Surat: સુરતથી અમદાવાદ આવતી ટ્રેનમાં આરોપી ચોરીને આપતા અંજામ, અમદાવાદ રેલવે પોલીસે આખી ગેંગને કરી જેલ હવાલે

અમદાવાદ સ્ટેશન વિસ્તારમાં અવાર નવાર મોબાઈલ ચોરીની ઘટના સામે આવતી રહે છે. જોકે આખરે આ આરોપીઓ ઝડપાયા છે. અમદાવાદ રેલવે સ્ટેશન પર આવતા મુસાફરોના મોબાઈલ ચોરી કરતા હતા. રેલવે પોલીસે ચોરી કરતી ટોળકીના પાંચ શખ્સોની ધરપકડ કરી ચોરીના 33 મોબાઈલ કબજે કર્યા છે.

મહત્વનું છે કે મોનારામ રાઠોડ અને સૂરજ સહાની બંને આરોપી સુરતના કીમ વિસ્તારમાંથી મોડી રાત્રે માત્ર અમદાવાદ રેલવે સ્ટેશન પર મોબાઈલ ચોરી કરવા આવતા અને વહેલી સવારે સુરત જતી ટ્રેનમાં પરત જતા રહેતા હતા અને તેમને ચોરેલા મોબાઈલ સલીમ ગરાસીયા નામના ઓલપાડના આરોપીને વેચી દેતા હોવાનું સામે આવ્યું છે.

સાથે જ અમદાવાદના વિજય પટણી અને મહંમદ સોએબ પણ મોબાઈલ અને લેપટોપ ચોરી કરતા અને અંકલેશ્વરના ભરત મકવાણાને વેચી દેતા હોવાનું સામે આવ્યું છે. ઝડપાયેલા આરોપીઓની પૂછપરછ કરતા હકીકત સામે આવી કે ચોરી કરેલા 33 મોબાઇલ છેલ્લા ચાર મહિનામાં ચોરી કરી હતી.

અમદાવાદ રેલવે સ્ટેશન પર આરામ ફરમાવતા વેઇટિંગ એરિયા, ટ્રેનમાં ચડતા ધક્કા મૂકી કરી અને ચાર્જિંગમાં પડેલા મોબાઈલ પરથી માલિકની નજર ચૂકવી ચોરી કરતા હતા. ઝડપાયેલા તમામ આરોપીઓ ચોરી કરેલા મોબાઈલ બિલ વગર માત્ર ત્રણ કે ચાર હજારની નજીક કિંમતમાં અન્ય રાજ્યોના મોબાઈલ દુકાન ધારકો અથવા ચોરીના મોબાઈલ ખરીદતા આરોપીને વહેંચી દેતા હતા.

રેલવે પોલીસે આ તમામ છ આરોપીઓ પાસેથી કુલ ત્રણ લાખ રૂપિયાના મોબાઈલ અને લેપટોપ કબજે કરી તેમના મૂળ માલિકોને સોંપવાની તજવીજ શરૂ કરી છે. નોંધનીય છે કે આ ગેંગ છેલ્લા એક વર્ષ થી અમદાવાદ રેલવે સ્ટેશન પર મુસાફરો રાત્રીના સમયે સૂતા હોય તેવા મુસાફર મોબાઇલની ચોરી કરતા હતા.

આ પણ વાંચો : અંબાજી મંદિરના પ્રસાદના ઘીમાં ભેળસેળ બાદ તંત્ર સફાળુ જાગ્યુ, અમદાવાદમાં હેલ્થ વિભાગના મોટાપાયે દરોડા

રેલવે પોલીસ મથકના ચાલુ વર્ષમાં જ 1000 કરતાં વધુ મોબાઈલ ચોરીની ફરિયાદો નોંધાઈ છે. જેથી ઝડપાયેલ આરોપીઓ પાસેથી અન્ય ગુનાની હકીકત તથા ચોરી માટે તેઓ ક્યારેક ક્યારેક રેલવે સ્ટેશનને આવ્યા છે. તેના સીસીટીવી ફૂટેજ એકઠા કરી અન્ય મોબાઇલ ચોરીના ગુનાનો ભેદ ઉકેલાય તથા ચોરી કરતી અન્ય ગેંગની માહિતી એકઠી કરવા માટેની કાર્યવાહી શરૂ કરી છે. ત્યારે વધુ કેટલા મોબાઇલ ચોરીના ગુના નો ભેદ ઉકેલાય છે તે જોવું મહત્વનું છે.