01 મેના મહત્વના સમાચાર : આજે ગુજરાતનો 66મો સ્થાપના દિવસ, CM ભૂપેન્દ્ર પટેલે ગુજરાતીઓને પાઠવી શુભકામના

સુરતમાં ગુજરાત સ્થાપના દિવસ નિમિત્તે રાજ્ય માટે ગૌરવસભર પહેલ કરવામાં આવી છે. શહેરના ચોર્યાસી વિસ્તારમાં દેશનો પહેલો માનવ રહિત અને બેરિયરલેસ ટોલબૂથ લોન્ચ કરવામાં આવ્યો છે. તાઈવાનની અત્યાધુનિક ટેક્નોલોજીથી સજ્જ આ ટોલબૂથ 20 મીટર દૂરથી જ વાહનની નંબર પ્લેટ સ્કેન કરી શકે છે, જેના કારણે વાહનચાલકોને રોકાવાની જરૂર નહીં રહે. આ સિસ્ટમ સંપૂર્ણપણે સ્વચાલિત હોવાથી નિયમોનો ભંગ કરનાર માટે તરત જ ઈ-ચલણ જનરેટ થઈ જશે. આ નવી વ્યવસ્થા ટ્રાફિક વ્યવસ્થામાં આધુનિકતા લાવવાની સાથે સમય બચત અને પારદર્શિતા વધારવામાં મદદરૂપ સાબિત થશે.

અમરેલી જિલ્લામાં આવેલા ગીર જંગલના જાણીતા ખજુરી નેસ વિસ્તારમાં મંજૂરી વગર ‘સંસ્કૃતિ દર્શન’ કાર્યક્રમ યોજવાના મુદ્દે વિવાદ ઊભો થયો છે. ધારી ગીર પૂર્વના જસાધાર રેન્જ હેઠળ આવેલા આ નેસમાં કાર્યક્રમ અંગેની પત્રિકા વાયરલ થતાં અનેક સવાલો ઉઠ્યા છે. પત્રિકામાં બહારથી મહેમાનોને આમંત્રિત કરવાના, ગીરના જંગલમાં રાત્રી રોકાણ તેમજ ભજન-ડાયરાઓ યોજવાના ઉલ્લેખથી પ્રકૃતિ સંરક્ષણના નિયમોનું ઉલ્લંઘન થતું હોવાનો આક્ષેપ છે. ખાસ કરીને પ્રતિબંધિત વિસ્તારમાં આવેલા નેસડામાં આવા કાર્યક્રમને મંજૂરી કેવી રીતે મળી તે મુદ્દે ચર્ચા તેજ બની છે. પત્રિકામાં પરષોત્તમ રૂપાલા અને રાજ્યના પૂર્વ વનમંત્રી મુલુ બેરા સહિત કલાકારોની હાજરીનો પણ ઉલ્લેખ છે. સમગ્ર કાર્યક્રમનું આયોજન જળ ક્રાંતિ ટ્રસ્ટ દ્વારા કરવામાં આવ્યું હોવાનું સામે આવ્યું છે. આ મામલે ધારી ગીર પૂર્વના DCF વિકાસ યાદવે આયોજકોને નોટિસ ફટકારી છે અને વધુ તપાસ હાથ ધરાઈ છે.