
ગુજરાતમાં 26 એપ્રિલે યોજાયેલી સ્થાનિક સ્વરાજ્યની ચૂંટણી બાદ હવે સૌની નજર પરિણામો પર ટકેલી છે. રાજ્યભરમાં કુલ 9,292 બેઠકો માટે મતદાન યોજાયું હતું, જેમાં 25,579 ઉમેદવારો વચ્ચે સીધી ટક્કર જોવા મળી હતી. 4 કરોડ 18 લાખથી વધુ મતદાતાઓએ પોતાના મતાધિકારનો ઉપયોગ કર્યો હતો. હવે મતગણતરી સાથે કોણ જીતશે અને કોના હાથમાં સત્તા આવશે તેની ઉત્સુકતા વધી છે.
15 મહાનગરપાલિકા, 84 નગરપાલિકા, 34 જિલ્લા પંચાયત અને 260 તાલુકા પંચાયતની બેઠકો માટે મતદાન પૂર્ણ થયું હતું. આ ચૂંટણીમાં 730 ઉમેદવારો પહેલાથી જ બિનહરીફ જાહેર થયા હતા. ખાસ વાત એ રહી કે 9 નવી મહાનગરપાલિકામાં પ્રથમ વખત ચૂંટણી યોજાઈ હતી, જેના કારણે આ ચૂંટણી વધુ રસપ્રદ બની છે.
મતદાન ટકાવારીની વાત કરીએ તો મહાનગરપાલિકામાં 55.11 ટકા, નગરપાલિકાઓમાં 65.53 ટકા, જિલ્લા પંચાયતમાં 66.62 ટકા અને તાલુકા પંચાયતમાં 67.25 ટકા મતદાન નોંધાયું હતું. ગ્રામ્ય વિસ્તારોમાં વધુ મતદાન નોંધાતા પરિણામો પણ રોમાંચક રહેવાની શક્યતા છે.
મતગણતરી 28મી એપ્રિલ 2026ને મંગળવારના રોજ સવારના 9 કલાકેથી અલગ-અલગ જિલ્લા મથકો પર શરૂ થશે અને સવારથી જ ટ્રેન્ડ્સ આવવા લાગશે. શરૂઆતમાં પોસ્ટલ બેલેટ અને ત્યારબાદ EVMના મતોની ગણતરી હાથ ધરાશે. પરિણામોની પળેપળની અપડેટ માટે મતદારો અને ઉમેદવારોમાં ભારે ઉત્સુકતા છે.
ગુજરાત સ્થાનિક સ્વરાજ્ય ચૂંટણીનું લાઈવ રિઝલ્ટ અને દરેક બેઠકના અપડેટ્સ તમે TV9 Gujarati News પર જીવંત જોઈ શકશો. ટીવી ચેનલ ઉપરાંત TV9 Gujaratiની વેબસાઈટ અને ડિજિટલ પ્લેટફોર્મ પર પણ લાઈવ અપડેટ્સ ઉપલબ્ધ રહેશે. કોણ આગળ અને કોણ પાછળ, કઈ પાર્ટી કયા વિસ્તારમાં બાજી મારી રહી છે, તેની તમામ માહિતી રિયલ ટાઈમમાં મળશે.
આ ચૂંટણીના પરિણામો રાજ્યના રાજકીય સમીકરણો માટે ખૂબ મહત્વના માનવામાં આવી રહ્યા છે. સ્થાનિક સ્તરે જનતા કોના પક્ષે ઉભી રહી તે પરિણામોમાં સ્પષ્ટ થશે. તેથી જો તમે પણ ચૂંટણી પરિણામોની દરેક અપડેટ જાણવા માંગતા હોવ તો TV9 Gujarati સાથે જોડાયેલા રહો.