લમ્પીગ્રસ્ત આખલાને રસી આપવી પડી ભારે, આધેડને શિંગડે ભરાવી હવામાં ફંગોળી દીધો, જુઓ Video

ગુજરાતમાં (Gujarat) લમ્પી વાયરસે (Lumpy virus) કહેર મચાવ્યો છે. હજારોની સંખ્યામાં પશુઓ લમ્પીની ચપેટમાં આવી રહ્યા છે. રાજ્યમાં લમ્પી વાયરસનો વ્યાપ સતત વકરતા રાજ્ય સરકાર દ્વારા પશુઓના રસીકરણની (Vaccination) કામગીરી શરુ કરવામાં આવી છે. ખતરનાક વાયરસથી પશુધનને બચાવવા રસીકરણ અભિયાન ચાલી રહ્યું છે. બીજી તરફ ચેપગ્રસ્ત પશુઓ પર ફટકડી અને લીમડાના રસાયણનો છંટકાવ કરવામાં આવે છે અને લમ્પીગ્રસ્ત ગાયોની સારવાર કરવામાં આવી રહી છે. જો કે બનાસકાંઠામાં (Banaskantha) લાખણી પાસેના એક ગામમાં એક આખલાનું (bull) રસીકરણ કરવુ જીવદયાપ્રેમીઓને ભારે પડી ગયુ. રસીકરણ કરવા જતા આખલાએ અનેક લોકોને અડફેટે લઇ લીધા.

ઉશ્કેરાયેલા આખલાએ આતંક મચાવ્યો

બનાસકાંઠામાં લમ્પીગ્રસ્ત પશુઓના રસીકરણ દરમિયાન ઉશ્કેરાયેલા આખલાએ આતંક મચાવ્યો હતો. બનાસકાંઠા જિલ્લાના લાખણી પાસેના કુડા ગામમાં આવેલી ગૌશાળામાં રસીકરણની કામગીરી કરવામાં આવી રહી હતી. જો કે રસીકરણની કામગીરી દરમિયામ એક આખલાએ લોકોને અડફેટે લેવાનું શરુ કરી દીધુ હતુ. રસીકરણની કામગીરી કરવામાં આવી રહી હતી તે દરમિયાન એક લમ્પીગ્રસ્ત આખલો ઉશ્કેરાઇ ગયો હતો. તેમ છતાં પશુઓની સેવા કરતા જીવદયા પ્રેમીઓ તેને કાબૂમાં લેવાના પ્રયત્નો કરી રહ્યા હતા. તેઓ એવા પ્રયત્નોમાં લાગેલા હતા કે તેને રસી મળી જાય. પરંતુ આખલો એટલો ઉશ્કેરાયો હતો કે, તેણે એક આધેડને શિંગડે ભરાવીને હવામાં ફંગોળી દીધા હતા. નીચે પટકાયેલા આધેડને કમરના ભાગે ઈજા થતાં સારવાર માટે હોસ્પિટલમાં લઈ જવાયા હતા. આ સિવાયના પણ કેટલાક લોકો આખલાના અડફેટે આવતા બચી ગયા હતા.

લમ્પીના નવા 2517 કેસ નોંધાયા

ગુજરાતમાં લમ્પી વાયરસનો કેર યથાવત છે. અત્યાર સુધીમા 23 જિલ્લામાં લમ્પી વાયરસ પહોંચી ચુક્યો છે. ગુજરાતમાં દિવસે દિવસે લમ્પી સંક્રમિત કેસોની સંખ્યા વધતી જઇ રહી છે. રાજ્યમાં એક દિવસમાં લમ્પીના નવા 2517 કેસ નોંધાયા છે જ્યારે એક દિવસમાં કુલ 149 પશુઓના લમ્પીના કારણે મોત થયા છે. વધુ 149 પશુઓ લમ્પી સામે જંગ હારી જતાં કુલ મોતનો આંકડો વધીને 2782 પર પહોંચી ગયો છે. એક દિવસમાં સૌથી વધુ કચ્છમાં 67 પશુના મોત નોંધાયા હતા. જ્યારે ભાવનગરમાં 20 અને રાજકોટમાં 19 પશુના મોત થયા છે. તો એક દિવસમાં બનાસકાંઠામાં 1076 પશુ લમ્પીથી અસરગ્રસ્ત થયા હતા.