Gujarati Video : ગુજરાતમાં પડેલા કમોસમી વરસાદથી ખેડૂતોને આર્થિક ફટકો, બિયારણ અને મજૂરી સહિતનો ખર્ચો માથે પડ્યો
Unseasonal rain : રાજ્યમાં છેલ્લા બે દિવસથી સતત વરસી રહેલા કમોસમી વરસાદે જગતના તાતને ફરી પડ્યા પર પાટું માર્યું છે.
રાજ્યમાં ઉનાળાની શરુઆતમાં જ વરસાદી માહોલ જામ્યો છે. તેમાં પણ સૌરાષ્ટ્રના મોટાભાગના વિસ્તારોમાં કમોસમી વરસાદને કારણે ખેડૂતોની ચિંતા વધી છે. કમોસમી વરસાદના કારણે ખેડૂતોને મોં સુધી આવેલો કોળિયો છીનવાયો છે. રાજ્યમાં છેલ્લા બે દિવસથી સતત વરસી રહેલા કમોસમી વરસાદે જગતના તાતને ફરી પડ્યા પર પાટું માર્યું છે. માવઠાને કારણે અનેક શહેરોમાં ઉપજ પલળી જતા ખેડૂતોને આર્થિક ફટકો પડ્યો છે.
APMCમાં પાકની બોરીઓ પલળી
ગાંધીનગરના કલોલના APMCમાં ઘઉં, બાજરી, એરંડા, રાઇ સહિતના પાકની બોરીઓ પલળી ગઇ. બીજી તરફ બનાસકાંઠામાં પણ ખેતરમાં રહેલા રાજગરા અને બટાકાના પાકને પણ વરસાદને કારણે વિપુલ નુકસાન પહોંચ્યું છે. પરિણામે ખેડૂતોને મોંઘા ભાવના બિયારણ અને મજૂરી સહિતનો ખર્ચો માથે પડ્યો છે.
તો અરવલ્લીમાં પણ મેઘરજના જીતપુર, ખાખરીયા સહિતના ગ્રામ્ય વિસ્તારોમાં કરા સાથે વરસેલા વરસાદને કારણે ઘઉં, મકાઇ, ચણા સહિતનો ઉભો પાક નાશ પામ્યો છે. તો દક્ષિણ ગુજરાતમાં પણ સુરત સહિત અન્ય જિલ્લાઓમાં ઘઉંનો ઘણો પાક નષ્ટ થયો છે.
માવઠાના કારણે ભારે નુકસાન
જસદણમાં પડેલા વરસાદ કારણે ઉભા પાકને ભારે નુકસાન પહોંચ્યું છે. ઘઉં, ચણા, ધાણા અને જીરૂ સહિતના પાકને માવઠાને કારણે નુકસાન થયું છે. જસદણ તાલુકામાં હજારો વીઘામાં શિયાળુ પાકનું વાવેતર કર્યું હતું. પરંતુ ખેડૂતોની આખી સિઝન પર પાણી ફરી વળ્યું છે. તૈયાર થયેલા પાકની લણણીનો જ સમય હતો અને તેવા સમયે કમોસમી વરસાદ થતા ખેડૂતોને રાતા પાણીએ રોવાનો વારો આવ્યો છે.
ખેડૂતોએ કરેલી મહેનત પાણીમાં
ખેડૂતોએ આખી સિઝન પૈસાનું અને પરસેવાનું પાણી કર્યું. પાક પાછળ કરેલી મહેનતનું ફળ મળવાની તૈયારીમાં હતું અને તેમાં કુદરતની એક થપાટે ધરતીપુત્રોને રાતા પાણીએ રોતા કરી દીધા. પાકના વાવેતરથી લઈને લણણી સુધી બિયારણ, ખાતર અને પાણીનો ખર્ચ કર્યો, પાક ઉગીને તૈયાર હતો, પરંતુ માર્કેટયાર્ડ સુધી પહોંચે તે પહેલા જ કમોસમી વરસાદે ખેડૂતોને આર્થિક રીતે મોટું નુકસાન પહોંચાડ્યું છે. જગતનો તાત કુદરત સામે ફરી એકવાર પાંગળો સાબિત થયો છે. જેનું દર્દ ખેડૂતોના શબ્દોથી સમજી શકાય છે.
