ભરૂચ SOGએ MD ડ્રગ્સ ઝડપી પાડ્યું, હાઈ પ્રોફાઈલ નબીરાઓ માટે ડ્રગ્સ લઈ જતો કેરિયર ઝડપાયો

ભરૂચ એસ.ઓ. જી. એ નેશનલ હાઇવે ૪૮ ઉપરથી ડ્રગ્સ કેરિયરને ઝડપી પાડી મેફેડ્રિન – MD ડ્રગ્સ કબ્જે કર્યું છે. નશીલો પદાર્થ મુંબઈથી ભરૂચના હાઈપ્રોફાઈલ નબીરાઓ માટે લાવવામાં આવતો હતો જેને પ્રતિગ્રામ ૩ થી ૫ હજાર રૂપિયાની કિંમતે વેચવામાં આવતું હતું. પોલીસે કેરિયરની ધરપકડ કરી નેટવર્કની અન્ય કડીઓની માહિતી બહાર લાવવા પૂછપરછ શરુ કરી છે.

ભરૂચ એસઓજી પીઆઈ પી એન પટેલને નેશનલ હાઇવે ઉપરથી ડ્રગ્સની ડિલિવરી આપવા ભરૂચમાં આવતો હોવાની બાતમી મળતા પીએસ આઈ એમ આર શકોરીયા અને એન જે ટાપરીયાએ ટિમ સાથે વોચ ગોઠવી શકમંદને ઝડપી પાડી તલાશી લીધી હતી. તાપસ દરમ્યાન આ શક્શ પાસેથી ૪૩.૪૦ ગ્રામ મેફેડ્રોન ડ્રગ મળી આવ્યું હતું. અટકાયત કરી પોલીસ સ્ટેશન લાવવામાં આવતા તેને પોતાનું નામ ઈકરામ યુસુફ પટેલ હોવાનું જણાવ્યું હતું જે મૂળ ભરૂચના કંથારીયા ગામનો છે અને મુંબઈમાં રહી ડ્રગના કેરિયરનું કામ કરે છે.

પોલીસે ૪.૩૭ લાખની કિંમતનું ૪૩.૪૦ ગ્રામ ડ્રગ્સ કબ્જે કરી ઈકરામની પૂછપરછ શરુ કરી છે. પ્રાથમિક તપાસમાં આ નશીલો પદાર્થ ભરૂચના હાઈપ્રોફાઈલ નબીરાઓ માટે લાવવામાં આવતો હોવાનું જાણવા મળી રહ્યું છે. પોલીસ નેટવર્કને લઇ હજુ સત્તાવાર કઈ બોલવા તૈયાર નથી પરંતુ ભરૂચમાંથી ડ્રગ નેટવર્કની અન્ય કડીઓ હોવાનો પોલીસ ઇન્કાર કરી રહી નથી. આગામી સમયમાં ડ્રગ્સ નેટવર્ક સંદર્ભે ધરપકડનો દોર ચાલે તેમ લાગી રહયુ છે.