વાવ-થરાદ પંથકમાં પડેલા ધોધમાર વરસાદને કારણે ખાસ કરીને ભાભર શહેર અને આસપાસના વિસ્તારોમાં જનજીવન ગંભીર રીતે પ્રભાવિત થયું છે. સતત વરસી રહેલા વરસાદના કારણે અનેક રહેણાંક વિસ્તારોમાં કેડ સમા પાણી ભરાઈ ગયા હતા, જેના કારણે લોકોના ઘરોમાં પાણી ઘૂસી જતાં ભારે મુશ્કેલી સર્જાઈ હતી. અનેક રસ્તાઓ પર પાણી ભરાતા વાહનવ્યવહાર પણ ખોરવાયો હતો.

પરિસ્થિતિની ગંભીરતાને ધ્યાનમાં રાખીને પોલીસ તંત્ર તાત્કાલિક એક્શનમાં આવ્યું હતું. પોલીસ વડાના માર્ગદર્શન હેઠળ ટીમોએ ભાભર અને આસપાસના વિવિધ વિસ્તારોની મુલાકાત લઈને સ્થિતિનો તાગ મેળવ્યો હતો. અધિકારીઓએ અસરગ્રસ્ત વિસ્તારોમાં જઈ લોકોની સુરક્ષા તેમજ જરૂરી મદદ પહોંચાડવા માટે સતત દેખરેખ રાખી હતી.

ભારે વરસાદના કારણે થરા હાઈવે નજીકના નીચાણવાળા વિસ્તારોમાં પાણી ભરાઈ જતાં ત્યાં વસતા લોકોને સુરક્ષિત સ્થળે સ્થળાંતરિત કરવાની ફરજ પડી હતી. પોલીસ અને સ્થાનિક તંત્રની ટીમોએ સંકલન સાથે કામગીરી હાથ ધરી અસરગ્રસ્ત પરિવારોને સુરક્ષિત સ્થળોએ ખસેડ્યા હતા, જેથી કોઈ જાનહાનિ ન થાય.

વરસાદમાં ફસાયેલા 20થી વધુ લોકોને પોલીસ દ્વારા સુરક્ષિત રીતે બહાર કાઢવામાં આવ્યા હતા. બચાવ કામગીરી દરમિયાન પોલીસ જવાનો પાણી ભરાયેલા વિસ્તારોમાં પહોંચી લોકોને મદદરૂપ બન્યા હતા. સ્થાનિક તંત્ર દ્વારા પણ સતત પરિસ્થિતિ પર નજર રાખવામાં આવી રહી છે અને લોકોને જરૂરી હોય ત્યારે જ બહાર નીકળવા તેમજ સાવચેતી રાખવા અપીલ કરવામાં આવી છે.

હવામાન વિભાગ દ્વારા આગામી કલાકોમાં પણ કેટલાક વિસ્તારોમાં ભારે વરસાદની સંભાવના વ્યક્ત કરવામાં આવી છે. જેના પગલે સ્થાનિક વહીવટી તંત્ર, પોલીસ અને બચાવ ટીમોને એલર્ટ પર રાખવામાં આવ્યા છે જેથી કોઈ પણ ઇમરજન્સી સ્થિતિમાં તાત્કાલિક કાર્યવાહી કરી શકાય.

Breaking News : ખેડાના નડિયાદમાં 15 ઈંચથી વધુ વરસાદ, શહેરના અનેક વિસ્તારો જળબંબાકાર, આ સ્ટોરી વાંચવા અહીં ક્લિક કરો