Gujarati Video : PM મોદી માર્ચ મહિનામાં આવશે ગુજરાત, ભારત અને ઓસ્ટ્રેલિયાના PM સાથે બેસીને જોશે, મોદી સ્ટેડિયમમાં રમાનારી મેચ

વડાપ્રધાન નરેન્દ્ર મોદી માર્ચ મહિનામાં ફરી ગુજરાત પ્રવાસે આવવાના છે. ભારત 20ની યજમાની કરવાનું છે. ભારત G-20 સમિટ-2023નું યજમાન બન્યુ છે. જેના ભાગરૂપે ગુજરાતમાં G- 20 સમિટની મહત્વની 16 ઇવેન્ટ યોજાઈ રહી છે. ત્યારે ઓસ્ટ્રેલિયાના વડાપ્રધાન એન્થોની અલ્બેનીઝ પણ ભારત આવવાના છે. બીજી તરફ ભારત અને ઓસ્ટ્રેલિયા વચ્ચે આ સમયગાળ દરમિયાન જ ટેસ્ટ મેચ રમાવાની છે. આ મેચ અમદાવાદના નરેન્દ્ર મોદી સ્ટેડિયમમાં રમાવાની છે. ત્યારે બંને દેશના વડાપ્રધાન સાથે બેસીને આ મેચ નિહાળશે.

નરેન્દ્ર મોદી સ્ટેડિયમમાં બે દેશના વડાપ્રધાન સાથે નિહાળશે મેચ

ભારત અને ઓસ્ટ્રેલિયા વચ્ચે બોર્ડર-ગાવસ્કર ટ્રોફીની ચોથી અને અંતિમ મેચ અમદાવાદના નરેન્દ્ર મોદી સ્ટેડિયમમાં 9 થી 13 માર્ચ દરમિયાન રમાવાની છે. ત્યારે ભારતના વડાપ્રધાન નરેન્દ્ર મોદી અને ઓસ્ટ્રેલિયાના વડાપ્રધાન એન્થોની અલ્બેનીઝ સાથે બેસીને આ ટેસ્ટ મેચ નીહાળવાના છે. એવુ પહેલી વાર બનશે કે જ્યારે પીએમ મોદી પોતાના નામના એટલે કે નરેન્દ્ર મોદી સ્ટેડિયમમાં મેચની મજા માણશે. વિશ્વના સૌથી મોટા સ્ટેડિયમમાં યોજાનારી બોર્ડર-ગાવસ્કર ટ્રોફીની આ મેચના બંને દેશોના વડાપ્રધાનો સાક્ષી બનશે.

ઑસ્ટ્રેલિયાની ટીમનું ભારતમાં આગમન

આ સિરીઝ માટે ઑસ્ટ્રેલિયાની ટીમ ભારતમાં આવી ચુકી છે અને મેચ માટેની તૈયારીઓ પણ શરુ કરી દીધી છે. આ સિરીઝની પ્રથમ બે મેચ માટે BCCI દ્વારા ભારતીય ટીમની જાહેરાત પણ કરી દેવામાં આવી છે. ટૂંક સમયમાં જ ટીમ દ્વારા મેચની પ્રેક્ટિસ પણ શરુ કરી દેવામાં આવશે.

(વિથ ઇનપુટ-કિંજલ મિશ્રા, ગાંધીનગર)