બેંક હોય તો આવી! સાઈકલ લઈને આવતા કર્મચારીને મહિને 500 રૂપિયાનું ઈન્સેન્ટિવ

શ્રેષ્ઠ આરોગ્ય અને પર્યાવરણ જાગૃતિના ઉદ્દેશ્ય સાથે સુરતની વરાછા બેંક દ્વારા અનોખી જ પહેલ કરવામાં આવી છે. વરાછા બેંક દ્વારા બેંક પર સાઇકલ લઈને આવતા કર્મચારીઓને ઈનામના ભાગરૂપે ઈન્સેન્ટિવ આપવાનું નક્કી કર્યું છે. વરાછા કો.ઓ.બેંક પર આવતા કર્મચારીઓ જો પોતાની બાઈક કે ફોર વ્હીલને બદલે સાઈકલ લઈને આવે તો તેમને ઈન્સેન્ટિવના ભાગરૂપે દર મહિને પાંચસો રૂપિયા આપવાનું શરૂ કર્યું છે. બેંક દ્વારા પોતાના કર્મચારીઓ માટે એવો પ્રસ્તાવ મુકવામાં આવ્યો હતો કે બેંક નજીક 4 કે 5 કિમી વિસ્તારમાં રહેતા કર્મચારીઓએ સાઈકલ લઈને આવવું જોઈએ અને આશ્ચર્યની વચ્ચે તેના માટે બેંકના 15 જેટલા કર્મચારીઓએ સહમતી દર્શાવી.

હજી પણ બીજા કર્મચારીઓ તૈયાર થઈ રહ્યા છે. આ આઈડિયા લાવવા પાછળનું મુખ્ય કારણ એ હતું કે સાઈકલીંગ કરવાથી બેંકના કર્મચારીઓની હેલ્થ પણ જળવાઈ રહે તે ઉપરાંત પેટ્રોલ ડીઝલના ધુમાડાથી પ્રદુષણને થઈ રહેલા નુક્શાનને અટકાવવા તેમજ ઈંધણ બચાવવા પોતાનાથી બનતા પ્રયત્ન થઈ શકે. વરાછા બેંક 1995માં અસ્તિત્વમાં આવી છે અને જુદી જુદી બ્રાન્ચમાં તેના 350 કરતાં પણ વધુ કર્મચારીઓ કામ કરે છે.

બેંક દ્વારા હાથમાં લેવાયેલા સાઈકલ અભિયાનનીએ હકારાત્મક અસર પડી છે કે બેંકના મેનેજરથી લઈને પટાવાળા સુધીના કર્મચારીઓ આજે પોતાની ફરજ પર આવે, ત્યારે સાઇકલ પર જ આવવાનું પસંદ કરે છે. ત્યારે પર્યાવરણ બચાવવા અને આરોગ્યને તંદુરસ્ત રાખવા માટે આ વિચાર ખૂબ આવકારદાયક કહી શકાય.

રોચક VIDEO જોવા માટે TV9Gujaratiના YOUTUBE પેજને SUBSCRIBE કરો