ખાંડ અને ચોખા સહિત પ્રોસેસ્ડ ફૂડની નિકાસમાં વધારો થયો, જાણો કયા દેશમાં ભારતીય ઉત્પાદનોની માગ વધી

ચાલુ નાણાકીય વર્ષમાં એપ્રિલ-ડિસેમ્બર દરમિયાન દેશમાંથી કૃષિ અને પ્રોસેસ્ડ ફૂડની નિકાસ 13 ટકા વધીને $19.69 બિલિયન થઈ છે. વાણિજ્ય મંત્રાલયે ગુરુવારે આ માહિતી આપી છે. એગ્રીકલ્ચર એન્ડ પ્રોસેસ્ડ ફૂડ પ્રોડક્શન એક્સપોર્ટ ડેવલપમેન્ટ ઓથોરિટી (APEDA) એ વર્ષ 2022-23 માટે 23.6 બિલિયન ડોલરનું નિકાસ લક્ષ્ય નક્કી કર્યું છે.

ઘઉંની નિકાસ $145.2 મિલિયનથી 4 ટકા વધીને $150.8 મિલિયન થઈ

એપ્રિલ-ડિસેમ્બર દરમિયાન બાસમતી ચોખાની નિકાસ 40.26 ટકા વધીને 3.33 અબજ ડોલર થઈ હતી. આ સમયગાળા દરમિયાન નોન-બાસમતી ચોખાની નિકાસ 3.35 ટકા વધીને $4.66 અબજ થઈ છે. ચાલુ નાણાકીય વર્ષના નવ મહિનાના સમયગાળા દરમિયાન માંસ, ડેરી અને પોલ્ટ્રી ઉત્પાદનોની નિકાસ 0.68 ટકા ઘટીને $3 બિલિયન થઈ છે. મંત્રાલયે જણાવ્યું હતું કે, ચાલુ નાણાકીય વર્ષના 9 મહિનામાં ઘઉંની નિકાસ એપ્રિલ-ડિસેમ્બર 2021માં $145.2 મિલિયનથી 4 ટકા વધીને એપ્રિલ-ડિસેમ્બર 2022માં $150.8 મિલિયન થઈ છે.

યુએઈમાં 2.06 લાખ ટન ખાંડની નિકાસ કરી

ભારતે વર્તમાન માર્કેટિંગ વર્ષ 2022-23માં 9 ફેબ્રુઆરી સુધીમાં 27.83 લાખ ટન ખાંડની નિકાસ કરી છે. બાંગ્લાદેશ અને ઈન્ડોનેશિયા ટોચના નિકાસ બજારો છે. ઓલ ઈન્ડિયા સુગર ટ્રેડ એસોસિએશન (AISTA) એ ગુરુવારે આ માહિતી આપી હતી. AISTAએ જણાવ્યું હતું કે અન્ય દેશોમાં ભારતે વર્તમાન માર્કેટિંગ વર્ષના ઓક્ટોબરથી 9 ફેબ્રુઆરી સુધીમાં જીબુટીમાં 2.47 લાખ ટન, સોમાલિયામાં 2.46 લાખ ટન અને સંયુક્ત આરબ અમીરાતમાં 2.06 લાખ ટન ખાંડની નિકાસ કરી છે.

રેકોર્ડ 36.5 મિલિયન ટનથી ઘટીને 35.8 મિલિયન ટન થવાનો અંદાજ

ખાંડનું માર્કેટિંગ વર્ષ ઓક્ટોબરથી સપ્ટેમ્બર સુધી ચાલે છે. સરકારે માર્કેટિંગ વર્ષ 2022-23ના મે સુધી 60 લાખ ટનની નિકાસને મંજૂરી આપી છે. AISTA મુજબ, મિલોએ આ વર્ષે 1 ઓક્ટોબર, 2022 થી 9 ફેબ્રુઆરી સુધીમાં કુલ 27,83,536 ટન ખાંડની નિકાસ કરી છે. લગભગ 4.24 લાખ ટન ખાંડ શિપમેન્ટ હેઠળ છે, જ્યારે 3.79 લાખ ટન ખાંડ રિફાઇનરીઓને પહોંચાડવામાં આવી છે, જે આ સમયગાળામાં નિકાસ તરીકે ગણવામાં આવે છે.

ખાંડની નિકાસ માર્કેટિંગ વર્ષ 2021-22માં 112 લાખ ટન હતી

વિશ્વના અગ્રણી ખાંડ ઉત્પાદક દેશ ભારતમાંથી ખાંડની નિકાસ માર્કેટિંગ વર્ષ 2021-22માં 112 લાખ ટન હતી. AISTAના પ્રારંભિક અંદાજ મુજબ, 2022-23 માર્કેટિંગ વર્ષ દરમિયાન ખાંડનું ઉત્પાદન અગાઉના વર્ષના 36.5 મિલિયન ટનના રેકોર્ડથી ઘટીને 35.8 મિલિયન ટન થવાની ધારણા છે.

ઈનપુટ – ભાષા