Stock Market: જાણો આ સપ્તાહે સેન્સેક્સ-નિફ્ટી વધશે કે ઘટશે? તમારા પોર્ટફોલિયો પર કેવી રહેશે અસર
Stock Market Update: જો તમે આ અઠવાડિયે શેરબજારમાં નાણાંનું રોકાણ કરવાનું વિચારી રહ્યા છો તો તે પહેલાં જાણી લો કે આ અઠવાડિયે સેન્સેક્સ-નિફ્ટીમાં કેવી રીતે ટ્રેડિંગ થવાનું છે?
જો તમે આવતા અઠવાડિયે શેરબજારમાં નાણાંનું રોકાણ કરવાનું વિચારી રહ્યા છો, તો તે પહેલાં જાણી લો કે આવતા સપ્તાહે સેન્સેક્સ-નિફ્ટીમાં કેવી રીતે ટ્રેડિંગ થશે? શું ભવિષ્યમાં પણ બજારમાં ઘટાડો જોવા મળશે કે પછી રોકાણકારોને થોડી રાહત મળશે. આ સપ્તાહના વૈશ્વિક સંકેતો અને FIIનો ટ્રેન્ડ બજારની ચાલ નક્કી કરશે. આ સિવાય માસિક ડેરિવેટિવ સેટલમેન્ટના કારણે સ્થાનિક બજારોમાં વોલેટિલિટી જોવા મળી શકે છે. બજાર (Stock Market)ના નિષ્ણાતોએ આ અભિપ્રાય વ્યક્ત કર્યો છે.
5 અઠવાડિયાના ઘટાડા પછી નિફ્ટીમાં વધારો નોંધાયો હતો
સ્વસ્તિક ઇન્વેસ્ટમાર્ટના રિસર્ચ હેડ સંતોષ મીનાએ જણાવ્યું હતું કે છેલ્લા કેટલાક સત્રોમાં સ્થાનિક બજારોમાં ઘણી વોલેટિલિટી જોવા મળી છે. જોકે, પાંચ સપ્તાહના ઘટાડા પછી નિફ્ટીમાં ત્રણ ટકાનો વધારો જોવા મળ્યો છે.
ભારતીય બજાર સારી સ્થિતિમાં છે
મીનાએ કહ્યું કે વૈશ્વિક અર્થતંત્રમાં ફુગાવો અને વિશ્વભરના બજારોમાં સુસ્તી ચિંતાનો વિષય છે. જેના કારણે વિદેશી સંસ્થાકીય રોકાણકારો વેચી રહ્યા છે. જોકે, સ્થાનિક રોકાણકારોના સમર્થનને કારણે ભારતીય બજારો સારી સ્થિતિમાં છે.
ડૉલર ઇન્ડેક્સ દિશા આપશે
તેમણે કહ્યું કે માસિક ડેરિવેટિવ કોન્ટ્રાક્ટના સેટલમેન્ટને કારણે આ સપ્તાહે સ્થાનિક બજારોમાં થોડી અસ્થિરતા જોવા મળશે. વૈશ્વિક મોરચે ફેડરલ ઓપન માર્કેટ કમિટીની બેઠકની વિગતો 25 મેના રોજ જાહેર કરવામાં આવશે, જે બજારના દૃષ્ટિકોણથી ખૂબ જ મહત્વપૂર્ણ રહેશે. આ સિવાય ડોલર ઈન્ડેક્સનો ટ્રેન્ડ બજારને દિશા આપવામાં મહત્વની ભૂમિકા ભજવશે.
જાણો શું છે નિષ્ણાતોનો અભિપ્રાય?
સેમકો સિક્યોરિટીઝના ઇક્વિટી રિસર્ચ હેડ યેશા શાહે જણાવ્યું હતું કે “બજાર ગયા અઠવાડિયે અસ્થિર હતું. મેક્રો ઈકોનોમિક ડેટા, વર્તમાન ત્રિમાસિક પરિણામોની સિઝન અને ડેરિવેટિવ્ઝ સેટલમેન્ટને કારણે આ વલણ ચાલુ સપ્તાહે ચાલુ રહેવાની શક્યતા છે.
સેન્સેક્સ-નિફ્ટીમાં ઉછાળો
ગયા અઠવાડિયે, 30 શેરો ધરાવતો BSE સેન્સેક્સ 1,532.77 પોઈન્ટ અથવા 2.90 ટકા વધ્યો હતો. તે જ સમયે, નેશનલ સ્ટોક એક્સચેન્જનો નિફ્ટી 484 પોઈન્ટ અથવા 3.06 ટકા ઉછળ્યો હતો.
આ કંપનીઓના ત્રિમાસિક પરિણામો આવશે
તમને જણાવી દઈએ કે આ સપ્તાહ દરમિયાન SAIL, Zomato, Adani Ports, Deepak Fertilizers, InterGlobe Aviation, Hindalco, NMDC, GAIL અને ગોદરેજ ઇન્ડસ્ટ્રીઝના ત્રિમાસિક પરિણામો આવશે. રેલિગેર બ્રોકિંગના વાઇસ પ્રેસિડેન્ટ રિસર્ચ અજિત મિશ્રાએ જણાવ્યું હતું કે આગળ જતાં વૈશ્વિક વલણ, ત્રિમાસિક પરિણામોનો અંતિમ તબક્કો અને રશિયા-યુક્રેન યુદ્ધ બજારની દિશાને અસર કરશે.