રાજકોટમાં ફરી એકવખત રખડતા ઢોરના કારણે અકસ્માત સર્જાયો છે. આ અકસ્માતમાં રખડતા ઢોરની સાથે સાથે ઢોર માલિક પણ એટલો જ જવાબદાર છે. આ સમગ્ર ઘટનાના CCTV પણ સામે આવ્યા હતા. રાજકોટના ગાંધીગ્રામ વિસ્તારના વેલનાથ ચોકમાં આ ઘટના બની હતી. CCTVમાં સ્પષ્ટ જોઇ શકો છો કે, એક બેફામ ઢોર માલિક ચાલુ બાઇકે ઢોરને બેદરકાર રીતે હંકારી રહ્યો છે. જાહેર માર્ગ પર જોખમી રીતે હંકારાતા ઢોર સામેથી આવતી વાહન ચાલક યુવતી સાથે ટકરાય છે. જેને કારણે અકસ્માતની ગંભીર ઘટના બને છે.
નિર્દોષ વાહન ચાલક યુવતી તેની સામે આવતા આ અજાણ્યા જોખમથી એકદમ અજાણ હતી. અચાનક જ આવેલા ઢોરે વાહન ચાલક યુવતીને અડફેટે લઇને તેને ગંભીર ઈજાગ્રસ્ત કરી. પોતાની બેદરકારી છતી થતા જ બેદરકાર ઢોર માલિક શાંતિથી ત્યાંથી કઇ થયું જ ન હોય તેમ રફૂચક્કર થઇ જાય છે. પરંતુ તે બેદરકાર ઢોર માલિકને ક્યાં ખબર છે કે તેની બેદરકારી CCTVમાં કેદ થઇ ગઇ છે. રખડતા ઢોરના કારણે તો ઘણા અકસ્માત થાય છે. ત્યારે હવે ઢોર માલિક જાહેરમાં ઢોરને હંકારતા હવે વાહન ચાલક માટે જાહેર માર્ગ પર વાહન ચલાવવું જોખમી બની રહ્યું છે.
આ પણ વાંચો : ઓપરેશન કાવેરી અંતર્ગત વધુ 150 નાગરિકો પહોંચ્યા વતન રાજકોટ, 103 વર્ષીય વૃદ્ધાનું મામલતદાર દ્વારા કરાયુ સ્વાગત
ઢોર માલિકની બેદરકારી અને નિર્દોષ વાહન ચાલકોની પરેશાની જોતા તંત્ર સામે અનેક સવાલ ઉઠી રહ્યા છે. આ બેફામ ઢોર માલિકને જાહેર માર્ગ પર ઢોર હંકારવાની પરવાનગી કોણે આપી ? વાહન ચાલક યુવતીને જાનહાનિ થઇ હોત તો તેના માટે કોણ જવાબદાર ? વાહન ચાલક યુવતીને શારીરિક ખોટ આવી હોત તો તેના માટે કોણ જવાબદાર ? રખડતા ઢોર અને બેફામ ઢોર માલિકો પર ક્યારે લાગશે લગામ ? આ રખડતી રંઝાડથી આખરે ક્યારે મળશે મુક્તિ ? આ સહિતના અનેક સવાલો ઉઠી રહ્યા છે.