સ્યુસાઈડ અંગે IITનો નિર્ણય, સેમેસ્ટર પરીક્ષામાં ઘટ્યા પેપર, એપ વિદ્યાર્થીઓના વર્તનને કરશે ટ્રેક

IITમાં વિદ્યાર્થીઓની આત્મહત્યાના વધતા જતા કિસ્સાઓને રોકવા અને વિદ્યાર્થીઓમાં તણાવ ઓછો કરવા માટે IIT મેનેજમેન્ટે મોટો નિર્ણય લીધો છે. આ અંતર્ગત IIT દિલ્હીએ મિડ-સેમેસ્ટર પરીક્ષાઓનો એક સેટ ઘટાડ્યો છે. પ્રથમ મિડ ​​સેમેસ્ટરની પરીક્ષામાં બે સેટ હોય છે. હવે વિદ્યાર્થીઓએ માત્ર એક જ સેટની પરીક્ષા આપવાની રહેશે. 2018 થી 2023 સુધીમાં સરકારી ડેટા અનુસાર ભારતની ટોપ ઉચ્ચ શિક્ષણ સંસ્થાઓમાં આત્મહત્યા દ્વારા થયેલા કુલ 98 મૃત્યુમાંથી ઓછામાં ઓછા 39 મૃત્યુ IITમાં થયા છે.

આ પણ વાંચો : IIT ગાંધીનગરનું ક્રિએટિવ લર્નિંગ સેન્ટર એક જાદુઈ દુનિયા: શિક્ષણ મંત્રી ધર્મેન્દ્ર પ્રધાન

બે સેટની પરીક્ષાઓ થતી હતી

ઇન્ડિયન ઇન્સ્ટિટ્યૂટ ઑફ ટેક્નોલોજી દિલ્હીના ડિરેક્ટર રંગન બેનર્જીના જણાવ્યા અનુસાર IIT દિલ્હીએ તેની મૂલ્યાંકન પ્રણાલીમાં સુધારો કર્યો છે અને વિદ્યાર્થીઓના તણાવને ઘટાડવા માટે મિડ-સેમેસ્ટર પરીક્ષાઓનો સેટ દૂર કર્યો છે. તેમણે કહ્યું કે, અગાઉ એક સેમેસ્ટર દરમિયાન બે સેટની પરીક્ષાઓ થતી હતી. દરેક સેમેસ્ટરના અંતે અંતિમ પરીક્ષાઓ અને અનેક સતત મૂલ્યાંકન પદ્ધતિ હતી.

એક આંતરિક સર્વેક્ષણ હાથ ધર્યું હતું અને તમામ વિદ્યાર્થીઓ અને અધ્યાપકો પાસેથી મળેલા પ્રતિસાદના આધારે, પરીક્ષાનો સમૂહ દૂર કરવાનો નિર્ણય લીધો છે. બેનર્જીએ કહ્યું કે અમને સમજાયું કે પરીક્ષાનું કેલેન્ડર ખૂબ જ વ્યસ્ત હતું અને તેથી વિદ્યાર્થીઓનો બોજ અને તણાવ ઓછો કરવા માટે આવું કર્યું. તેમણે કહ્યું કે આ નિર્ણયને સેનેટ દ્વારા પણ મંજૂરી આપવામાં આવી છે અને તેને વર્તમાન સત્રથી લાગુ કરવામાં આવશે.

એપ વિદ્યાર્થીઓની વર્તણૂક પર રાખશે નજર

IIT મદ્રાસના ડાયરેક્ટર વી. કામકોટીના જણાવ્યા અનુસાર નવા શૈક્ષણિક સત્રથી વિદ્યાર્થીઓની આત્મહત્યા અને ડિપ્રેશનને ઘટાડવા માટે ઘણી પહેલ કરવામાં આવી છે. આ અંતર્ગત આવી એપ બનાવવામાં આવી છે, જે વિદ્યાર્થીઓના વર્તનને ટ્રેક કરશે. આ એપ વિદ્યાર્થીઓના વાલીઓને અઠવાડિયામાં બે વાર બાળકો સાથે વાત કરવા માટે રિમાઇન્ડર પણ મોકલશે. વિદ્યાર્થીઓએ તેમના વાલીઓ સાથે તેમની વાતચીત પણ રેકોર્ડ કરવાની રહેશે.

વિદ્યાર્થીઓ કેટલા દિવસે ક્લાસમાં આવે છે, આ રીતે જાણો

IIT મદ્રાસે ફેસ રેકગ્નિશન એટેન્ડન્સ મેનેજમેન્ટ સિસ્ટમ શરૂ કરી છે. વિદ્યાર્થીઓની હાજરી હવે આ દ્વારા લેવામાં આવશે. આમાં ખાસ વાત એ છે કે જો કોઈ વિદ્યાર્થી બે દિવસ સુધી ક્લાસ કે મેસમાં નહીં આવે તો મેનેજમેન્ટ-વોર્ડનને તેનો મેસેજ મળી જશે. આ સાથે સંસ્થાએ વિદ્યાર્થીઓનો તણાવ ઓછો કરવા માટે મનોવૈજ્ઞાનિકોની એક ટીમ બનાવી છે, જે વિદ્યાર્થીઓ સાથે નિયમિત વાત કરશે.

તમને જણાવી દઈએ કે IIT દિલ્હીમાં B.Tech ફાઈનલ યરના 20 વર્ષના વિદ્યાર્થીએ ગયા મહિને કેમ્પસ હોસ્ટેલમાં આત્મહત્યા કરી લીધી હતી. બીજી તરફ IIT હૈદરાબાદમાં 7 ઓગસ્ટના રોજ 21 વર્ષની વિદ્યાર્થીની મમિતા નાયકે પણ પોતાની હોસ્ટેલમાં ફાંસી લગાવીને આત્મહત્યા કરી લીધી હતી.