Surendranagar: ખેતરમાં પાકની આડમાં લીલો ગાંજો, 18 કરોડનો નશીલો પાક ઝડપાયો, જુઓ Video

સુરેન્દ્રનગરમાં પહેલી વાર ખેતર માલિક ભાવુભાઈ રવજીભાઈ મીઠાપરાએ પોતાના ખેતરમાં તુવરની ખેતીની આડમાં ગાંજાના છોડ વાવ્યા હોવાનું સામે આવ્યું છે. SOG પોલીસને મળેલી બાતમીના આધારે જ્યારે ખેતરમાં તપાસ કરવામાં આવી ત્યારે અંદાજે 120 ગાંજાના છોડ મળી આવ્યા હતા. પોલીસે ખેતરમાંથી 471 કિલો લીલો ગાંજો જપ્ત કર્યો છે, જેની બજાર કિંમત અંદાજે રૂપિયા 2 કરોડ 35 લાખ રૂપિયા આંકવામાં આવી છે. ખેતીની આડમાં ગાંજાનું ઉત્પાદન કરીને આરોપી નશાના નેટવર્કમાં સામેલ હોવાની શંકા વ્યક્ત કરવામાં આવી રહી છે.

3,036 કિલો લીલો ગાંજો જપ્ત

આ જ વિસ્તારમાં બીજા એક ખેતરમાં પણ પોલીસને મોટી સફળતા મળી છે. આરોપી સંજયભાઈ તાવીયાએ એરંડા અને કપાસના પાકની વચ્ચે ગાંજાનું ગેરકાયદેસર વાવેતર કર્યું હતું. પોલીસ તપાસ દરમિયાન ખેતરમાંથી 550 જેટલા ગાંજાના છોડ મળી આવ્યા હતા. અહીંથી કુલ 3,036 કિલો લીલો ગાંજો જપ્ત કરવામાં આવ્યો છે, જેની કિંમત આશરે રૂપિયા 15.18 કરોડ રૂપિયા હોવાનું પોલીસે જણાવ્યું છે.

ત્રણ ટ્રેક્ટર જેટલો મુદ્દામાલ

પોલીસ દ્વારા બન્ને ખેતરોમાં રાતભર સર્ચ ઓપરેશન ચલાવવામાં આવ્યું હતું. મોટા પ્રમાણમાં લીલો ગાંજો મળતાં ત્રણ ટ્રેક્ટર ભરીને મુદ્દામાલને પોલીસ મથકમાં લાવવામાં આવ્યો હતો. આ કામગીરી દરમિયાન સ્થાનિક લોકોમાં પણ ભારે આશ્ચર્ય ફેલાયું હતું. કારણ કે સામાન્ય ખેતી કરતા ખેતરોમાં આટલા મોટા પાયે નશીલો પાક ઉગાડવામાં આવી રહ્યો હતો.

હાલમાં પોલીસે બન્ને આરોપીઓની ધરપકડ કરી NDPS એક્ટ હેઠળ ગુનો નોંધ્યો છે. ગાંજાનું બીજ ક્યાંથી લાવવામાં આવ્યું, ગાંજો કોને અને કયા રાજ્યમાં સપ્લાય કરવામાં આવતો હતો તેમજ આ પાછળ કોઈ મોટા નશા રેકેટનો હાથ છે કે નહીં, તે દિશામાં પોલીસએ તપાસ વધુ તેજ બનાવી છે. SOG પોલીસની આ કાર્યવાહીથી નશાના ધંધામાં સંકળાયેલા તત્વોમાં ફફડાટ ફેલાયો છે.