અમદાવાદના ધંધુકામાં બાઇક વિવાદે લીધો યુવાનનો જીવ, મુખ્ય આરોપીની ધરપકડ, શહેરમાં શાંતિ સ્થાપવા પોલીસ તેનાત

અમદાવાદના ધંધુકામાં બાઇક ઓવરટેક કરવા જેવી નજીવી બાબતે થયેલા વિવાદે ગંભીર સ્વરૂપ ધારણ કરતાં એક યુવાનની હત્યા થઈ છે, જેના પગલે શહેરમાં તણાવનો માહોલ છવાયો છે. પોલીસ દ્વારા તાત્કાલિક કાર્યવાહી કરીને હત્યાના મુખ્ય આરોપીઓની ધરપકડ કરવામાં આવી છે અને શહેરમાં કાયદો તથા વ્યવસ્થા જાળવવા માટે ચુસ્ત બંદોબસ્ત ગોઠવી દેવામાં આવ્યો છે.

પ્રાથમિક માહિતી અનુસાર, આ ઘટનાની શરૂઆત બાઇક અથડાવા જેવી સામાન્ય બાબતથી થઈ હતી. એક મુસ્લિમ યુવાન પોતાની પત્નીને બ્યુટી પાર્લરમાં મૂકીને પરત ફરી રહ્યો હતો, ત્યારે તેની બાઇક અન્ય એક બાઇક સાથે અથડાઈ. આ ઘટના બાદ બંને પક્ષો વચ્ચે સામાન્ય બોલાચાલી થઈ, જે જોતજોતામાં ઝપાઝપીમાં પરિણમી. આ ઝપાઝપી દરમિયાન, એક યુવાનની આંગળીમાં ફ્રેક્ચર થયું. આ ઘટના બાદ તે યુવાન હોસ્પિટલ ગયો હતો.

જોકે, આ બાબત અહીં સમાપ્ત થઈ નહીં. ઇજાગ્રસ્ત યુવાન બાદમાં 10-15 લોકોનું જૂથ બનાવીને બીજા પક્ષના યુવાનના ઘરે પહોંચ્યો. ત્યાં ફરીથી બંને જૂથો વચ્ચે ઉગ્ર ઝપાઝપી થઈ. આ દરમિયાન, જૂથના એક વ્યક્તિએ છરી કાઢી અને તે છરી યુવાનના પગમાં વાગી. છરી વાગવાને કારણે થયેલા વધુ પડતા રક્તસ્રાવથી યુવાનનું ઘટનાસ્થળે જ મૃત્યુ થયું.

આ હત્યાની ખબર પ્રસરતાની સાથે જ ધંધુકામાં બે કોમના ટોળાં સામસામે આવી ગયા હતા. ઉશ્કેરાયેલા ટોળાંએ શહેરના વિવિધ વિસ્તારોમાં દુકાનો અને વાહનોમાં વ્યાપક તોડફોડ કરી હતી અને આગજની પણ કરી હતી, જેના કારણે ભારે નુકસાન થયું હતું.

ઘટનાની ગંભીરતાને પારખીને અમદાવાદ ગ્રામીણ એસપી સહિતનો પોલીસ કાફલો તાત્કાલિક ધંધુકા પહોંચી ગયો હતો. પોલીસ અધિકારીએ જણાવ્યું કે, પોલીસે ઘટનાના 15 થી 20 મિનિટમાં જ હત્યાના મુખ્ય બે આરોપીઓને અટકાયતમાં લીધા હતા અને આગળની કાયદેસરની કાર્યવાહી શરૂ કરી હતી. આ ઉપરાંત, આગજની અને તોડફોડમાં સામેલ લોકોને પણ સીસીટીવી ફૂટેજના આધારે ઓળખી કાઢીને ડિટેન કરવામાં આવ્યા છે.

હાલ ધંધુકા શહેરમાં અજંપાભરી શાંતિ પ્રવર્તી રહી છે. પોલીસ દ્વારા તમામ સંવેદનશીલ વિસ્તારોમાં પેટ્રોલિંગ અને કોમ્બિંગ ઓપરેશન ચાલુ રાખવામાં આવ્યું છે, જેથી કોઈ અનિચ્છનીય બનાવ ન બને. અમદાવાદ ગ્રામીણ એસપીએ સ્પષ્ટ સંદેશ આપ્યો છે કે, “જે પણ કાયદો હાથમાં લેશે, ચાહે તે કોઈ પણ સમુદાયનો હોય, તેની વિરુદ્ધ કડકથી કડક પગલાં લેવામાં આવશે.” પોલીસનું મુખ્ય ધ્યાન અત્યારે હત્યાના કેસની તપાસ પૂરી કરવા અને શહેરમાં કાયમી શાંતિ સ્થાપિત કરવા પર છે. આગજની કરનારાઓ સામે પણ ફરિયાદ નોંધીને તેમની ધરપકડ કરવામાં આવશે.