મહેસાણાના પાંચોટમાં ઢોર ડબ્બાને તોડી પંચાયત ઘર બનાવવા સામે ગ્રામજનોએ ચડાવી બાંયો- જુઓ Video
મહેસાણાના પાંચોટ ગામમાં વર્ષો જૂના ઢોર ડબ્બાને તોડી પંચાયત ઘર બનાવવા સામે ગ્રામજનોએ બાંયો ચડાવી છે. ગાયકવાડ સમયના ઢોર ડબ્બાની જાળવણી અને પશુઓના હિત માટે તેઓ અવાજ ઉઠાવી રહ્યા છે. ગ્રામજનો પંચાયત ઘર અન્ય જગ્યાએ બનાવવા અને ઢોર ડબ્બાની જગ્યા ખુલ્લી રાખવાની માંગ સાથે રજૂઆતો કરી રહ્યા છે, જ્યારે સરપંચ દાવાઓને નકારી રહ્યા છે.
મહેસાણાના પાંચોટ ગામમાં ગ્રામજનો અને ખેડૂતોએ વર્ષો જૂના ઢોર ડબ્બા માટે બાંયો ચડાવી છે. ગ્રામજનોનો આક્ષેપ છે કે, ગામમાં આવેલો ઢોર ડબ્બો ગાયકવાડ સમયનો છે. તે ઢોર ડબ્બાને તોડી પાડતા કેટલાક પશુના મોત પણ નિપજ્યાં છે. આ મામલે ગ્રામજનોએ 60થી વધુ સહીઓ સાથે પંચાયતમાં લેખિત અરજી કરી છે અને માગ કરી કે પંચાયત ઘર ગામમાં અન્ય કોઈ જગ્યાએ બનાવવામાં આવે. આ જગ્યા પશુઓ માટે ખુલ્લી રાખવામાં આવે. તેમજ આ મુદ્દે તલાટીએ ડરાવવા પોલીસ કેસની ધમકી આપ્યાનો પણ આરોપ લગાવ્યો છે.
બીજી તરફ ગ્રામજનોના વિરોધ અને આક્ષેપો વચ્ચે સરપંચે પોતાનો બચાવ કર્યો. જણાવ્યું કે, રખડતા ઢોરો માટેનો ડબ્બો ગામમાં અગાઉથી જ બનાવવામાં આવેલો છે અને તે કાર્યરત છે. પંચાયત ઘરના નિર્માણ અંગે સ્પષ્ટતા કરી કે, અગાઉ જૂની પંચાયત હતી, તે જ જગ્યાએ નવું પંચાયત ઘર બની રહ્યું છે. તેમજ ગ્રામજનો તરફથી કોઈ લેખિત રજૂઆત ન મળી હોવાનો દાવો કર્યો.
હવે જોવું એ રહ્યું કે, અબોલ જીવો માટેના ઢોર ડબ્બાની જગ્યા ખુલ્લી રાખવાની માગ પર વહીવટી તંત્ર નમતું જોખશે કે પછી લોકોના વિરોધ વચ્ચે પણ પંચાયત ઘરનું નિર્માણ થશે.
