં વેચાણ કરવામાં આવતું હોવાની માહિતી પણ સામે આવી છે. સમગ્ર મામલે ફૂડ વિભાગે વધુ તપાસ હાથ ધરી છે.

વડોદરામાં ગણેશ આગમન યાત્રા દરમિયાન બે જૂથ વચ્ચે ઘર્ષણની ઘટના સામે આવી છે. MSU બોય્ઝ હોસ્ટેલ કેમ્પસમાં બે ગણપતિ આગમન યાત્રા સામસામે આવી જતાં વિદ્યાર્થીઓ વચ્ચે બોલાચાલી બાદ મારામારી થઈ હતી. કમાટીબાગ રોડ પર હોમ સાયન્સ ફેકલ્ટી પાસે બનેલી આ ઘટનામાં 4 વિદ્યાર્થીઓ ઈજાગ્રસ્ત થયા છે. ઘટનાની જાણ થતાં પોલીસ સ્થળ પર પહોંચી હતી અને સમગ્ર મામલે તપાસ હાથ ધરી છે. પોલીસે ઘર્ષણનું ચોક્કસ કારણ જાણવા તેમજ ઘટનામાં સંડોવાયેલા વિદ્યાર્થીઓ અંગે વધુ તપાસ શરૂ કરી છે.

કચ્છના કંડલા OTB નજીક બે જહાજ વચ્ચે ટક્કર થતાં અકસ્માત સર્જાયો છે. કોલસાથી ભરેલું K Max Emperor જહાજ અન્ય જહાજ સાથે અથડાતાં તેને ભારે નુકસાન થયું છે. ટક્કર બાદ જહાજમાં પાણી ભરાવા લાગતાં પરિસ્થિતિ ગંભીર બની હતી. ઘટનાની જાણ થતાં રેસ્ક્યૂ ટીમે કેપ્ટન, બે ચીફ એન્જિનિયર સહિત કુલ 24 લોકોને સલામત રીતે રેસ્ક્યૂ કર્યા હતા. હાલ કોઈ અનિચ્છનીય ઘટના ન બને તે માટે બે પોર્ટ ટગ અને બે કોસ્ટ ગાર્ડ જહાજોને સ્ટેન્ડબાય રાખવામાં આવ્યા છે. અકસ્માતને પગલે જહાજને થયેલા નુકસાન અને ઘટનાના કારણ અંગે વધુ તપાસ હાથ ધરવામાં આવી છે.

ભરૂચના અંકલેશ્વરમાં વહેલી સવારથી મેઘરાજાએ એન્ટ્રી કરી છે. વાદળછાયા વાતાવરણ વચ્ચે શહેરના વિવિધ વિસ્તારોમાં વરસાદ વરસતા વાતાવરણમાં ઠંડક પ્રસરી છે. લગભગ 35 દિવસ બાદ વરસાદ પડતાં ગરમી અને બફારાથી ત્રસ્ત લોકોને મોટી રાહત મળી છે. વરસાદને કારણે રસ્તાઓ પર પાણી ભરાવાની સાથે વાતાવરણ ખુશનુમા બન્યું છે. હવામાન વિભાગે આજથી આગામી ત્રણ દિવસ દરમિયાન વરસાદની આગાહી કરી છે, જેને પગલે અંકલેશ્વર સહિત ભરૂચ જિલ્લામાં વધુ વરસાદની શક્યતા છે.

ઓક્ટોબરથી ડિસેમ્બર દરમિયાન બંગાળની ખાડી અને અરબ સાગરમાં ત્રણ શક્તિશાળી વાવાઝોડાં સર્જાવાની આશંકા વ્યક્ત કરવામાં આવી છે. આ વાવાઝોડાંની અસર ગુજરાત અને મહારાષ્ટ્ર સહિત અનેક રાજ્યોમાં જોવા મળી શકે છે. મળતી માહિતી મુજબ, વાવાઝોડાની કુલ વિનાશક ક્ષમતા 83 ટકાથી વધુ હોવાનો અંદાજ છે. આ સંભવિત જોખમને લઈને ISRO દ્વારા રેડ એલર્ટ જેવી ચેતવણી સામે આવી છે. જો આ આગાહી સાચી સાબિત થાય તો આગામી ચોમાસા બાદનો સમય દરિયાકાંઠાના વિસ્તારો માટે પડકારજનક બની શકે છે. જોકે, વાવાઝોડાની ચોક્કસ દિશા, તીવ્રતા અને લેન્ડફોલ અંગે સત્તાવાર હવામાન આગાહી નજીકના દિવસોમાં વધુ સ્પષ્ટ થશે.