Breaking News: મુંબઈમાં દૂધ મોંઘું, 1 સપ્ટેમ્બરથી પ્રતિ લિટર રૂ. 9નો વધારો, ભાવ રૂ.102 થશે

તહેવારોની સિઝન શરૂ થાય તે પહેલા મુંબઈના સામાન્ય લોકોને મોંઘવારીનો મોટો ઝટકો લાગ્યો છે. શહેરમાં 1 સપ્ટેમ્બર, 2026થી દૂધના ભાવમાં પ્રતિ લિટર રૂ.9નો વધારો થવાનો છે. હાલમાં રૂ.93 પ્રતિ લિટરના ભાવે મળતું દૂધ હવે રૂ.102 પ્રતિ લિટરના ભાવે મળશે. નવા ભાવ 28 ફેબ્રુઆરી, 2027 સુધી અમલમાં રહેશે, જેના કારણે તહેવારોની સિઝનથી લઈને શિયાળાના અંત સુધી મુંબઈકરોના ઘરખર્ચ પર સીધી અસર પડશે.

પશુઆહાર અને ઘાસચારાના ભાવ વધતા દૂધ મોંઘું

દૂધના ભાવમાં વધારા પાછળ પશુઆહાર અને ઘાસચારાના વધેલા ખર્ચને મુખ્ય કારણ ગણાવવામાં આવી રહ્યું છે. દૂધ ઉત્પાદકોના જણાવ્યા મુજબ પશુ આહારમાં વપરાતા અનાજ, તુવેર ચૂની અને ચણા ચૂની સહિતની વસ્તુઓના ભાવમાં 25 ટકા સુધીનો વધારો થયો છે. આ ઉપરાંત દૂધાળા પશુઓના ભાવમાં પણ વધારો થતાં દૂધ ઉત્પાદનનો કુલ ખર્ચ વધી ગયો છે.

ઉત્પાદકોની વધતી પડતરનો ગ્રાહકો પર બોજ

ઉત્પાદન ખર્ચમાં સતત વધારો થતાં દૂધ ઉત્પાદકો પર આર્થિક ભાર વધ્યો હોવાનું જણાવવામાં આવ્યું છે. પશુઆહાર સહિતના રોજિંદા ખર્ચમાં વધારો થતાં બજારમાં ટકી રહેવા માટે ભાવ વધારવો જરૂરી બન્યો હોવાનો ઉત્પાદકોનો દાવો છે. જોકે, દૂધ જેવી રોજિંદી જરૂરિયાત મોંઘી થતાં તેની સીધી અસર મુંબઈના સામાન્ય પરિવારોના માસિક બજેટ પર પડશે.

આ પણ વાંચો- Breaking News : નેપાળમાં પૂરની હોનારત વચ્ચે કુલ 23 ગુજરાતીઓ લાપતા, જુઓ Video