પીયૂષ ગોયલે કહ્યું- રબર ઉત્પાદનમાં હબ તરીકે ઉભરી આવશે પુર્વોત્તર, 2 લાખ હેક્ટરમાં વાવેતરની યોજના
ગોયલે કહ્યું કે આગામી 5 વર્ષમાં સરકારે પૂર્વોત્તર રાજ્યોમાં 2 લાખ હેક્ટરમાં રબરનું વાવેતર કરવાની યોજના બનાવી છે. ત્રિપુરા 30,000 હેક્ટર વિસ્તાર સાથે દેશમાં રબરનું બીજા નંબરનું સૌથી મોટું ઉત્પાદક છે.
કેન્દ્રીય મંત્રી પીયૂષ ગોયલે (Union Minister Piyush Goyal) કહ્યું છે કે પૂર્વોત્તર ક્ષેત્ર રબર ઉત્પાદન માટે હબ તરીકે ઉભરી શકે છે. ગોયલે કહ્યું કે આગામી પાંચ વર્ષમાં સરકારે ઉત્તર પૂર્વીય રાજ્યોમાં કુલ 2 લાખ હેક્ટરમાં રબરના વાવેતરની યોજના બનાવી છે. ગુરુવારે વિડિયો કોન્ફરન્સિંગ દ્વારા ‘ડેસ્ટિનેશન-ત્રિપુરા-ઈન્વેસ્ટમેન્ટ સમિટ’ને સંબોધતા પીયૂષ ગોયલે જણાવ્યું હતું કે ત્રિપુરા દેશમાં 30,000 હેક્ટર ખેતી હેઠળના વિસ્તાર સાથે રબરનું બીજું સૌથી મોટું ઉત્પાદક છે.
ગોયલે રાજ્ય સરકારને આ દિશામાં ઝડપી પગલાં ભરવા અને રાજ્યમાં રબરના વાવેતરને વિસ્તારવા હવામાનને કારણે વહેલી ખેતીની તકનો લાભ લેવા અપીલ કરી હતી. ઓટોમોટિવ ટાયર મેન્યુફેક્ચરર્સ એસોસિએશન (ATMA) નું પ્રતિનિધિત્વ કરતી ચાર અગ્રણી ટાયર કંપનીઓએ સાથે મળીને પાંચ વર્ષના સમયગાળામાં ઉત્તરપૂર્વ ભારતના સાત રાજ્યોમાં 2,00,000 હેક્ટર જમીનમાં રબરના વાવેતરના વિકાસ માટે 1,000 કરોડ રૂપિયાનું યોગદાન આપવાનું વચન આપ્યું છે.
રબર બોર્ડ અને ATMA વચ્ચે 1 માર્ચ, 2021ના રોજ એક એમઓયુ પર હસ્તાક્ષર કરવામાં આવ્યા હતા. ભાગ લેનાર ટાયર કંપનીઓએ મળીને 20 મે 2021ના રોજ રબર બોર્ડ દ્વારા સ્થપાયેલા ખાતામાં 12 કરોડ રૂપિયા ટ્રાન્સફર કર્યા હતા. ટાયર કંપનીઓ દ્વારા પ્રદાન કરવામાં આવેલ ભંડોળનો ઉપયોગ 2021 માં વાવેતર શરૂ કરવા માટે વાવેતર સામગ્રી મેળવવા માટે કરવામાં આવી રહ્યો છે.
‘ત્રિપુરાને વાંસમાં આત્મનિર્ભર બનાવવાની સંભાવના’
ઉત્તર પૂર્વીય રાજ્યોમાં વાંસની ખેતી એ અન્ય મુખ્ય સ્ત્રોત છે તેની નોંધ લેતા, ગોયલે કહ્યું કે ત્રિપુરા વાંસના ફ્લોરિંગનું સૌથી મોટું એકમ છે. તેમણે કહ્યું, “ત્રિપુરામાં અગરબત્તી ઉદ્યોગ માટે દેશના હબ તરીકે ઉભરી આવવાની અને ભારતને વાંસમાં આત્મનિર્ભર બનાવવાની ક્ષમતા છે, જેને ઘણીવાર ગ્રીન ગોલ્ડ ઇન્ડસ્ટ્રી કહેવામાં આવે છે.”
