Share Market : દિવાળીમાં શેરબજાર તેજીનો નવો રેકોર્ડ બનાવે તેવું અનુમાન, શું છે નિષ્ણાંતોનો અભિપ્રાય?

શેરબજાર(Share Market)માં રોકાણ કરનારા લોકો હાલમાં એ વિચારી રહ્યા છે કે છેલ્લા કેટલાક દિવસોથી એક રેન્જમાં નજરે પડતું બજાર કઈ દિશામાં આગળ વધશે. બજાર ઉપર જશે કે નીચે? જાણકારોનું માનવું છે કે બજારમાં તેજી જોવા મળી રહી છે અને દિવાળી સુધીમાં નવી ઊંચી સપાટી બનાવશે. આમ થશે તો રોકાણકારોની ખુશીનો પાર  નહિ રહે. એન્જલ વનના સમીત ચવ્હાણે બજારના ભાવિ અંદાજ પર વાતચીત કરતા બજારની સંભાવનાઓ, નિફ્ટીની સ્થિતિ, IT ક્ષેત્ર વગેરે વિશે જણાવ્યું હતું કે સપ્ટેમ્બરમાં નિફ્ટી 50 વિક્રમી ઊંચાઈ પર પહોંચશે તેવી અપેક્ષા રાખવાને બદલે જો આપણે અપેક્ષા રાખીએ કે નિફ્ટી દિવાળી સુધીમાં નવી ઊંચી સપાટીએ પહોંચશે તો તે વધુ યોગ્ય અનુમાન ગણાશે.

તેણે વધુમાં કહ્યું કે છેલ્લા કેટલાક મહિનાઓ દરમિયાન અમને મિડ અને સ્મોલકેપ બાજુથી ખૂબ સારું પ્રદર્શન જોવા મળ્યું છે. આ સૂચકાંકોની કિંમતનું માળખું ખૂબ જ મજબૂત દેખાય છે. આવી સ્થિતિમાં સ્મોલકેપ અને મિડકેપમાં તેજી જોવા મળી શકે છે. ઇક્વિટી માર્કેટમાં 15 વર્ષથી વધુનો અનુભવ ધરાવતા સમિત ચવ્હાણ કહે છે કે આ સમયે માત્ર એક જ સેક્ટર છે જેનાથી આપણે દૂર રહેવાની જરૂર છે અને તે મેટલ સેક્ટર છે. મેટલ સેક્ટરના શેરો ભાવની દૃષ્ટિએ ખૂબ જ આકર્ષક દેખાઈ રહ્યા હોવા છતાં કોમોડિટીની આસપાસની અનિશ્ચિતતા સંપૂર્ણપણે દૂર ન થાય ત્યાં સુધી આપણે આ શેરોથી દૂર રહેવાની જરૂર છે.

બજાર કરેક્શનના સમયગાળામાંથી પસાર થઈ રહ્યું છે

બજારની આગળની મુવમેન્ટ વિશે વાત કરતાં તેમણે કહ્યું કે હાલમાં માર્કેટ 15,200ની નીચી સપાટીથી રેલી બાદ સમયના કરેક્શનમાંથી પસાર થઈ રહ્યું છે. આવા કોન્સોલિડેશનની સ્થિતિમાં બજાર આ તબક્કામાંથી ક્યારે બહાર આવશે તેની આગાહી કરવી સામાન્ય રીતે ખૂબ મુશ્કેલ છે. આવી સ્થિતિમાં સપ્ટેમ્બરમાં નિફ્ટી 50 વિક્રમી સપાટીએ પહોંચશે તેવી અપેક્ષા રાખવાને બદલે જો આપણે અપેક્ષા રાખીએ કે નિફ્ટી દિવાળી સુધીમાં નવી ઊંચી સપાટીએ પહોંચશે તો તે વધુ સચોટ અનુમાન હશે. અમને આશા છે કે ટૂંક સમયમાં નિફ્ટી તેની સંકુચિત શ્રેણીમાંથી બહાર આવી શકશે. તે પછી તે તેની અગાઉની ઊંચી સપાટીને તોડી નાખશે અને પછી તે નવી ઊંચાઈ સ્થાપિત કરતી જોવા મળશે. દિવાળી સુધી આવું થતું જોવા મળી શકે છે.