જૂન ક્વાર્ટરમાં ફિનટેક સ્ટાર્ટઅપ્સ પર થયો નાણાંનો વરસાદ, કુલ 48 હજાર કરોડનું રોકાણ
નૈસકોમના રિપોર્ટ અનુસાર, જૂન ક્વાર્ટરમાં ફિનટેક સ્ટાર્ટઅપ્સે (Fintech startup) સૌથી વધુ રોકાણ મેળવ્યું છે. ફિનટેક કંપનીઓમાં 6 બિલિયન ડોલર એટલે કે લગભગ 48 હજાર કરોડ રૂપિયાનું રોકાણ કરવામાં આવ્યું હતું. ફિનટેક કંપનીઓમાં કુલ 26 ટકા રોકાણ આવ્યું છે.
વેન્ચર કેપિટલ ફર્મ્સ સેકોયા કેપિટલ અને ટાઇગર ગ્લોબલની આગેવાની હેઠળ એપ્રિલ-જૂન દરમિયાન ભારતના વિવિધ સ્ટાર્ટઅપ્સમાં (Indian Startups) 6 બિલિયન ડોલર (રૂ. 47,870 કરોડ)નું રોકાણ કરવામાં આવ્યું હતું, જેમાંથી સૌથી વધુ રોકાણ ફિનટેક સેક્ટરમાં (Fintech startup) થયુ હતું. ઇન્ડસ્ટ્રી બોડી નૈસકોમે એક રિપોર્ટ જાહેર કર્યો છે. આ રિપોર્ટ અનુસાર, જૂન ક્વાર્ટર દરમિયાન ફિનટેક કંપનીઓએ કુલ રોકાણમાં લગભગ 26 ટકા, મીડિયા અને મનોરંજનમાં 19 ટકા, એન્ટરપ્રાઇઝ ટેક્નોલોજીમાં 16 ટકા, રિટેલ ટેક્નોલોજીમાં 9 ટકા, એડટેક અને હેલ્થટેકમાં 8 ટકા રોકાણ કર્યું હતું. 5 ટકા રોકાણ આવ્યું હતું. તેમાં કહેવામાં આવ્યું છે કે, સિકોયા કેપિટલ, ટાઇગર ગ્લોબલ, આલ્ફા વેવ અને એસેલના વિવિધ ક્ષેત્રોમાં છ કરતાં વધુ સોદા થયા હતા.
ટાઈગર ગ્લોબલના કુલ રોકાણમાંથી 40 ટકા રોકાણ ફિનટેકમાં અને 20 ટકા રોકાણ એન્ટરપ્રાઇઝ ટેક્નોલોજીમાં આવ્યુ છે. સિકોયા કેપિટલે એન્ટરપ્રાઇઝ ટેક્નોલોજીમાં લગભગ 25 ટકા અને ફિનટેકમાં 20 ટકા રોકાણ કર્યું છે. એપ્રિલ-જૂન ક્વાર્ટરમાં, માત્ર ચાર સ્ટાર્ટઅપ્સ યુનિકોર્ન બન્યા છે. – નિયોબેન્કિંગ ફર્મ ઓપન, એસએએએસ પ્લેટફોર્મ લીડસ્ક્વેર્ડ, એડટેક સ્ટાર્ટઅપ ફિઝિક્સવાલા અને ઓનલાઈન બ્યુટી પ્રોડક્ટ પ્લેટફોર્મ પર્પલ. રિપોર્ટ અનુસાર, ગયા જાન્યુઆરી-માર્ચ ક્વાર્ટરમાં 16 યુનિકોર્ન બનાવવામાં આવ્યા હતા. એપ્રિલ-જૂન 2022માં, ભારતીય ટેક્નોલોજી સ્ટાર્ટઅપ્સમાં રોકાણ લગભગ 17 ટકા ઘટીને 6 બિલિયન ડોલર થયું હતું.
રોકાણમાં થયો 40 ટકાનો ઘટાડો
પીડબલ્યુસી ઈન્ડિયાના અન્ય અહેવાલ મુજબ, ચાલુ કેલેન્ડર વર્ષના બીજા એપ્રિલ-જૂન ક્વાર્ટર દરમિયાન રોકાણ 40 ટકા ઘટીને 6.8 બિલિયન ડોલર રહ્યું છે. વૈશ્વિક રાજકીય સંકટને કારણે સ્ટાર્ટઅપ કંપનીઓને મળતા રોકાણમાં ઘટાડો થયો છે. એકંદરે, પ્રારંભિક તબક્કાના સોદાના 60 ટકાથી વધુનું સરેરાશ કદ 50 લાખ ડોલર રહ્યું છે. રીપોર્ટમાં જણાવ્યું હતું કે, સળંગ ત્રણ ક્વાર્ટરમાં 10 બિલિયન ડોલર કરતાં વધુ એકત્ર કર્યા પછી, ભારતીય સ્ટાર્ટઅપ ઇકોસિસ્ટમમાં કુલ રોકાણ ચાલુ કેલેન્ડર વર્ષના બીજા ક્વાર્ટર દરમિયાન 40 ટકા ઘટીને 6.8 બિલિયન ડોલર પર આવી ગયું.
બેંગલુરુ, એનસીઆર અને મુંબઈ સ્ટાર્ટઅપ હબ
રિપોર્ટ અનુસાર વૈશ્વિક અર્થવ્યવસ્થામાં મંદી, આઈટી સેક્ટરના શેરોમાં ઘટાડો, વધતી જતી મોંઘવારી અને વૈશ્વિક રાજકીય સંકટના કારણે ફંડિંગને અસર થઈ છે. બેંગલુરુ, દિલ્હી NCR અને મુંબઈ દેશના મુખ્ય સ્ટાર્ટઅપ હબ છે. એપ્રિલ-જૂન ક્વાર્ટરમાં કુલ ધિરાણ પ્રવૃત્તિઓમાં આ શહેરોનો હિસ્સો 95 ટકા હતો. આ પછી ચેન્નાઈ અને પુણેનો નંબર આવે છે.