બોટાદ (Botad) જિલ્લાની આર.એ.કળથિયા શાળાના (School) પરિસરમાં જ 8 હજાર લિટરની ક્ષમતા ધરાવતી ડીઝલ ટેન્ક (Diesel Tank) બની હોવાની બાબત પ્રકાશમાં આવતા મામલતદાર સહિત જિલ્લાનું તંત્ર દોડતું થઈ ગયું હતું. આ ઘટનામાં બોટાદ જિલ્લાની આર.એ.કળથિયા સ્કૂલમાંથી 8 હજાર લિટરની ડીઝલ ભરવાની ટેંક મળી આવતા મામલતદાર દોડતા થયા હતા. શાળાના પરિસરમાં જ ડીઝલ ટેંક બનાવવામાં આવી હોવાની માહિતી પ્રાપ્ત થતા મામલતદાર ઘટનાસ્થળે પહોંચ્યા હતા અને 3 હજાર જેટલો ડીઝલનો જથ્થો જપ્ત કરી ડીઝલ ટેન્ક સીલ કરી હતી. મામલતદારે જણાવ્યું હતું કે આ ડીઝલ ટેન્ક બનાવવા કોઈ મંજૂરી માંગવામાં આવી નથી માટે તે ગેરકાયદે છે.
જોકે આ મુદ્દે પ્રશ્ન એ ઉઠ્યો છે કે શાળાના પરિસરમાં અસંખ્ય બાળકો અભ્યાસ કરતા હોય ત્યારે શાળાના પ્રાંગણમાં જ ડીઝલ ટેન્ક બનાવાવની મંજૂરી કોણે આપી? અને શાળા કાર્યરત છે ત્યારે શા માટે સેંકડો બાળકોના જીવને જોખમમાં મૂકવામાં આવ્યો છે. આ સમગ્ર મુદ્દે બોટાદ મામલતદારે તપાસના આદેશ આપ્યા છે. સાથે જવાબદાર લોકો સામે કાયદાકીય પગલાં લેવાની પણ ખાતરી આપી છે. હવે એ જોવું રહ્યું કે આ ઘટનાની તપાસના તાર ક્યાં સુધી લંબાય છે અને અને કોની રહેમનજરહેઠળ આટલી મોટી ટેન્ક બનાવવામાં આવી છે?
આ સમગ્ર ઘટનામાં ટ્રસ્ટીઓએ લૂલો બચાવ કરતા કહ્યું હતું કે શાળા સંપૂર્ણપણે એરકન્ડિશનરની સુવિધા ધરાવે છે. ત્યારે એ.સી. ચલાવવા માટે વધારે ડીઝલની જરૂર પડે છે. માટે અહીં ટેન્ક બનાવવામાં આવી છે. જોકે શાળામાં ડીઝલની ટેન્ક બનાવવી કેટલી યોગ્ય છે તે અંગે મોટા સવાલો ઉભા થયા છે. સાથે જ શાળાની બસ માટે પણ ડીઝલની જરૂર પડતી હોવાથી અહીં ટેન્ક બનાવવામાં આવી હોવાની બાબત પણ જણાવી હતી.
Published On - 9:22 am, Wed, 22 June 22