Valsad Rain News: વલસાડમાં મેઘતાંડવ! બે કલાકમાં વાપીમાં 4.2 ઇંચ વરસાદ, શહેરના અનેક વિસ્તારો જળબંબાકાર

વલસાડ જિલ્લામાં માત્ર બે કલાકમાં ધોધમાર વરસાદ વરસતા જનજીવન અસ્તવ્યસ્ત બની ગયું છે. ઉમરગામ, વાપી, વલસાડ અને પારડી સહિતના વિસ્તારોમાં ભારે વરસાદ નોંધાયો હતો. સૌથી વધુ અસર વાપીમાં જોવા મળી, જ્યાં માત્ર બે કલાકમાં 4.2 ઇંચ વરસાદ ખાબકતાં અનેક વિસ્તારોમાં પાણી ભરાઈ ગયા હતા.

વાપીમાં અંડરપાસ અને મુખ્ય માર્ગો પાણીમાં ગરકાવ

ધોધમાર વરસાદના પગલે વાપી શહેરને જોડતા બંને અંડરપાસમાં વરસાદી પાણી ભરાઈ ગયા હતા, જેના કારણે વાહનવ્યવહારને ભારે અસર પહોંચી હતી. ઉપરાંત J ટાઈપ GIDC વિસ્તારના રસ્તાઓ પણ જળમગ્ન બન્યા હતા. સ્ટેશન રોડ, મુખ્ય બજાર અને શહેરના અન્ય વિસ્તારોમાં પણ પાણી ભરાતા લોકોને અવરજવર કરવામાં ભારે મુશ્કેલીનો સામનો કરવો પડ્યો હતો.

જિલ્લાના અનેક વિસ્તારોમાં જનજીવન પ્રભાવિત

ભારે વરસાદને કારણે વલસાડ જિલ્લાના અનેક નીચાણવાળા વિસ્તારોમાં પાણી ભરાઈ જતાં વાહનચાલકોને ભારે હાલાકી ભોગવવી પડી હતી. કેટલાક સ્થળોએ ટ્રાફિક ધીમો પડી ગયો હતો, જ્યારે પાણી ભરાવાને કારણે સ્થાનિક લોકોને પણ મુશ્કેલીનો સામનો કરવો પડ્યો હતો.

પ્રિ-મોન્સૂન કામગીરી સામે ફરી ઉઠ્યા સવાલ

દર વર્ષે વરસાદ પહેલાં ડ્રેનેજ અને વરસાદી પાણીના નિકાલ માટે કામગીરીના દાવા કરતી મનપાની પ્રિ-મોન્સૂન કામગીરી સામે ફરી સવાલો ઊભા થયા છે. પ્રથમ જ ભારે વરસાદમાં શહેરના મુખ્ય માર્ગો અને અંડરપાસમાં પાણી ભરાઈ જતાં સ્થાનિકોએ તંત્રની કામગીરી પર અસંતોષ વ્યક્ત કર્યો છે.

બે કલાકમાં ક્યાં કેટલો વરસાદ પડ્યો?

• વાપી: 4.2 ઇંચ

• ઉમરગામ: 1.76 ઇંચ

• પારડી: 1.56 ઇંચ

• વલસાડ: 1.20 ઇંચ

બે કલાકના ભારે વરસાદે વલસાડ જિલ્લાના અનેક વિસ્તારોને પાણીમાં ગરકાવ કરી દીધા છે, જ્યારે વાપીની સ્થિતિએ વરસાદી સિઝન પહેલાંની તંત્રની તૈયારીઓ પર ગંભીર સવાલો ઊભા કર્યા છે.

આ પણ વાંચો- Gujarat Rain Update: ગુજરાતમાં મેઘમહેર: 24 કલાકમાં 75 તાલુકામાં વરસાદ, નવસારીમાં સૌથી વધુ 4.53 ઇંચ વરસાદ