Anand: સારસા ખાતે આરોગ્ય મેળા જિલ્લા કલેક્ટરના હસ્તે પ્રારંભ, મેળાનો લાભ લેવા નાગરિકોને કલેક્ટરની અપીલ

Anand: જિલ્લા કલેકટર મનોજ દક્ષિણીએ (District Collector Manoj Dakshini)સમગ્ર રાજયમાં આજથી આઝાદી કા અમૃત મહોત્સવ અંતર્ગત વડાપ્રધાન નરેન્દ્ર મોદીના રાષ્ટ્રને સ્વસ્થ બનાવવાના આહવાનના ભાગરૂપે આરોગ્ય તંત્ર દ્વારા યોજાઇ રહેલ રાજય વ્યાપી આરોગ્ય મેળાઓ (Health fair) અંતર્ગત આણંદ જિલ્લામાં સારસા ખાતેથી આરોગ્ય મેળાનો પ્રારંભ કરાવતાં આરોગ્ય મેળાઓ નાગરિકો માટે નિરોગી જીવન શૈલી અને રોજિંદા જીવનમાં ફેરફારો માટે ઉપકારક સાબિત થશે તેમ જણાવી જિલ્લામાં યોજાઇ રહેલ આરોગ્ય મેળાઓનો લાભ લેવા જિલ્લાના નાગરિકોને અપીલ કરી હતી.

દક્ષિણીએ જિલ્લામાં બ્લોક સ્તરે આરોગ્ય મેળાઓ યોજીને આરોગ્યલક્ષી અનેકવિધ પ્રવૃત્તિઓ યોજીને નાગરિકોને અને રાષ્ટ્રને સ્વસ્થ બનાવવાની દિશામાં આ નવતર પહેલ હોવાનું જણાવી આ આરોગ્ય મેળા દરમિયાન આયુષ્યમાન ભારત ડિજીટલ હેલ્થ મિશન અંતર્ગત યુનિક હેલ્થ કાર્ડ બનાવવાની કામગીરી, પી.એમ.જે.એ.વાય. કાર્ડ આપવાની કામગીરી હાથ ધરવામાં આવશે તેમ જણાવ્યું હતું.

દક્ષિણીએ વધુમાં આ આરોગ્ય મેળાઓ દરમિયાન જુદા જુદા પ્રકારના ચેપી અને બિનચેપી રોગો સંદર્ભે અટકાયતી પગલાંથી નાગરિકોને માહિતગાર કરવામાં આવશે. જયારે તજજ્ઞો દ્વારા તપાસ, સારવાર, દવા, લેબોરેટરી, આયુર્વેદિક દવાઓ, ટી.બી. જનજાગૃતિ, અંગદાન-મહાદાન, મેલેરિયા, કુટુંબ નિયોજનની વિવિધ પધ્ધતિઓની કામગીરી-તપાસ કરવાની સાથે જાણકારી આપવાની અને નાગરિકોમાં આરોગ્ય પ્રતિ જનજાગૃતિ કેળવાય તે માટેની કામગીરી કરવામાં આવનાર હોઇ નાગરિકોએ તેનો મહત્તમ લાભ લેવો જોઇએ તેમ જણાવ્યું હતું.

અત્રે ઉલ્લેખનીય છે કે, સારસા ખાતેથી પ્રારંભ થયેલ આરોગ્ય મેળામાં મોટી સંખ્યામાં નાગરિકોએ હાજર રહ્યા હતા તેમાં પણ ખાસ કરીને ૨૫૦થી વધુ સગર્ભા માતાઓએ આરોગ્ય મેળામાં હાજર રહીને તપાસ કરાવી જરૂરી સારવાર મેળવી આરોગ્ય મેળાનો લાભ લેવા અન્ય મહિલાઓને પ્રેરણા પૂરી પાડી હતી. કલેકટર, જિલ્લા વિકાસ અધિકારી અને મહાનુભાવોના હસ્તે આરોગ્યની સહાય મેળવનાર ચાર લાભાર્થીઓનું પુસ્તક આપી સન્માન કરવામાં આવ્યું હતું.

લાભાર્થીઓએ પોતાનો પ્રતિભાવ આપતા જણાવ્યું હતું કે જિલ્લા આરોગ્ય તંત્ર દ્વારા શ્રેષ્ઠ સુવિધા આપવામાં આવે છે. પ્રારંભમાં સામુહિક આરોગ્ય કેન્દ્રના સુપ્રિન્ટેન્ડન્ટ ડૉ.વિન્સન્ટ ક્રિશ્ચિયને સૌનો આવકાર કરતા રાજય સરકાર દ્વારા યોજવામાં આવેલ આરોગ્ય મેળાનો હેતુ સમજાવી સારસા સી.એચ.સી.ખાતે કરવામાં આવતી આરોગ્યલક્ષી સેવાઓની સવિસ્તાર જાણકારી આપી હતી.

જિલ્લા પંચાયત કારોબારી સમિતિના ચેરમેન પ્રદિપભાઇ પટેલ અને જિલ્લા પંચાયત સદસ્ય હસમુખભાઇ પટેલે પ્રાસંગિક ઉદબોધન કર્યા હતા. આ કાર્યક્રમમાં જિલ્લા વિકાસ અધિકારી મિલિન્દ બાપના, જિલ્લા પંચાયતના ઉપપ્રમુખ સંજયભાઇ પટેલ, સારસા ગ્રામ પંચાયતના સરપંચ કિરીટભાઇ પટેલ, મુખ્ય જિલ્લા આરોગ્ય અધિકારી ર્ડા. એમ.ટી.છારી, જિલ્લા મેલેરીયા અધિકારી આલોક કુલશ્રેષ્ઠ, આરોગ્ય વિભાગના અધિકારીઓ, સગર્ભા સ્ત્રીઓ, આરોગ્ય કર્મીઓ અને મોટી સંખ્યામાં ગ્રામજનો લાભાર્થીઓ હાજર રહયા હતા.

આ પણ વાંચો :મુંબઈની આરે કોલોનીમાં બે સમુદાયો વચ્ચે અથડામણમાં 8 થી 10 લોકો ઘાયલ, હાલ પરિસ્થિતિ નિયંત્રણમાં

પેટ્રોલ-ડીઝલના વધતા ભાવ સામે ST નિગમના કેટલા ડેપોએ Kmpl એવોર્ડ મેળવ્યા