પૂર્વોત્તરને ભારતના અષ્ટ-લક્ષ્મીમાં પરિવર્તિત કરવાની વડાપ્રધાન નરેન્દ્ર મોદીની અપીલનો ઉલ્લેખ કરતાં ગોયલે કહ્યું કે, વડાપ્રધાને ‘ફોકસ નોર્થ-ઈસ્ટ’ કાર્યક્રમને પ્રાથમિકતા આપી છે અને અહીં ‘મેક ઈન ઈન્ડિયા’ કાર્યક્રમને ‘મેક ઈન નોર્થ-ઈસ્ટ’ કાર્યક્રમ તરીકે લાગુ કરવામાં આવ્યો છે. તેમણે કહ્યું કે,”ઈન્વેસ્ટ ઈન્ડિયાનું એક સમર્પિત ઉત્તર-પૂર્વ ડેસ્ક સ્થાપિત કરવામાં આવ્યું છે જેણે ઈન્ફ્રાસ્ટ્રક્ચરમાં સુધારો કર્યો છે અને ઉદ્યોગને વેગ આપ્યો છે.”
‘ઉત્તર પૂર્વમાં એગ્રો ટેક્સટાઈલને પ્રોત્સાહન આપી રહ્યુ છે કેન્દ્ર’
કેન્દ્રીય મંત્રીએ કહ્યું, “કેન્દ્ર તેની સમર્પિત યોજનાઓ દ્વારા ઉત્તર-પૂર્વ ક્ષેત્રમાં એગ્રો-ટેક્સટાઇલ અને જીઓટેકનિકલ કાપડના ઉપયોગને પ્રોત્સાહિત કરી રહ્યું છે.” તેમણે કહ્યું, “હવાઈ, રેલ અને માર્ગ અને જળમાર્ગ દ્વારા વધુ સારી કનેક્ટિવિટી સાથે, રાજ્યની કહેવાતી અલગતા હવે ભૂતકાળ બની ગઈ છે. આ રાજ્ય હવે મલ્ટિ-મોડલ કનેક્ટિવિટીનો અભિન્ન ભાગ બની ગયું છે.”
ગોયલે કહ્યું કે 972 કરોડ રૂપિયાનો ક્રોસ બોર્ડર અગરતલા-અખૌરા (બાંગ્લાદેશ) રેલ પ્રોજેક્ટ નિકાસને વેગ આપવા માટે મદદ કરશે. તેમણે કહ્યું કે, અગરતલા એરપોર્ટ ઉત્તર પૂર્વ ક્ષેત્રમાં બીજા સૌથી વ્યસ્ત એરપોર્ટ તરીકે ઉભરી આવવા સાથે, ત્રિપુરા ઉત્તર પૂર્વના પ્રવેશદ્વાર તરીકે કાર્ય કરશે.
સિંગલ વિન્ડો પોર્ટલ – સ્વાગત, મૂડી સબસિડી (30 ટકા), પાવર સબસિડી (50 ટકા), રાજ્ય જીએસટીની સંપૂર્ણ ભરપાઈ અને 4 ટકા વ્યાજ સબવેન્શન સહિત રોકાણને પ્રોત્સાહન આપવા માટે રાજ્ય સરકારની પહેલની પ્રશંસા કરતા, ગોયલે તેને “દેશના શ્રેષ્ઠ રોકાણ પેકેજોમાંનું એક” ગણાવ્યું. ઇન્વેસ્ટમેન્ટ સમિટ ત્રિપુરાને તેની સાચી ક્ષમતાનો અહેસાસ કરવામાં મદદ કરશે તેમ જણાવતા, ગોયલે આશા વ્યક્ત કરી હતી કે આ કોન્ફરન્સ રાજ્યની વિકાસ યાત્રામાં રોકાણકારોને ભાગીદાર બનાવવામાં મદદ કરશે.
Latest News Updates
