હવે જુના વાહનો રાખવાનું મોંઘું પડશે, જાણો તેનું કારણ શું છે

vehicle scrappage policy : દેશમાં હવાનું પ્રદૂષણ ફરી એક વખત તેના ખરાબ સ્તરે પહોંચી ગયું છે. સરકાર આ સમસ્યા નિવારવા માટે સતત પ્રયાસ કરી રહી છે. આ પ્રયત્નો હેઠળ સરકાર જૂના વાહનો માટે અનેક યોજનાઓ લઈને આવી રહી છે. તાજેતરમાં બજેટમાં જૂના વાહનો અંગે સ્ક્રેપ નીતિ સહિતની ઘોષણા કરવામાં આવી હતી. વર્ષોના ઇંતેજાર બાદ આખરે હવે તેનો અમલ થવા જઈ રહ્યો છે.

અહેવાલોમાં એવો દાવો કરવામાં આવ્યો છે કે સરકાર 15 વર્ષથી વધુ જૂનાં વાહનો માટે નોંધણીનું સર્ટિફિકેટ રીન્યુઅલ કરવાની કિંમત વધારવાનું વિચારી રહી છે. ખાનગી વાહનો સાથે જૂના વ્યાપારી વાહનો માટે ફિટનેસ પ્રમાણપત્ર ફીમાં પણ વધારો કરવામાં આવશે. નવી સ્ક્રેપ નીતિના અમલમાં થોડા વર્ષોનો સમય લાગશે.

જુના વાહનોના રજિસ્ટ્રેશનના રીન્યુઅલ માટેની ફીમાં વધારો વાહન સ્ક્રેપિંગ નીતિનો એક ભાગ હશે, જે કેન્દ્રીય બજેટ 2021 ના ​​ભાગ રૂપે જાહેર કરાઈ હતી. એક મીડિયા રિપોર્ટ અનુસાર, એક અધિકારીએ જણાવ્યું છે કે “વાહનોના ફરીથી નોંધણીમાં વધારો થશે. જુદા જુદા કેટેગરીનાં વાહનો માટે ભાડા અલગ અલગ હશે અને મધ્યમથી ભારે વેપારી વાહનોમાં સૌથી વધુ વધારાનો સામનો કરવો પડશે.

તેમણે ઉમેર્યું હતું કે “વિવિધ કેટેગરીના અંતિમ દર સ્લેબ અંગે હજી ચર્ચા થવાની બાકી છે.” રિપોર્ટમાં દાવો કરવામાં આવ્યો છે કે એક અંદાજ મુજબ 15 વર્ષ જુના કમર્શિયલ વાહનની ફી એક કેબ માટે 7,500 રૂપિયા કરી શકાય છે જ્યારે એક ટ્રક માટે તે લગભગ 12,500 રૂપિયા હશે. જોકે સત્તાવાર આંકડો હજુ જાહેર કરાયો નથી.