Corona Updates: કોરોનાના 15754 નવા કેસ નોંધાયા, એક્ટિવ કેસ એક લાખથી વધુ

Corona Updates: ભારતમાં એક જ દિવસમાં કોરોના વાયરસ (Corona virus) સંક્રમણના 15,754 નવા કેસ નોંધાયા છે. ત્યારબાદ દેશમાં સંક્રમિતોની સંખ્યા વધીને 4,43,14,618 થઈ ગઈ છે.સારવાર હેઠળ રહેલા દર્દીઓની સંખ્યા વધીને 1,01,830 પર પહોંચી છે. કેન્દ્રિય સ્વાસ્થય મંત્રાલય દ્વારા શુક્રવાર સવારે 8 વાગ્યે જાહેર કરાયેલા આંકડા અનુસાર દેશમાં સંક્રમણથી 47 લોકોના મોત થયા છે. ત્યારબાદ મૃત્યુઆંકની સંખ્યા વધીને 5,27,253 થઈ છે.દેશમાં કોવિડ-19 સારવાર હેઠળ રહેલા દર્દીઓની સંખ્યા વધીને 1,01,830 થઈ છે. જે કુલ કેસના 0.23 ટકા છે. છેલ્લા 24 કલાકમાં 647 દર્દીઓ સ્વસ્થ થયા છે. દર્દીઓનો સ્વસ્થ થવાનો રાષ્ટ્રીય દર 98.58 ટકા છે. કોવિડ-19 (Covid-19)ના સારવાર હેઠળ રહેલા દર્દીઓની સંખ્યામામ છેલ્લા 24 કલાકમાં 487નો વધારો થયો છે

કોરોના રસીકરણ કેન્દ્રો પર બૂસ્ટર ડોઝ ઉપલબ્ધ

Corbevax રસીનો બૂસ્ટર ડોઝ આજથી કોરોના રસીકરણ કેન્દ્રો પર ઉપલબ્ધ થશે. તેની ઉપલબ્ધતા કોવિન એપ પર ખાનગી અને સરકારી રસીકરણ કેન્દ્રો પર પણ જોઈ શકાશે. રસી ઉત્પાદક બાયોલોજિકલ ઇ લિમિટેડે જણાવ્યું હતું કે કેન્દ્ર સરકારને રસીના 10 કરોડ ડોઝ સપ્લાય કરવામાં આવ્યા છે. Corbevax ને 18 વર્ષ અને તેથી વધુ ઉંમરના લોકો માટે કોરોના બૂસ્ટર શૉટ તરીકે મંજૂરી આપવામાં આવી છે. એટલે કે કોર્બેવેક્સનો બૂસ્ટર એવા લોકોને ત્રીજા ડોઝ તરીકે આપી શકાય જેમણે અગાઉ કોવિશિલ્ડ અને કોવેક્સિન બંને ડોઝ લીધા છે. આરોગ્ય મંત્રાલયે પણ NEAGI ની ભલામણને પગલે Corbevax ના ઈમરજન્સી ઉપયોગને મંજૂરી આપી છે. ખાનગી કેન્દ્રો પર કોર્બેવેક્સના એક ડોઝની કિંમત રૂ. 250 છે.

સૌરાષ્ટ્રમાં પણ લમ્પી વાયરસ

બીજી બાજુ ગુજરાતમાં (Gujarat) લમ્પી વાયરસનો (Lumpy virus) કેર યથાવત છે. અત્યાર સુધીમાં 23થી વધુ જિલ્લામાં લમ્પી વાયરસ પહોંચી ચુક્યો છે. લમ્પી વાયરસના સૌથી વધુ કેસ કચ્છ જિલ્લામાં નોંધાયા છે. સૌરાષ્ટ્રમાં પણ લમ્પી વાયરસના કેસ જોવા મળી રહ્યા છે. ભાવનગર (Bhavnagar), રાજકોટ, બનાસકાંઠામાં લમ્પી વાયરસના કેસમાં વધારો નોંધાઇ રહ્યો છે. ત્યારે લમ્પી વાયરસનું સંક્રમણ વધુ ન ફેલાય તે માટે સરકાર દ્વારા પ્રયાસો હાથ ધરવામાં આવ્યા છે. પશુઓના વેકસીનેશન (Vaccination), દવાઓના છંટકાવ સહિતની કામગીરી હાથ ધરવામાં આવી છે.