મધર ડેરીની મોટી જાહેરાત, ફરી વધી શકે છે દૂધ અને દહીંના ભાવ, આપ્યું આ કારણ

ડેરી ઉત્પાદનો(Dairy products)નો વ્યવસાય કરતી કંપની મધર ડેરી આગામી કેટલાક મહિનામાં દૂધ અને દહીંના ભાવમાં વધારો કરી શકે છે. એવો સંકેત કંપનીના અધિકારીએ આપ્યો છે. મધર ડેરીએ તાજેતરમાં દૂધ, દહીં, છાશ વગેરેના ભાવમાં વધારો કર્યો હતો. તેની પાછળનું કારણ ખર્ચના ભાવમાં વધારો દર્શાવવામાં આવ્યો હતો. ડીઝલના ભાવ વધારાના કારણે ટ્રાન્સપોર્ટેશનનો ખર્ચ વધી ગયો હોવાનું પણ જણાવાયું હતું. તેથી દર વધારવા સિવાય બીજો કોઈ વિકલ્પ નથી. કંપનીનું એમ પણ કહેવું છે કે દૂધ અને દહીં જેવા ડેરી ઉત્પાદનોના ભાવમાં વધારાનો ફાયદો તે ખેડૂતોને પણ થાય છે જે મધર ડેરી(Mother Dairy)માં પોતાનો માલ વેચે છે.

આ સાથે મધર ડેરીએ આશા વ્યક્ત કરી છે કે ચાલુ નાણાકીય વર્ષમાં તેના વેચાણમાં 20 ટકાનો વધારો થઈ શકે છે અને ટર્નઓવર 15,000 કરોડ રૂપિયા સુધી જઈ શકે છે. દૂધ અને ડેરી ઉત્પાદનો ઉપરાંત, મધર ડેરી ફળો અને શાકભાજીનો વ્યવસાય પણ કરે છે. મધર ડેરી એ નેશનલ ડેરી ડેવલપમેન્ટ બોર્ડની પેટાકંપની છે, જેણે વર્ષ 2021-22માં રૂ. 12,500 કરોડનું વેચાણ કર્યું હતું.

વેચાણ વધવાની અપેક્ષા

મધર ડેરીના મેનેજિંગ ડિરેક્ટર મનીષ બંદલીશ વેચાણમાં વધારા વિશે કહે છે કે, ચાલુ નાણાકીય વર્ષમાં દૂધ અને ડેરી ઉત્પાદનોની માગમાં 15 ટકાથી વધુનો વધારો જોવા મળી રહ્યો છે, જેનાથી મધર ડેરીને ફાયદો થશે. મધર ડેરીનો 70 ટકા બિઝનેસ માત્ર દૂધ અને ડેરી ઉત્પાદનોનો છે. બંદલીશ કહે છે કે આ વર્ષે આઈસ્ક્રીમનું વેચાણ પણ બમ્પર થવાની ધારણા છે કારણ કે તેનો બિઝનેસ કોરોનામાં અટકી ગયો હતો. તબિયત બગડવાના ડરથી લોકોએ આઈસ્ક્રીમ ખરીદવાનું બંધ કરી દીધું હતું. છેલ્લા બે વર્ષમાં તેના વેચાણમાં ભારે ઘટાડો થયો છે.

મધર ડેરીના એમડીના જણાવ્યા અનુસાર, ફળો, શાકભાજી અને ખાદ્ય તેલના વ્યવસાયમાં 30% વૃદ્ધિ જોવા મળી રહી છે. તેઓ માને છે કે મધર ડેરીની ઈ-કોમર્સ કંપનીઓ સાથે મોટી સ્પર્ધા છે અને તે ઘણા પડકારોનો સામનો કરી રહી છે. આ બધી બાબતો છતાં ફળ, શાકભાજી અને ખાદ્યતેલનો કારોબાર મજબૂત રહ્યો છે.

ગયા મહિને ભાવમાં વધારો થયો હતો

એક અંદાજ મુજબ, દિલ્હી-એનસીઆરના ખેડૂતો દરરોજ 90 લાખ લિટર દૂધ સપ્લાય કરે છે જેમાં મધર ડેરી અને અમૂલનો 40-40 ટકા હિસ્સો છે. મધર ડેરી ઉત્તર પ્રદેશ, રાજસ્થાન, આંધ્રપ્રદેશ જેવા રાજ્યોમાંથી દૂધ ખરીદે છે. ગયા મહિને મધર ડેરીએ દૂધના ભાવમાં પ્રતિ લિટર રૂ. 2 સુધીનો વધારો કર્યો હતો. આ વધારો દિલ્હી-એનસીઆરમાં કરવામાં આવ્યો હતો.

કંપનીએ કહ્યું કે ખેડૂતો પાસેથી મોંઘા ભાવે દૂધ લેવામાં આવી રહ્યું છે અને તેની કિંમત પણ વધી ગઈ છે. વાહનવ્યવહારનો ખર્ચ વધ્યો છે, સાથે પશુઓના ચારા અને અનાજના ભાવમાં પણ વધારો થયો છે. અગાઉ માર્ચમાં મધર ડેરીએ દૂધના ભાવમાં પ્રતિ લિટર બે રૂપિયાનો વધારો કર્યો હતો.

ખર્ચની કિંમતમાં થયેલા વધારાની અસર

મધર ડેરીના એમડીનું કહેવું છે કે દૂધના ભાવમાં વધારો કરવાનું વિચારી શકાય. જો કે, વધારો આટલો ઝડપથી થશે નહીં અને તેમાં ત્રણ-ચાર મહિનાનો સમય લાગી શકે છે. કંપની હાલમાં ફીડની કિંમત અને પરિવહન ખર્ચ જેવા ખર્ચ મૂલ્યો પર ધ્યાન આપી રહી છે. મધર ડેરી પાસે 9 ડેરી પ્રોસેસિંગ પ્લાન્ટ છે. આ સિવાય થર્ડ પાર્ટી સર્વિસ પણ લેવામાં આવે છે. મધર ડેરી દરરોજ 50 લાખ લિટરથી વધુ દૂધની પ્રક્રિયા કરે છે.