DAHOD : ધાનપુરના ભુવેરો ગામમાં શર્મશાર ઘટના, બે યુવતી પર અત્યાચારની ઘટનાનો વીડિયો વાયરલ

DAHOD : યુવતીઓને તાલીબાની સજા આપવાને લઈ દાહોદ જિલ્લો ફરી થયો છે શર્મસાર. ઘટના છે ધાનપુરના ભુવેરો ગામની. જ્યાં મોબાઈલ પર વાત કરવા જેવી સામાન્ય વાતમાં બે યુવતીઓને જાહેરમાં ઢોરમાર મારવામાં આવ્યો છે. જાહેર પંચની સામે યુવતીઓને માર મારવાની એક મહિના પહેલાની ઘટનાનો વીડિયો વાયરલ થયો છે.

આ વાયરલ વીડિયોમાં જોઈ શકાય છે કે બંને યુવતીઓને અપમાનિત કરવામાં આવે છે. યુવતીના સ્વજનો જ જાણે દુશ્મન બની ગયા હોય તેમ તેને જાહેરમાં માર મારે છે. અને નીચલી કક્ષાની માનસિક્તા ધરાવતા લોકો તમાશો જોઈને નરાધમ આરોપીઓને જાણે સાથ આપતા જોવા મળે છે. હૈયુ હચમચાવી દે તેવી આ ઘટનાનો વીડિયો વાયરલ થયા બાદ ધાનપુર પોલીસે 12 લોકો સામે ગુનો નોંધ્યો છે અને તેમની ધરપકડ કરવા કાર્યવાહી હાથ ધરી છે.

મહત્વનું છે કે દાહોદ અને પંચમહાલમાં યુવતીઓને આ રીતે જાહેરમાં માર મારવાની જાણે પરંપરા બની ગઈ હોય તેમ લાગી રહ્યું છે. દર બે-ત્રણ દિવસે આ વિસ્તારોમાંથી યુવતીઓને જાહેરમાં માર મારવાની ઘટનાના વીડિયો વાયરલ થતા જોવા મળે છે.

ત્યારે સવાલ એ થાય છે કે આ હલકી માનસિક્તા ધરાવતા લોકોને પોલીસ ક્યારે કાયદાનો પાઠ ભણાવશે? ક્યાં સુધી મહિલાઓ અત્યાચારનો ભોગ બનતી રહેશે? લોકો કેમ કાયદો હાથમાં લઈ રહ્યા છે? કેમ પોલીસ આવા તત્વોને પરચો નથી બતાવતી?