ગેસ પેપરથી લઈને પ્રશ્નોના PDF સુધી… NEET પેપર લીક પાછળ કેટલા ખેલાડીઓ અને કેટલા રહસ્યો છુપાયેલા છે?
NEET-UG 2026 પેપર લીક મામલે CBIની તપાસ દરમિયાન અનેક ચોંકાવનારા ખુલાસા થયા છે. ‘ગેસ પેપર’ના નામે લાખો રૂપિયામાં પ્રશ્નપત્ર વેચાયા હોવાના આક્ષેપો વચ્ચે દેશભરમાં વિદ્યાર્થીઓનો રોષ ફાટી નીકળ્યો છે.
દેશભરના 23 લાખથી વધુ વિદ્યાર્થીઓના ભવિષ્ય સાથે જોડાયેલી NEET-UG 2026 પરીક્ષા રદ થયા બાદ હવે પેપર લીક મામલે દરરોજ નવા ખુલાસાઓ સામે આવી રહ્યા છે. CBIની તપાસમાં અત્યાર સુધી અનેક આરોપીઓની ધરપકડ કરવામાં આવી છે, જ્યારે દેશભરમાં વિદ્યાર્થીઓનો વિરોધ પણ યથાવત્ છે. આવો જાણીએ આ સમગ્ર કૌભાંડની મહત્વપૂર્ણ બાબતો.
દિલ્હીમાં NTAના મુખ્યાલય બહાર ABVP અને NSUIના કાર્યકરોએ જોરદાર વિરોધ પ્રદર્શન કર્યું હતું. વિદ્યાર્થીઓનો આરોપ છે કે રાષ્ટ્રીય સ્તરની પરીક્ષાઓમાં વારંવાર થતી ગેરરીતિઓ લાખો વિદ્યાર્થીઓની મહેનત અને ભવિષ્ય પર સીધી અસર કરે છે. પ્રદર્શન દરમિયાન પોલીસ સાથે અથડામણ પણ થઈ હતી અને અનેક વિદ્યાર્થીઓને અટકાયત કરવામાં આવ્યા હતા.
CBI એક્શન મોડમાં: અત્યાર સુધી પાંચ ધરપકડ
આ કેસમાં CBI સંપૂર્ણ એક્શન મોડમાં જોવા મળી રહી છે. એજન્સીએ અત્યાર સુધી પાંચ આરોપીઓને કસ્ટડીમાં લીધા છે. જેમાં મહારાષ્ટ્રના નાસિકમાંથી શુભમ ખૈરનાર, અહિલ્યા નગરથી ધનંજય લોખંડે, પુણેમાંથી મનીષા વાઘમારે તેમજ જયપુર, ગુરુગ્રામ અને નાસિકમાંથી અન્ય આરોપીઓની ધરપકડ કરવામાં આવી છે.
પુણેના DCP વિવેક મસાલે જણાવ્યું કે મનીષા વાઘમારે અગાઉ બ્યુટી પાર્લર ચલાવતી હતી અને છેલ્લા ત્રણ વર્ષથી એક આરોપીના સંપર્કમાં હતી. તેના અને આરોપી વચ્ચે એડમિશન સંબંધિત નાણાકીય લેવડદેવડ પણ થઈ હોવાનું સામે આવ્યું છે.
શુભમ ખૈરનારે કર્યા અનેક ખુલાસા
ધરપકડ કરાયેલા આરોપી શુભમ ખૈરનારે તપાસ દરમિયાન અનેક ચોંકાવનારા ખુલાસા કર્યા છે.
- તેની પાસે NEETનું લીક થયેલું પેપર હતું
- તે અહિલ્યા નગરથી પેપરની નકલ પુણે લઈ ગયો હતો
- ત્યારબાદ પેપર નાસિક પહોંચાડવામાં આવ્યું
- પરીક્ષા પહેલા ત્રણ દિવસ અગાઉ જ પેપર નાસિકમાં પહોંચી ગયું હતું
- નાસિકમાં તેણે હરિયાણાના એક વ્યક્તિને પેપર આપ્યું હતું
- શુભમનો સંપર્ક ઉત્તર પ્રદેશના મોટા નેટવર્ક સાથે હતો
પ્રિન્ટિંગ પ્રેસથી ટેલિગ્રામ ચેનલ સુધી… કેવી રીતે થયું લીક?
