આજે રૂપિયામાં સતત છઠ્ઠા દિવસે ઘટાડો નોંધાયો હતો અને તે નવા નીચા સ્તરે પહોંચી ગયો છે. ડોલર સામે રૂપિયો (Dollar vs Rupees) 79.92 ના સ્તરે સરકી ગયો છે. આ સમયે મોટાભાગની કરન્સીમાં ડોલર સામે ઘટાડો જોવા મળી રહ્યો છે. જૂન મહિનામાં અમેરિકામાં ફુગાવાનો દર 9.1 ટકા હતો જે 41 વર્ષની નવી ઊંચી સપાટી છે. આ મહિનાના અંતિમ સપ્તાહમાં ફેડરલ રિઝર્વની મહત્વની બેઠક યોજાવા જઈ રહી છે. એવું માનવામાં આવે છે કે ફેડરલ રિઝર્વ અનિયંત્રિત ફુગાવાને નિયંત્રિત કરવા માટે વ્યાજ દરમાં 100 બેસિસ પોઈન્ટ્સ સુધીનો વધારો કરી શકે છે. આ જ કારણ છે કે ડૉલર મજબૂત થઈ રહ્યો છે. ડૉલર ઇન્ડેક્સ હાલમાં 108 ની નજીક છે. આ ઈન્ડેક્સ વિશ્વની છ મુખ્ય કરન્સી સામે ડોલરની મજબૂતાઈ કે નબળાઈ દર્શાવે છે.
બજારના જાણકારોનું કહેવું છે કે રૂપિયામાં વધુ ઘટાડાની શક્યતા છે. રૂપિયો 81ના સ્તરે સરકી શકે છે. વર્ષ 2022માં ડોલર સામે રૂપિયો અત્યાર સુધીમાં 7 ટકા સુધી લપસી ગયો છે. નિષ્ણાતો કહે છે કે ડોલરની સરખામણીએ રૂપિયાએ એશિયાની અન્ય કરન્સીની સરખામણીમાં સારું પ્રદર્શન કર્યું છે. આવી સ્થિતિમાં આગામી સમયમાં વધુ ઘટાડો શક્ય છે. રેલિગેર બ્રોકિંગના કોમોડિટી અને કરન્સી રિસર્ચ હેડ સુગંધા સચદેવાએ આ વાત કહી હતી.
યુક્રેન કટોકટીથી રોકાણકારો સુરક્ષિત રોકાણ તરફ આકર્ષાઈ રહ્યા છે. ફેડરલ રિઝર્વ ફુગાવાને નિયંત્રણમાં લાવવા માટે વ્યાજ દરમાં વધારો કરી રહ્યું છે. તેનાથી ડૉલરને વધુ મજબૂતી મળી રહી છે. આવી સ્થિતિમાં ડોલરની માંગ વધુ વધી રહી છે. માંગમાં વધારાને કારણે તેની તાકાત પણ વધી રહી છે અને અન્ય કરન્સી પણ લપસી રહી છે.
વ્યાજદરમાં વધારાને કારણે બોન્ડ યીલ્ડ વધી રહી છે. અમેરિકામાં બોન્ડ્સ પર હાલમાં લગભગ 3 ટકા વળતર મળી રહ્યું છે. આવી સ્થિતિમાં દુનિયાભરના રોકાણકારો અમેરિકન બોન્ડ માર્કેટમાં રોકાણ કરી રહ્યા છે. આ સિવાય રૂપિયા સહિત અન્ય કરન્સી પર દબાણ વધી રહ્યું છે.
રૂપિયો નબળો પડવાને કારણે માત્ર ગેરફાયદા જ નથી પરંતુ કેટલાક ફાયદા પણ છે. ભારતમાંથી વિદેશમાં જતા સામાન માટે પણ સારા પૈસા મળે છે. દેશમાંથી માલ કે સેવાઓની નિકાસ કરતા લોકો માટે નબળો રૂપિયો ફાયદાકારક છે. પાર્ટસ, ચા, કોફી, ચોખા, મસાલા, દરિયાઈ ઉત્પાદનો, માંસ જેવી પ્રોડક્ટ્સ ભારતમાંથી નિકાસ થાય છે અને આ બધાના નિકાસકારોને રૂપિયાના નબળા પડવાના કારણે ફાયદો થશે.
રૂપિયો નબળો પડવાનો મતલબ એ છે કે હવે દેશે એટલી જ રકમની સામાન ખરીદવા માટે વધુ પૈસા ખર્ચવા પડશે. આયાતી માલ વધુ મોંઘો થશે. તેમાં સોનું, ક્રૂડ ઓઈલનો સમાવેશ થાય છે કારણ કે આંતરરાષ્ટ્રીય બજારમાં આ કોમોડિટીની કિંમત ડોલરમાં નક્કી કરવામાં આવે છે. હાલમાં ક્રૂડ ઓઈલની કિંમતો વધી રહી છે અને રૂપિયો રેકોર્ડ નીચી સપાટીએ છે તેથી પેટ્રોલ અને ડીઝલની આયાત મોંઘી થશે.