Rail Coach Restaurants : અમદાવાદ મંડળ ‘રેલ કોચ રેસ્ટોરન્ટ’ લોન્ચ કરવા માટે તૈયાર, જાણો તેની વિશેષતા
હાલમાં મહેસાણા, સાબરમતી, આંબલી રોડ, ભુજ અને ગાંધીધામ રેલવે સ્ટેશનોના સર્ક્યુલેટિંગ વિસ્તારમાં 'રેલ કોચ રેસ્ટોરન્ટ્સ' સ્થાપિત કરવાની તૈયારી ચાલી રહી છે. જેનો સીધો લાભ મુસાફરોને થશે.
પશ્ચિમ રેલવેનું અમદાવાદ મંડળ મુસાફરોની સુવિધાઓને વધુ આધુનિક અને આરામદાયક બનાવવા માટે એક મહત્વપૂર્ણ પગલું ભરી રહ્યું છે. મહેસાણા, સાબરમતી, આંબલી રોડ, ભુજ અને ગાંધીધામ રેલવે સ્ટેશનોના સર્ક્યુલેટિંગ વિસ્તારમાં ‘રેલ કોચ રેસ્ટોરન્ટ્સ’ સ્થાપિત કરવાની તૈયારી ચાલી રહી છે. આ રેસ્ટોરન્ટ્સ ખાસ રૂપે બિનઉપયોગી ટ્રેન કોચને આધુનિક અને સ્ટાઇલિશ વ્હીલ-માઉન્ટેડ રેસ્ટોરન્ટમાં રૂપાંતરિત કરીને બનાવવામાં આવશે.
વિશિષ્ટ સુવિધાઓ
આ અનોખા રેલ કોચ રેસ્ટોરન્ટ્સ ઇન્ડોર અને આઉટડોર ડાઇનિંગ વિકલ્પો સાથે હાજર રહેશે. આ ઉપરાંત:
- વૈભવી અને એર-કન્ડિશન્ડ ભોજન અનુભૂતિ
- આધુનિક ડિઝાઇન સાથે સંશોધિત કોચ
- એટેચ કિચન અને મલ્ટી-ક્યુઝિન મેનૂ
- મુસાફરો માટે આરામદાયક અને આનંદમય પર્યાવરણ
- બાળકો માટે વિશિષ્ટ મનોરંજક ઝોન
અવિરત સેવા અને સરળતા
રેલ કોચ રેસ્ટોરન્ટ્સ 24×7 કાર્યરત રહેશે, જે મુસાફરો અને સ્થાનિક રહેવાસીઓ માટે સાતત્યપૂર્ણ સેવા પૂરી પાડશે. ટેકઅવે કાઉન્ટર દ્વારા ઝડપી ઓર્ડર અને પીક-અપ સુવિધા ઉપલબ્ધ હશે, જેથી મુસાફરો સરળતાથી ભોજન લઈ શકે.
આર્થિક લાભ અને ભવિષ્યની યોજનાઓ
આ રેસ્ટોરન્ટ્સ માટે ટેન્ડર આમંત્રિત કરવામાં આવ્યા છે, જેનાથી નોન-ફેર રેવન્યુ (NFR)માં નોંધપાત્ર વધારો થવાની સંભાવના છે. અમદાવાદ મંડળના વાણિજય પ્રબંધક શ્રી અન્નુ ત્યાગીના જણાવ્યા મુજબ, આ પહેલ પ્રવાસીઓ માટે આરામદાયક અને અનોખી ડાઇનિંગ સુવિધાઓ સુનિશ્ચિત કરવા માટે કરવામાં આવી છે.
નવો પ્રગતિશીલ અભિગમ
બિનઉપયોગી કોચને આધુનિક અને કાર્યક્ષમ રેસ્ટોરન્ટમાં રૂપાંતરિત કરીને, અમદાવાદ મંડળ મુસાફરો માટે લકઝરી અને ઉપયોગિતા સાથે નવીનતા જોડવાનું નવું ધોરણ સ્થાપિત કરી રહ્યું છે. આવનારા સમયમાં વધુ રેલ કોચ રેસ્ટોરન્ટ્સ શરૂ કરવાની યોજના છે, જે મુસાફરો માટે વધુ આરામદાયક અને આનંદમય ભોજન અનુભવ નિશ્ચિત કરશે.