તપાસ દરમિયાન ચોંકાવનારી માહિતી સામે આવી છે. નાસિકની એક પ્રિન્ટિંગ પ્રેસમાં પ્રશ્નપત્ર છાપવામાં આવ્યા હતા. શુભમ ખૈરનાર પ્રિન્ટિંગ પ્રક્રિયા સાથે સંકળાયેલો હોવાનું જાણવા મળ્યું છે. અસલી પ્રશ્નોને “ગેસ પેપર” નામ આપવામાં આવ્યું હતું.
આ ગેસ પેપરમાં રહેલા 150 પ્રશ્નો NEETના મૂળ પ્રશ્નપત્ર સાથે મેળ ખાતા હોવાનું બહાર આવ્યું છે. પરીક્ષા પહેલા ત્રણ અઠવાડિયા અગાઉથી જ આ પેપરનું સર્ક્યુલેશન શરૂ થઈ ગયું હતું. ટેલિગ્રામ મારફતે રાજસ્થાન, દિલ્હી, આંધ્ર પ્રદેશ સહિત 10 રાજ્યોમાં આ નેટવર્ક ફેલાયું હતું.
ઓનલાઈન ક્લાસ અને 25 લાખની ડિલ
આ મામલે વધુ એક ચોંકાવનારો ખુલાસો થયો છે. ઓનલાઈન ક્લાસમાં એ જ પ્રશ્નો શીખવવામાં આવ્યા હતા જે લીક થયેલા પેપરમાં હતા. આ ક્લાસ માટે વિદ્યાર્થીઓ પાસેથી 50-50 હજાર રૂપિયા લેવામાં આવતા હતા. વિદ્યાર્થીઓને કહેવામાં આવતું હતું કે “મહત્વપૂર્ણ પ્રશ્નો” સમજાવવામાં આવી રહ્યા છે. માહિતી મુજબ 25 થી 30 લાખ રૂપિયામાં આ “ગેસ પેપર” વેચવામાં આવ્યા હતા.
બે PDF અને 48 કલાકનો ખેલ
તપાસમાં જાણવા મળ્યું છે કે કુલ બે PDF તૈયાર કરવામાં આવ્યા હતા.
- પહેલી PDF કેમિસ્ટ્રીની હતી
- બીજી PDF બાયોલોજીની હતી
- એક PDF હાથથી લખાયેલ હતી
- બીજી PDF સ્કેન કરેલી હતી
- પરીક્ષા પહેલા 48 કલાક અગાઉ આ PDF વહેંચવામાં આવ્યા હતા
મામલો પહોંચ્યો સુપ્રીમ કોર્ટ
FAIMA (ફેડરેશન ઓફ ઓલ ઇન્ડિયા મેડિકલ એસોસિએશન)એ Federation of All India Medical Association દ્વારા Supreme Court of Indiaમાં અરજી દાખલ કરી છે. અરજીમાં સુપ્રીમ કોર્ટની દેખરેખ હેઠળ ફરી પરીક્ષા લેવાની માંગ કરવામાં આવી છે.
જુલાઈમાં ફરી થઈ શકે પરીક્ષા
શિક્ષણ નિષ્ણાતોના મતે નવી પરીક્ષા યોજવા માટે 25 થી 30 દિવસ પ્રશ્નપત્ર તૈયાર કરવામાં અને ત્યારબાદ પ્રિન્ટિંગ પ્રક્રિયામાં લાગી શકે છે. એવી શક્યતા વ્યક્ત કરવામાં આવી રહી છે કે પરીક્ષા જુલાઈમાં લેવામાં આવશે અને પરિણામ ઓગસ્ટ-સપ્ટેમ્બરમાં જાહેર થઈ શકે છે.
જો આવું થાય તો નવા શૈક્ષણિક સત્રની શરૂઆત નવેમ્બર-ડિસેમ્બર સુધી મોડું થઈ શકે છે, જેના કારણે લાખો વિદ્યાર્થીઓનું આખું શૈક્ષણિક વર્ષ પ્રભાવિત થઈ શકે છે.
