ગુજરાત પોલીસ (Gujarat Police) દ્વારા તાજેતરમાં જ દરિયાઈ વિસ્તારમાં ચાલતા આંતરરાષ્ટ્રીય ડ્રગ્સ (Drugs) નેટવર્કનો પર્દાફાશ કરવામાં આવ્યો છે અને ખૂબ મોટી સંખ્યામાં ડ્રગ્સનો જથ્થો ઝડપી પાડી ગુજરાતમાં નાપાક પાકિસ્તાન દ્વારા ફેલાવવામાં આવતા ડ્રગ્સના રેકેટને તોડવામાં ગુજરાત પોલીસને સફળતા મળી છે, ત્યારે જામનગરમાં પણ દરિયાકાંઠે આવેલા બેડી વિસ્તારમાંથી એક ઈસમને રૂપિયા 6 લાખની કિંમતના ડ્રગ્સ સાથે ઝડપી પાડવામાં જામનગર અને દેવભૂમિ દ્વારકા (SOG Police) એસઓજી પોલીસને સફળતા મળી છે. બેડી વિસ્તારમાંથી રૂપિયા 6 લાખની કિંમતના મ્યાઉ મ્યાઉ ડ્રગ્સ સાથે એક ઈસમને ઝડપી પાડવામાં આવ્યો છે.
ગુજરાતના ગૃહ મંત્રી હર્ષ સંઘવી પણ રાજ્યભરમાં ફેલાવાનો પ્રયાસ કરતા ડ્રગ્સના નેટવર્કને ડામવા માટે એડીચોટીનું જોર લગાવી રહ્યા છે અને ગુજરાત રાજ્યમાં ડ્રગ્સ ઘુસાડતા માફિયાઓ અને ડ્રગ્સ પેડલરો પર ઘોસ બોલાવતા એક પછી એક સફળતા મળી રહી છે. જેના પગલે જામનગર જિલ્લામાંથી પ્રથમ વખત મ્યાઉં મ્યાઉં મેફેડ્રોન ડ્રગ્સના જથ્થો ઝડપાયો છે. જામનગર શહેરના બેડી વિસ્તારમાં રહેતા એક મુસ્લિમ શખ્સને દેવભૂમિ દ્વારકા અને જામનગર SOG પોલીસ દ્વારા રૂપિયા 6 લાખની કિંમતના ડ્રગ્સ સાથે ઝડપી પાડવામાં આવ્યો છે.
દેવભૂમિ દ્વારકા જિલ્લાના SOG પીઆઇ સિંગરખિયાને મળેલ હકીકતના આધારે જામનગર શહેરના બેડી વિસ્તારમાં દેવભૂમિ દ્વારકા અને જામનગર એસ.ઓ.જી. પોલીસ દ્વારા સંયુક્ત રીતે ઓપરેશન હાથ ધરીને બિલાલ અબ્દુલ દલ નામના શખ્સને રૂપિયા 6 લાખના નશાકારક મ્યાઉં મ્યાઉં મેફેડ્રોન ડ્રગ્સ સાથે ઝડપી પાડવામાં સફળતા મળી છે. રાત્રેના સમયે SOG પોલીસે ગુપ્ત ઓપરેશન હાથ ધરીને ડ્રગ્સના જથ્થા સાથે એક શખ્સને ઝડપી પાડવામાં આવ્યો છે ત્યારે આ ડ્રગ્સમાં ક્યાં રસ્તે જામનગરમાં ઘૂસડવામાં આવ્યો અને તેનું કઈ કઈ જગ્યાએ વેચાણ કરવામાં આવતું હતું તેમજ હજુ આ ગુન્હામાં વધુ શખ્સોના નામ પણ બહાર આવવાની શક્યતા રહેલી હોય પોલીસે આ અંગે વધુ ઊંડાણપૂર્વકની તપાસ હાથ ધરી છે.
નોંધનીય છે કે ગત રોજ માંગરોળના દરિયાકાંઠેથી પણ ચરસનો જથ્થો મળી આવ્યો હતો. જેને પોલીસ દ્વારા તપાસ માટે એફએસએલમાં મોકલવામાં આવ્યો હતો. ગુજરાતના દરિયાકિનારેથી વારંવાર ડ્રગ્સ ઝડપાવાની ઘટનાઓ સામે આવી રહી છે ત્યારે મરીન પોલીસથી માંડીને ગુજરાત અને સ્થાનિક પોલીસ વારંવાર આવા ડ્ર્સ પેડલરને ઝડપી પાડતી હોય છે.
વિથ ઇનપુટ: જય ગોસ્વામી