ફુગાવાએ 15 મહિનાનો રેકોર્ડ તોડ્યો, મે મહિનામાં મોંઘવારીનો ડબલ માર

જથ્થાબંધ બજાર કિંમતો પર આધારિત ફુગાવાના નવા આંકડા બહાર આવ્યા છે. એપ્રિલની સરખામણીએ મે મહિનામાં ફુગાવો બમણો વધારો થયો છે અને તે એકંદરે 15 મહિનાની ટોચે પહોંચી ગયો છે. આવનારા સમયમાં જથ્થાબંધ મોંઘવારીની અસર દેશના સામાન્ય લોકો અને છૂટક બજાર પર જોવા મળે તેવી શકયતા છે, ત્યારે જોવાનું રહેશે કે આરબીઆઈ આ અંગે શું નિર્ણય લે છે.

મે મહિનામાં દેશમાં થોક મોંઘવારી દર 2.61 ટકા હતો. જે એપ્રિલના 1.26 ટકા કરતાં લગભગ બમણું છે. જ્યારે ગયા વર્ષે મે મહિનામાં દેશનો જથ્થાબંધ મોંઘવારી દર શૂન્યથી ઓછો એટલે કે નકારાત્મક હતો જે -3.61% હતો.

મોંઘવારીએ માજા મુંકી

મોંઘા શાકભાજીના ભાવથી સામાન્ય માણસના ખિસ્સા પર સૌથી મોટો ફટકો પડ્યો છે. બટાટા અને ડુંગળી અને અન્ય શાકભાજીના જથ્થાબંધ ભાવમાં ભારે વધારો જોવા મળ્યો હતો. મે મહિનામાં શાકભાજીનો મોંઘવારી દર 32.42 ટકા રહ્યો છે. જે એપ્રિલમાં આ 23.60 ટકા હતો.

ઈંધણથી લઈને વીજળી સુધી તમામ મોંઘું

મે મહિનામાં ઈંધણ એટલે કે પેટ્રોલ-ડીઝલથી લઈને મોંઘી વીજળીના ભાવે સામાન્ય માણસના ખિસ્સા પર માઠી અસર કરી છે. ઇંધણ અને વીજળી ક્ષેત્રનો ફુગાવાનો દર મે મહિનામાં 1.35 ટકા હતો. આ સિવાય ઉત્પાદિત ઉત્પાદનોની શ્રેણીમાં મોંઘવારી દર 0.78 ટકા રહ્યો છે.

સમજવા જેવી વાત એ છે કે મે મહિનામાં જથ્થાબંધ ફુગાવાના આંકડા તે જ મહિનાના છૂટક ફુગાવાના આંકડાથી વિપરીત છે. રિટેલ ફુગાવાનો દર મે મહિનામાં ઘટીને 4.75 ટકા થયો હતો, જે એક વર્ષમાં સૌથી નીચો સ્તર છે. રિઝર્વ બેંક ઓફ ઈન્ડિયા (RBI) તેની નાણાકીય નીતિ ઘડતી વખતે મુખ્યત્વે છૂટક ફુગાવાને ધ્યાનમાં રાખે છે.