મધર ડેરીની જેમ અમૂલ દૂધના ભાવ પણ વધશે? જાણો શું કહ્યુ કંપનીએ

અમૂલ બ્રાન્ડ હેઠળ દૂધનો વેપાર કરતી સહકારી સંસ્થા ગુજરાત કોઓપરેટિવ મિલ્ક માર્કેટિંગ ફેડરેશન (GCMMF)ની નજીકના ભવિષ્યમાં દેશમાં દૂધના ભાવમાં વધારો કરવાની કોઈ યોજના નથી. સંસ્થાના મેનેજિંગ ડિરેક્ટર (MD) આરએસ સોઢીએ જણાવ્યું હતું કે GCMMF મુખ્યત્વે ગુજરાત, દિલ્હી-NCR, પશ્ચિમ બંગાળ અને મુંબઈના બજારોમાં દૂધનું વેચાણ કરે છે. આ સહકારી સંસ્થા દરરોજ 150 લાખ લિટરથી વધુ દૂધનું વેચાણ કરે છે, જેમાંથી લગભગ 40 લાખ લિટર દૂધ દિલ્હી-એનસીઆરમાં વેચાય છે.

તેમણે જણાવ્યું હતું કે આ સપ્તાહની શરૂઆતમાં મધર ડેરીએ કિંમતમાં વધારાને ટાંકીને દિલ્હી-એનસીઆર માર્કેટમાં ફુલ-ક્રીમ મિલ્કના ભાવમાં લિટર દીઠ રૂ. 1 અને ટોકન દૂધના ભાવમાં રૂ. 2નો વધારો કર્યો હતો. જ્યારે પૂછવામાં આવ્યું કે મધર ડેરી દ્વારા દૂધના ભાવમાં વધારો કર્યા પછી GCMMF પાસે દૂધના ભાવમાં વધારો કરવાની કોઈ યોજના છે, ત્યારે સોઢીએ જણાવ્યું હતું કે નજીકના ભવિષ્યમાં દૂધના ભાવમાં વધારો કરવાની કોઈ યોજના નથી. તેમણે વધુમાં જણાવ્યું હતું કે ઓક્ટોબરમાં છેલ્લી છૂટક કિંમતમાં વધારો થયો, ત્યારથી ખર્ચમાં વધુ વધારો થયો નથી.

ઓક્ટોબરમાં કિંમતોમાં વધારો કરવામાં આવ્યો હતો

ઓક્ટોબરમાં GCMMFએ અમૂલ ગોલ્ડ (ફુલ-ક્રીમ) અને ભેંસના દૂધના ભાવમાં પ્રતિ લિટર રૂ. 2નો વધારો કર્યો હતો. આ વૃદ્ધિ ચૂંટણીલક્ષી ગુજરાતને બાદ કરતાં અન્ય તમામ બજારોમાં થઈ છે. ગુજરાતમાં ડિસેમ્બરની શરૂઆતમાં વિધાનસભાની ચૂંટણી યોજાશે. આ ભાવ વધારા બાદ અમૂલ ગોલ્ડની કિંમત 61 રૂપિયા પ્રતિ લીટરથી વધારીને 63 રૂપિયા પ્રતિ લીટર જ્યારે ભેંસના દૂધની કિંમત 63 રૂપિયાથી વધારીને 65 રૂપિયા પ્રતિ લીટર કરવામાં આવી છે.

પ્રાપ્તિ ખર્ચમાં વધારા માટે જવાબદાર

GCMMFએ આ વર્ષે અમૂલ દૂધના ભાવમાં ત્રણ વખત વધારો કર્યો છે, જ્યારે મધર ડેરીએ ચાર વખત વધારો કર્યો છે. મધર ડેરી એ દિલ્હી-એનસીઆરમાં 30 લાખ લિટર પ્રતિ દિવસના વેચાણની માત્રા સાથે અગ્રણી દૂધ સપ્લાયર્સ પૈકી એક છે. દૂધના ભાવમાં વધારો એવા સમયે ઘરગથ્થુ બજેટ પર દબાણ લાવે છે જ્યારે ખાદ્યપદાર્થોનો ફુગાવો પહેલેથી જ ઊંચા સ્તરે છે. મધર ડેરીએ ડેરી ખેડૂતો પાસેથી રો મિલ્કની ખરીદીના ખર્ચમાં થયેલા વધારાને કારણે ભાવમાં વધારો કર્યો છે.

21 મિલિયન ટનનું ઉત્પાદન થાય છે

પ્રવક્તાએ કહ્યું કે આ વર્ષે સમગ્ર ડેરી ઉદ્યોગમાં દૂધની માંગ અને પુરવઠામાં મોટો તફાવત જોવા મળી રહ્યો છે. કંપનીએ જણાવ્યું હતું કે પશુઓના ખોરાકની કિંમતમાં વધારો થવાને કારણે કાચા દૂધની ઉપલબ્ધતાને અસર થઈ છે અને અનિયમિત ચોમાસાને કારણે કાચા દૂધના ભાવ દબાણ હેઠળ છે. વિશ્વમાં સૌથી વધુ દૂધ ઉત્પાદક ભારતમાં દૂધનું ઉત્પાદન વાર્ષિક આશરે 210 મિલિયન ટન છે.