વલસાડની ધરમપુર બેઠક પર ટિકિટને લઈને કોંગ્રેસમાં ભડકો, કલ્પેશ પટેલ કરશે અપક્ષ ઉમેદવારી

વલસાડના ધરમપુર બેઠક પર કોંગ્રેસે કિશન પટેલને ટિકિટ આપતા ધરમપુર કોંગ્રેસમાં ભડકો થયો છે. થોડા સમય પહેલા કોંગ્રેસમાં જોડાયેલા ધરમપુર તાલુકા પંચાયતના અપક્ષ સભ્ય કલ્પેશ પટેલ અપક્ષમાંથી ઉમેદવારી નોંધાવશે. કોંગ્રેસમાંથી ટિકિટ ના મળતા નારાજ કલ્પેશ પટેલ આવતીકાલે અપક્ષમાંથી ઉમેદારી ફોર્મ ભરશે. કલ્પેશ પટેલે કહ્યું, કોંગ્રેસ ધરમપુર બેઠક 25 હજારથી વધુ મતોથી ગુમાવશે. કોંગ્રેસના આંતરિક ડખાને કારણે પાર્ટીને મોટું નુકસાન સહન કરવું પડશે. મહત્વનું છે કે કલ્પેશ પટેલની અપક્ષ ઉમેદવારી કોંગ્રેસ માટે મોટી મુશ્કેલી ઉભી કરી શકે છે.

ગુજરાત એસેમ્બલી ઈલેકશન 2022 : કોંગ્રેસમાં ટિકિટને લઈને આંતરિક ખેંચતાણ

કોંગ્રેસમાં ટિકિટને લઈને આંતરિક ખેંચતાણ કોઈ નવી વાત નથી. કોંગ્રેસમાં ટિકિટને લઈને આંતરિક ખેંચતાણ ચાલી રહી છે કોંગ્રેસે વિવિધ જગ્યાએ ટિકિટને લઈને ચાલી રહેલ અસંતોષ અને વિરોધ દિલ્હી હાઈકમાન્ડ સુધી પહોંચ્યો છે. કોંગ્રેસમાં ટિકિટ ફાળવણી વિવાદને ખાળવા હાઇકમાન્ડે દિલ્લીથી મોટી ટીમ મોકલી છે. કોંગ્રેસે દિલ્લીથી 26 લોકોને લોકસભા બેઠક મુજબ વિવાદ ખાળવાની જવાબદારી સોંપી છે. કોંગ્રેસના 4 સહપ્રભારીઓ સામે પણ અનેક લોકોએ ફરિયાદ કરી છે. ટિકિટ ફાળવણીની ગુંચ ઉકેલવા દિલ્લીથી ટીમ આવી છે. શુક્રવારે પણ વિપક્ષના નેતાના નિવાસસ્થાને અશોક ગેહલોતે બેઠક કરી હતી. કેટલીક બેઠકો પર વ્યક્તિગત લાભ માટે ટિકિટ ફાળવાઈ હોવાની ફરિયાદો ઉઠી છે તો ટિકિટ ફાળવણીમાં સગાવાદ અને વ્હાલાદવલાની નીતિ રખાઈ હોવાના પણ આક્ષેપ થઈ રહ્યા છે.