Chhota Udepur: નસવાડીના 60 ગ્રામ પંચયાતના VCEઓનો પડતર માગણીઓને લઇ અનોખો વિરોધ, લારી પર કોમ્પ્યુટર મુકી બજારમાં રેલી કાઢી
પડતર માંગણીઓને લઇને રજૂઆત કરવા નસવાડીના (Naswadi) VCEઓ લારીમાં કોમ્પ્યુટર મુકી મામલતદાર કચેરીએ પહોંચ્યા હતા અને હાથમાં બેનરો સાથે સૂત્રોચ્ચાર કરી મામલતદારને આવેદનપત્ર પાઠવ્યું હતું.
છોટાઉદેપુરના (Chhota Udepur) નસવાડીમાં (Nasvadi) 60 ગ્રામ પંચાયતના VCEઓએ અનોખી રીતે વિરોધ (Protest) પ્રદર્શન કર્યુ હતું. પડતર માંગણીઓને લઇને રજૂઆત કરવા નસવાડીના VCEઓ લારીમાં કોમ્પ્યુટર મુકી મામલતદાર કચેરીએ પહોંચ્યા હતા અને હાથમાં બેનરો સાથે સૂત્રોચ્ચાર કરી મામલતદારને આવેદનપત્ર પાઠવ્યું હતું. કમિશન પ્રથા દૂર કરવી, પગારધોરણમાં સુધારો જેવી માંગણીઓને લઇને 5 મેથી નસવાડીના VCEઓ હડતાળ પર ઉતર્યા છે. જેથી અંતરિયાળ વિસ્તારમાં રહેતા લોકોને પણ ભારે હાલાકીનો સામનો કરવો પડી રહ્યો છે.
છોટાઉદેપુર જિલ્લાના નસવાડી તાલુકાના 60 ગ્રામ પંચાયતના VCEઓએ પોતાની પડતર માગણીઓને લઇને અનોખી રીતે વિરોધ પ્રદર્શન કર્યુ હતુ. 60 ગ્રામ પંચયાતના VCEઓએ તેમનો રોષ વ્યક્ત કરતા જણાવ્યુ હતુ કે તંત્ર તેમની માંગણીઓનું નિરાકરણ નહીં લાવે તો આવનારા સમયમાં લારી ચલવાનો વારો આવશે.
ગુજરાતના 11 હજારથી વધુ વિલેજ કમ્પ્યૂટર ઓપરેટરની આજથી અચોક્કસ મુદતની હડતાળ પર ઉતરી ગયા છે. VCE ઓપરેટર્સની 16 વર્ષ જૂની માગણી સંતોષાતી નથી. રાજ્ય સરકાર નજીવું કમિશન ચુકવે છે. તે પણ અનિયમિત આપે છે. આ કર્મચારીઓ નિયત પગાર ધોરણ પર લેવાની, નોકરીમાં કાયમી કરવાની અને અન્ય સરકારી લાભ આપવાની માગણી કરી રહ્યાં છે. બીજી તરફ હડતાળને પગલે ગામડામાં ખેડૂતોની વહીવટી કામગીરી ન ખોરવાય તે માટે ઈ-ગ્રામ સેન્ટરનો હવાલો હવે તલાટીઓને સોંપવામાં આવ્યો છે.
ઉલ્લેખનીય છે કે, ગુજરાતમાં રાજ્યની ગ્રામ પંચાયતોમાં ફરજ બજાવતા VCE કર્મચારીઓ પડતર માંગણીઓને લઇને ઘણા સમયથી સરકારમાં રજૂઆત કરી રહ્યા છે. પરંતુ સરકાર દ્વારા VCE કર્મચારીઓની માંગ સંદર્ભે હજી સુધી કોઈ નિરાકરણ લાવવામાં નથી આવ્યું. આ અંગે તેમના દ્વારા અનેક વાર ગાંધીનગર સહિત અનેક સ્થળોએ ધરણા પ્રદર્શન કર્યા હતા.
જેમાં મળતી માહિતી મુજબ રાજ્યની તમામ ગ્રામ પંચાયતમાં VCE કર્મચારીઓ કામ કરે છે. જેઓ રાજ્ય સરકારની તમામ યોજનાની કામગીરી કરતા હોય છે. તેમજ આ VCE કર્મચારીઓની માગ છે કે, તેમના કામ પર તેમને કમિશન મળે સાથે જ તેઓ જેટલું કામ કરે છે તેટલો તેમને પગાર મળે. કર્મચારીઓની માગ છે કે તેમને રેગ્યુલર કર્મચારીની જેમ જ પગાર આપવામાં આવે. તેમજ તેમને કાયમી કરીને દરેક પ્રકારના સરકારી લાભ આપવામાં આવે. મહત્વપૂર્ણ છે કે વિલેજ કોમ્પ્યુટર ઓપરેટરો 2006થી પડતર પ્રશ્નો મુદ્દે સરકાર સમક્ષ રજૂઆતો કરી રહ્યા હતા. જો કે આજદીન સુધી સરકારે તેમની રજૂઆતોને ધ્યાને ન લીધી હોવાના આરોપ છે.